أحلام بكار.. حلقة رقم (19) .. البلتاجى وزيرا للداخلية فى التكية الإخوانية !!

اتصل بكار بحمزاوى الذى كان منهمكا فى تدوينة أو تغريدة له على تويتر إلا أنه فرح باتصال بكار
حمزاوى: خير يا صاحبى
بكار: حاسس إنى محتاج أسمع أم كلثوم معاك على الفيشاوى أو قهوة أم كلثوم فى التوفيقية
حمزاوى: أم كلثوم حتة واحدة وفى الظروف دى؟ ومين اللى بيتكلم بكار السلفى؟
بكار: اللى بيتكلم بكار البنى آدم بكار الإنسان اللى من لحم ودم زيك وله مشاعر
حمزاوى: إيه يا صاحبى انت زعلت منى أنا مش قصدى أنا بهزر معاك اقفل وقبل ما توصل بعربيتك للقهوة حتلاقينى مستنيك هناك وأغلقا الخط
على المقهى التقيا وتعانقا
حمزاوى: تحب تسمع إيه لثومة؟.. ثومة كل أغانيها حلوة
بكار: أسمع انت عمرى
حمزاوى: لقاء السحاب بين أم كلثوم ومحمد عبدالوهاب
بكار: أيوة أنا عارف حكايتها شايف الرؤساء الصح كانوا بيفكروا إزاى مش الرؤساء البطيخ اللى مش عارفين يفكروا خالص
حمزاوى: ثومة ولا سياسة؟
بكار: ثومة
حمزاوى: بتحب أم كلثوم للدرجة دى؟
بكار: ومين مصرى مابيحبهاش؟ أم كلثوم دى زى النيل والأهرامات وريحة المصريين وطيبتهم
حمزاوى: نفسى أسمعها معاك بس لو كانت الظروف غير الظروف كنا حنحس بيها أكتر
بكار: بلاش نديهم الفرصة يسمموا حياتنا أكتر من كده دول ملاعين محرومين سلطة مش دايمالهم
حمزاوى: دول ابتدوا يخرفوا، شوفت البلتاجى بيحلم بإيه؟ بيحلم يبقى وزير داخلية، جنان رسمى
بكار: وخيرت بيحلم يبقى رئيس وزرا ومرسى بيحلم هو والمرشد بدولة الخلافة الراشدة
حمزاوى: المجانين فى نعيم
بكار: على قولك يا حمزاوى صدقت
حمزاوى: انت بقيت خطيب جامع
بكار: أبدا أنا حسيت إنى عاوز أتكلم مع الناس وأنورهم وأبصرهم قلت أقول خطبة الجمعة
حمزاوى: الله يفتح عليك
بكار: عارف البلد دى عايزة واحد زيك يكون رئيس جمهورية بيحب مصر وفاهم سياسة ومش طمعان زى الإخوان
حمزاوى: ما انت كمان فاهم سياسة وبتحب مصر
بكار: أنا محسوب على السلفيين وحزب النور والناس كرهت الأحزاب الدينية بسبب الإخوان لكن انت وضعك مختلف الناس والشباب بيحبوك وبيثقوا فيك
حمزاوى: يا صاحبى حيقولوا طليقته أجنبية ومراته فنانة مشهورة وبالبس حظاظة وبندانة فى إيدى لأ لأ مش حينفع وبعدين أنا راجل بيحب يعيش فى هدوء وراحة بال والرئاسة لا فيها هدوء ولا راحة بال الله الغنى.. البرادعى أحق بيها منى أو حمدين صباحى أو أى واحد قلبه على البلد دى وغير منتمى لأى فصيل
بكار: يلا نسمع أم كلثوم.. ابتدت.. سامع؟
حمزاوى: سامع.. الله يا ست
بكار: حشرب شاى وانت زى عوايدك نسكافيه؟
حمزاوى: لأ شاى معاك
وابتسما وراحا يشربان الشاى ويسمعان أم كلثوم وهى تشدو رائعة انت عمرى