أحلام بكار حلقة رقم (22).. اختفاء الإخوان من الوجود!

رن هاتف بكار المحمول وهو نائم وقت الظهيره ففتح عينيه لينظر من المتصل فوجده حمزاوى فابتسم وفتح الخط..
حمزاوى: قلقتك ؟
بكار: ياريت القلق يبقى كله بالشكل ده
حمزاوى: بتعمل ايه ؟
بكار: برد عليك
حمزاوى: ده انت بتهزر كمان
بكار: وليه لأ وانا حالم حلم حاسس انه خير
حمزاوى: طيب ماتنزل تقابلنى وتحكيهولى
بكار: حاخد حمام والبس وانزل اقابلك بس قول لى نتقابل فين ؟
حمزاوى: نتقابل فى السيده زينب
بكار: شى لله يا أم هاشم، فين فى السيده ؟
حمزاوى على اول قهوه فى شارع خيرت وانت داخل من الميدان على ايدك اليمين
بكار: ياساتر حنبتديها بخيرت ؟
حمزاوى: مش كل خيرت وحش وبعدين ماتخدش بالأسماء ده شارع هادى والقهوة كمان هادية
بكار: ماشى ياسيدى ساعة واحدة واكون عندك
( والتقيا بعد ساعة وتبادلا العناق والسلامات وبدءا حديثهما )
حمزاوى: إيه أخبارك وأخبار احلامك ؟
بكار: انا بخير متفائل واحلامى عجبانى وراضى عنها
حمزاوى: طيب احكى يابكار
بكار: انا حلمت اللهم اجعله خير ان الجيش رجع يحكم البلد من تانى وان الدبابات نزلت الشوارع والمدرعات من تانى وان الإعلام رجع اتملا من تانى بالبيانات العسكريه وان مبقاش فيه بلطجة ولا بلطجية والناس بقت مرتاحة وعايشة فى أمان وان الجيش حل أزمة السولار والعيش وغلاء الأسعار وان اوباما زار مصر وقابل السيسى
حمزاوى: عندك عندك، إيه الحكاية امال فين مرسى ؟ فين الإخوان ؟ فين شيوخ الفضائيات ؟ فين الشاطر وبديع والكتاتنى والعريان والبلتاجى وابواسماعيل وابوإسلام والجرمق ده
بكار: اسكت ياحمزاوى لاحس ولا خبر عنهم فى الحلم اكنهم فص ملح وداب ومبقاش ليهم وجود ولا اثر
حمزاوى: تقريبا عقلك الباطن هو اللى كان بيحلم يابكار انت من جواك نفسك الإخوان يرحلو ا ويختفوا من الوجود وانت شايف ان الجيش هو اللى ممكن يقدر عليهم والجيش مهما عمل حيكون ارحم من اللى همه بيعملوه
بكار: وإيه المانع انا عاوز الجيش وبفضله عن حكم مرسى ماشوفناش من ورا حكم مرسى الا الخراب الجيش ماغابش عن المشهد السياسى زى ما الناس فاهمه الجيش بيعيد حساباته من يوم الخروج الامن لعنان وطنطاوى اللى تم بأتفاق مع الاخوان وان مرسى والاخوان يمسكوا الحكم والجيش كان متأكد من فشل الاخوان وتخبطهم وسوء ادارتهم وقال البسهم فى حيطه علشان الشعب المصرى يشوفهم على حقيقتهم وبعدين يعرف ان احنا كنا على حق
حمزاوى : انا معاك الجيش وقف يتفرج ال8 شهور اللى فاتت على اخطاء كتير ساب مرسى يقع فيها هو والإخوان علشان المصريين يعرفوا قيمته وقدر ينفذ المخطط ده كويس والدليل على كده حجم التوكيلات اللى الشعب بيعملها للسيسى لأداره شئون البلاد بدل من الاخوان
بكار: واهه بعد الشعب ماكان بيقول يسقط حكم العسكر بقى يقول يسقط حكم المرشد وبيطالب بعوده الجيش من تانى
حمزاوى: وانا معاك يابكار ان الجيش عمره مابينفصل فى اى بلد عن المشهد السياسى وهو اللى بيكون ملم جيدا بأحوال البلد وهو اللى قادر على حمايتها بس المهم امريكا توافق على الجيش وتتخلى عن مرسى
بكار: الناس مش قادره تفهم ان احنا شئنا او أبينا ان أمريكا هى اللى بتتحكم فى كتير من قرارتنا لا وبتجبرنا عليها من غير ماندرى ده مخطط عالمى مدروس وممنهج ومنظم امريكا هى اللى صعدت الاخوان وهى اللى حتخسف بيهم الأرض لو لقت مصلحتها مع حد تانى
حمزاوى: كل الحروب اللى بتحصل فى الشرق الأوسط والثورات دى تدبير من الغرب وامريكا لأسباب مش خافية عن عاقل ملم بالأمور السياسية الدولية
بكار: ماتسيبنا من السياسة دلوقتى وتعال نشرب سحلب ونسمع ام كلثوم
حمزاوى: سحلب وام كلثوم ؟ ده وقت سحلب ياعم الرايق
بكار: وماروقش ليه ؟ اللى مكتوب مكتوب وحنشوفه بس يارب الناس تكون اتنصحت وفهمت انها مضحوك عليها
حمزاوى: لأ الناس ابتدت تفهم اطمن يابكار
بكار: ام كلثوم بدأت يلا نسمعها
حمزاوى: أمرك ياسيدى نسمع ثومة هو فيه أحلى منها
بكار: بعد كلام ربنا مفيش
حمزاوى: معاك يابكار يلا اطلب السحلب
بكار: أحلى سحلب لأجدع حمزاوى
-طلبا السحلب وراحا يشرباه ويستمعان لأم كلثوم وهى تشدو برائعتها أمل حياتى __