أحلام بكار.. حلم رقم "3".. فى زمن السلطان برقوق!!

التقى حمزاوى، بكار على ذات المقهى الذى اعتادا أن يلتقيا عليه كل أسبوع فتبادلا العناق والسلام، وجلسا معًا يتبادلان أطراف الحديث.
بكار: ليك وحشة يا حمزاوى بفتقدك طول الأسبوع.
حمزاوى: وأنا كمان بفتكرك كثيرًا ودايمًا على بالى إيه حال الدنيا معاك؟
بكار: الحمد لله على كل حال، كله تمام مفيش بس غير أحلامى اللى تعبانى شوية وواخدة جزء كبير من تفكيرى.
حمزاوى: أنت لسه بتحلم؟ ده الناس بطلت تحلم، الناس جالها إحباط حتى من أحلامها يا بكار.
بكار: أنا بقى ماعنديش إحباط وأحلامى دى رغم إزعاجها إلا أننى حابيتها جدًا، بتريحنى وتخلينى أشوف حاجات ما بشوفهاش فى الحقيقة.
حمزاوى: خلاص يا بكار أحلم براحتك بس ما توجعش دماغى بأحلامك.
بكار: هو أنا ليا غيرك صاحب أحكيله أحلامى دى.
حمزاوى: أنت ناوى النهارده كمان تحكيلى.
بكار: طبعًا ياصاحبى خد عندك.
أنا حلمت إمبارح خير اللهم أجعله خير أنى عايش فى عصر السلطان برقوق.
مبتسمًا حمزاوى: برقوق ده حلم ولاّ وحم.
بكار: ما تهزرش يا حمزاوى وسبنى أكمل حلمى.
حمزاوى: كمل كمل برقوق برقوق إن شا الله ‪جوافة‬.
بكار: وإن السلطان برقوق قرر غلق مسارح المنوعات فى ممر الألفى بوسط البلد، وتحويلها إلى مصانع للصناعات الصغيرة يديرها أصحاب اللحى والجلاليب البيضاء، ومسارح شارع 26 يوليو وأن السلطان برقوق غير اسم شارع الهرم لشارع الصراط المستقيم، وملاهيه الليلية تم تحويلها إلى دور عبادة ومساجد، وأن مصر كلها ما بقاش فيها ملهى ليلى واحد أو مسرح منوعات أو بار.
حمزاوى: وإيه كمان اطربنى يابكورتى.
بكار: وإن السلطان برقوق منع استيراد الخمور، وإن ما حدش يدخل بها من مطار القاهرة الجوى أو اى ميناء بحرى حتى لو كان أجنبى.
حمزاوى: مطار القاهرة!
بكار: أيوه مطار القاهرة.
حمزاوى: لا فعلاً أنا مصدقك ما هو أيام السلطان برقوق كان فيه مطار القاهرة والسلطان برقوق نفسه ماكانش بيسافر على جمل أو فرس كان عنده بوينج 707 راكنها تحت قصره!
كمل كمل يابكار
بكار: وإن دينا ولوسى وفيفى عبده وجميع راقصات مصر تبن إلى الله وتحولن إلى داعيات إسلاميات، وأصبح عندنا ألف رابعة العدوية ومعظم مطربينا تحولوا إلى مقرئين ومن رضى الله عنه سوف يلتحق بالإذاعة المصرية مقرئ، والآخرون ذائعو الصيت سوف يتم الاستعانة بهم فى عزاء كبار السلاطين وعائلاتهم وذويهم لقراءة القرآن الكريم فى مسجد عمرو بن العاص ومسجد عمر مكرم.
حمزاوى: مسجد عمرو بن العاص وعمر مكرم أيام السلطان برقوق!
بكار: أنت بتدقق فى حلمى ليه ياحمزاوى؟
ركز مع المضمون وسيبك من الفرعيات.
حمزاوى: فرعيات.. ماشى يا بكار كمل
بكار: وأنصاف المطربين سوف يعملون فقهاء يتلون قصار السور على قبور الأموات، ده أنا شوفت تامر حسنى وهو لابس جلباب أخضر وقاعد على أحد القبور يتلو قصار السور، وبعد ماخلص تلاوة أهل المتوفى قاموا بإعطائه كيس بلح وبرتقال وقرص بالعجوة، وبعد ما الناس مشيوا نده على حماقى وحمادة هلال وكل واحد فيهم جه بكيسه اللى فيه فاكهة وقرص وقعدوا وفرشوا فى الأرض وقعدوا ياكلوا مع بعض.
حمزاوى: قولى هو تامر حسنى كان مبين شعر صدره من الجلابية الخضرة ولا كان مداريه؟
بكار: ماركزتش فى الحكاية دى ياحمزاوى بس حماقى كان لابس نظارة شمس، وخير الله ما اجعله خير إن كل البيوت فى مصر بقت تجيب مقرئ كل يوم الصبح يقرأ فيها قرآن علشان تحل البركة عليهم، بيوت قاطنى المناطق الراقية كانت بتستعين بعمرو دياب والمقرئ محمد منير وبيوت المناطق الشعبية كانت بتستعين بالمقرئ سعد الصغير والمقرئ عبدالباسط حمودة ومحمد عدوية، أما المطربات كن يقمن بالتلاوه فى مجالس النساء بعد ارتداء النقاب.. أمينة "حركب الحنطور" استحوذت على أغلب مجالس النساء فى الأحياء الشعبية وأنغام وشيرين عبدالوهاب وآمال ماهر استحوذن على أغلب مجالس النساء فى الأماكن الراقية.
أما العازفون والموسيقيون لم يتبق لهم سوى الموالد، هى التى وجدوا فيها لقمة عيشهم ورزقهم كمولد السيدة زينب ومولد أبو الحسن الشاذلى ومولد سيدى القناوى، وهكذا سيجولون البلاد والقرى والنجوع جريًا وراء الموالد لكسب لقمة عيشهم.
حمزاوى: لا يا بكار حلمك المرة دى مختلف وجميل وواقعى أهو تجديد برضه فيه حماقى وتامر حسنى وأمينة وآمال ماهر ودينا الرقاصة
بكار: إيه يا حمزاوى هو أنا اللى كنت قلت لهم يجونى فى الحلم.
حمزاوى: ما أنا عارف همه جم لوحدهم أظنك كده خلصت حلمك.
ممكن تسبنى أمشى علشان عازم المدام على العشا بره النهارده.
بكار: طيب ما تتعشوا فى البيت لزومها إيه المصاريف دى.
أنت مسرف أوى ياحمزاوى ده حتى طعم أكل البيت أحسن من أكل المطاعم والفنادق.
حمزاوى: لزومها الشاعرية والرومانسية، سمعت عنها يا بكار!
بكار: إيه يا حمزاوى أنت فاكرنى إيه جاموسة.
أيوة سمعت.. عمومًا ربنا يهنيكم ببعض أنا كمان حقوم.. أم العيال عملالى النهارده فتة ولحمة ورز، وبينى وبينك أنا جعان جدًا
يلا نتقابل الأسبوع الجاى، بس ابقى تعالى بدرى ما تتأخرش عليا زى عوايدك مبنلحقش نقعد مع بعض.
حمزاوى: حاضر يا صاحبى مش حتأخر عليك وبالهنا والشفا الفتة واللحمة.
سلام يا بكار
وانصرفا كل فى طريقه على وعد اللقاء الأسبوع المقبل.