شاهد حظك اليوم فى وكالة هريدى نيوز

ياتكون محظوظ يا تكون منحوس.. حظّك عندنا فى هريدى نيوز
_برج الحمل
يا فرحة ما تمت خدها الغراب وطار .. ما تندمش وربنا هيعوض عليك
صحيًا: نفض تعش تنتعش والضغط ما يترفعش
_برج الثور
يمكن تحتاج لوحين تلج لاعصابك واسمع لآراء أصحابك وأهم حاجة الحكومة فى البيت تكون راضية عنك
صحيا: حلو ومتعايق وفر فلوس الريجيم
_برج الجوزاء
ممكن تحقق حلمك النهارده بسبب وجود برج برانى بس اتعلم تكون" مية من تحت تبن " واللى يعمل فيها حمار " غنيله " بحبك يا حمار
صحيا: عينى عليك باردة ..ممكن تلعب "عقلة " لو عندك وقت
_برج السرطان ..
هتخبط على ابواب كتيرة خد بالك من اللى هيفتح الباب وخبط بشويش..شكلك ناوى تجمع العيلة ..اذا خبى الفاكهة فى التلاجة
صحيا : اعصابك تعبانة ومش هتقدر تمسكها واكل الفاكهة اوانه فات
_برج الأسد
تفاءل وسعادة وسكة سفر مع حبيبك خد معاك بطانية وشمعتين وما تفهمنيش غلط ده عشان تأثير النهضة
صحيًا: لو بطلت تشرب قهوة كتير هتبطل تدخل الحمام بالليل كتير
_برج العذراء
اتهور زى ما انت عايز بس ما تلومش الا نفسك ولما تفلس دور فى دفاترك القديمة ..فيه قصة حب فى الطريق بس الحب مع الفقر ما بيكملوش سوا
صحيا: لو مش فاضى تغسل رجليك بلاش تقلع الجزمة
_برج الميزان
حاول تتأقلم مع متطلبات الحياة ..ما فيهاش حاجة لو مديرك قالك تغسله شراباته..وحبيبك اللى تجبه اكله بصارة
صحيًا: غسيل الشرابات وتقشير التوم مفيد لنعومة الايدى و للاظافر
_برج العقرب
انسى انك عقرب وبطل تدور على "الارملة السوداء" اللى كنت بتحبها .ركز فى حب جديد
صحيا: الفاكهة والخضراوات والينسون تساعد فى حل مشاكل القولون
_برج القوس
يا مستنى السمنة من بطن النملة ..عمرك ما هتقلى ..الحق نفسك وخد ديلك فى سنانك
صحيا : ركوب الحصان بالمقلوب لا يعنى انك فارس مختلف
_برج الجدى
الفلوس بتيجى من الحاجات الجميلة وشكلك داخل فى صفقة كويسة ..حب قديم هيظهر ادامك نفضله زى ما نفضلك زمان
صحيا : كتر الشطة ما يجيبش الا الشحططة وقد اعذر من انذر
_برج الدلو
انت دايما جاهز للخناق ..بس المرة دى نأبك هيطلع على شونة وقصة حبك مكملة وعاملة فى قلبك فرح
صحيا : عاداتك السيئة هتطفش حبيبك منك ..الحق نفسك
برج الحوت
اصحابك القدام هيقفوا جنبك بس انت ما تبقاش زى العيال الصغيرة وتشبط
صحيا : اعمل تحاليل والكحول وجاز "دونت ميكس " واسمع كلام مؤسسة الرياسة