أحلام بكار .. حلم رقم (2) .. برضو اتغطى كويس يابكار !

التقى بكار بصديقه حمزاوى الذى لم يلتقه من يومين ففرح بكار كعادته برؤية حمزاوى وابتسم حمزاوى الذى يحب بكار رغم اختلاف أيديولوجيتهم
بكار: بيعجبنى فيك يا حمزاوى وسامتك وأناقتك وهدوءك و (البندانة) اللى فى إيدك دي، انت عارف يا حمزاوى انهم بيسموها فى الصعيد (حزون) لما الواحدة بيموت جوزها بتحزن عليه وبتربط فى ايدها فتلة صوف سودا أو بتحط حتة جلدة سوده زى اللى أنت لابسها فى إيدك دي، والعيال السيس كانوا بيسموها حظاظة، معتقدين أنها بتجبلهم الحظ .
حمزاوي: إيه يا بكار! احنا هنقعد نتكلم عن البندانة دى كتير وبعدين انت واخد بالك منى كده ليه أنا حر يا أخى ألبس اللى ألبسه إن شالله ألبس طوق فى رقبتى دى حرية شخصية.

بكار: أنت زعلت يا حمزاوى ؟
حمزاوي: لأ مزعلتش بس مش كده خف عليا شوية ولا أقوم أمشى، مش كفاية عليا أحلامك اللى انت قرفنى بيها .
بكار: لأ والنبى يا حمزاوى كله إلا أحلامى ده أنا مبصدق ألاقيك علشان أحكيهالك .

حمزاوي: طب احكى يا بكار وانجز علشان عندى اجتماع فى الحزب النهاردة .
بكار: أنا حلمت امبارح خير اللهم اجعله خير أنى قاعد على قهوة بلدى فى حى شعبى تقريباً فى الجمالية وكنت بشرب حلبة حصى وفجأة ظهر منادى راكباً على حمار وفى ايده طبلة صفيح وخشبة بيدق بيها ع الطبلة وقعد يطبل ويقول: يا أهل مصر اسمعوا واعوا والحاضر يعلن الغايب بيان مارينجوس التامن.
حمزاوي: طويل العمر يزهزه عصره ويقويه على من يعاديه هاى هى .

بكار: إيه يا حمزاوى أنت هتتريق عليا؟!
حمزاوي: أبداً بس فيلم فريد شوقى وفؤاد المهندس كان فؤاد المهندس أول ما بيسمع اسم مارينجوس كان بيقول كده.
بكار: يا حمزاوى مارينجوس بتاع الفيلم كان مارينجوس الأول لكن مارينجوس حلمى مارينجوس التامن فى فرق يا حمزاوى .
حمزاوي: العلم نور برده يا بكار كمل حلمك وأنا هسكت خالص .
بكار: البيان كان بيقول على أصحاب المحلات التجارية عدم وضع مانيكانات فى الفتارين وخاصة المانيكان ذو الرأس والوجه واختيار بدائل للعرض ويتم العرض بصورة أكثر احتشاماً .
وعلى محلات (اللانجرى ) عدم عرض ملابس النساء الحميمة على مرأى الناس لأنها مثيرة للرجال وفاضحة لخصوصيات النساء.
وعلى أصحاب الصحف والمجلات عدم نشر أى إعلانات عنها أو رسمها أو تصويرها وكذلك على القنوات التلفزيونية عدم الإعلان عنها مهما كانت المغريات ومن يخالف ذلك يتعرض للجلد خمسين جلدة ويسرى هذا البيان من الآن والحاضر يعلن الغايب السلطان مارينجوس التامن.
حمزاوي: طويل العمر يطول عمره ويزهزه عصره ويقويه على من يعاديه هاى هى .
بكار: تانى يا حمزاوى هتتريق عليا ؟
حمزاوي: أنا مش قلتلك اتغطى كويس يا بكار .

بكار: والله اتغطيت يا حمزاوى .
حمزاوي: تقريبا كان فيه حتة الغطا مطلهاش .
وقام حمزاوى نافراً من حلم بكار وهو يقول ارحمنى يا بكار أنا تعبت من أحلامك دى مرة قرقوش ومرة ماربنجوس هتحلم بمين تاني .
بكار: هو أنا اللى بختار حلمى أنا عايزنى أحلم بمين إذا كان عليك أنت عايزنى أحلم (بسيرين عبد النور وبداليا البحيرى وبعلا غانم) .
حمزاوي: والله كان يبقى أحسن وأفيدلك يا بكار على الأقل دول مبيصدروش فرمانات زى بتاعتك دي .
بكار: طيب وأنا أحلم بدول إزاى يا حمزاوي؟
حمزاوي: فكر فيهم قبل ما تنام تحلم بيهم يا بكار ومتفكرش فى حاجة تانية فاهم يا بكار؟
بكار: فاهم يا حمزاوى فاهم .
حمزاوي: سلام يا بكار متنساش تتغطى كويس هقابلك الأسبوع الجاى سلام يا صاحبى ! .