شاهد حظك اليوم الخميس فى وكالة "هريدى نيوز"

يتكون منحوس يتكون محظوظ مع حظك اليوم فى هريدى نيوز:
_برج الحمل:
انت حمل صحيح بس النهاردة لازم تبقى ذئب وانت بتدافع عن نفسك..عندك جاذبية على الجنس الآخر حاسب من الشعاع.
صحيا: من الفول للبصارة يا قلبى لا تحزن ..أكل الفقراء صحى.

_برج الثور:
شغلك وبيتك واللى يقول عليك ثور انطحه ..ما فيش أرشق منك النهاردة.
صحيا: اللحوم حلوة والخضار حلو والصين حلوة.
_برج الجوزاء:
هيجيلك عرض على وظيفة حلمت بيها كتير ..اقبلها فورا وبلاش "تناكة " وحبيبك مالهوش علاقة بأخطائك القديمة.
صحيا: تقدر تساعد ماما فى عيد الأم وما تعملش فيا "عيان".
_برج السرطان:
بلاش تتسرع عشان ما تتكسفش فى الآخر ويتضرب بيك المثل فى الإحراج.
صحيا: لو ما عرفتش إن النهاردة الخميس ولسة مصمم إنه الثلاثاء يبقى لازم تروح للدكتور.
_برج الأسد:
كل يوم معجبيك بيزيدوا .. بس ما تاخدش قلم فى نفسك والموبايل للشغل مش للعب الكورة أو تنور بيه ع السلم.
صحيا: محتاج ترتاح شوية .. جرب تأنتخ وتستحمى.

_برج العذراء:
فيه كوكب اسمه فينوس مش راسى على بر اليومين دول احتمال يعملك مفاجأة حلوة فى الفلوس أو فى الحب.
صحيا: طول عمرك جذاب .. بتستخدم كريم اسمنتكو؟!!
_برج الميزان:
اوعى تسيب شغلك عشان حاجات تافهة..انت اللى هتندم ..ساعد حبيبك واقف جمبه بدل ما يقول عليك ندل.
صحيا : لو أكلت أكتر من 3 مرات مش بس كرشك هيزيد .. مش هتلاقى تاكل الأيام الجاية.
_برج العقرب:
نزاعات وقلق وخوف ..بلاش تقول "مرسى" أو "ميرسى" خلى أيامك تعدى على خير.
صحيا: الماء مفيد للشرب وللاستحمام ولدخول ولا مؤاخذة الحمام ..بلاش تفكر ترشه على حد النهاردة.
_برج القوس:
لما تكون مش فاهم ..حاول تفهم ..خبط دماغك فى الحيط مش هيجيب نتيجة ..أصحابك هيقفوا جمبك ما تضيعش الفرصة.
صحيا: وجع فى الظهر من "الانتخة" وآلام المعدة من "الحش" ع الفاضى والمليان حاول تعيش زى البنى آدمين.
_برج الجدى:
إيه الحلاوة دى ..صعود مبهر فى شغل بس حبيبك مش هيقتنع بوجهة نظرك ما "تنفضش" عشان ما "يهربش".
صحيا: أكل الطبيخ بالليل بيجيب كوابيس.

_برج الدلو:
هات ورقة وقلم وقععد خطط لمستقبلك وحبيبك لما يغير عليك نفضله عشان شكله "أهبل".
صحيا: عادى إنك تتعب بس مش عادى إنك تبلبع كل كمية الأدوية دى ..خف شوية.

_برج الحوت:
عشان تعرف ناس مهمين..هيشيلوا عنك شوية وانت عليك الدور تشيل عن حبيبك بلاش تبقى زى القطط تاكل وتنكر.
صحيا: اشرب حاجة ساقعة وما تفكرش تشرب حاجة ممنوعة بدل ما يتقبض عليك.