سنية وش السعد على سعد

محروس وسنية.. فى الانتخابات الرئاسية

ياعالم ياهوو حد يفهمنى...سنية زمارة القطر اللى مكانش ليها فى السياسة.. بقت ليل نهار تتكلم فيها!!.. سبحن مغيّر الأحوال.. من كام شهر بس كانت تقولى إيه الكلام الفارغ اللى انت شاغل نفسك بيه ده.. وكانت مشغولة بالمسلسلات العربى والتركى والواد مهند.. وفاطمة كمان.. دلوقتى عمّالة تتكلم فى انتخابات الرئاسة ولا ابو العريف فى زمانه..
قلت لها ياسنية طالما بقيتى تتكلمى فى انتخابات الرئاسة يبقى لازم تدرسى برامج كل مرشح عشان تختارى على بيّنة.. ردت عليّا بصوت أقرب لزمارة القطر " برامج ايه يابو برامج...الحكاية مش محتاجة برامج..".. قلت لها امال هتختارى ازاى يا سنية ؟...المرشحين بقوا كتير أوى.. عندك الشاطر والعوّا وأبو اسماعيل اللى بوستراته مغرّقة الدنيا.. ده غير عمر سليمان وأحمد شفيق ود.عبد المنعم أبو الفتوح.. راحت رادّة بكل ثقة.." ولا هنتخب حد فى دول !!"
رحت قايل بصوت عالي "أمال هتنتخبى مين يا سنية يا نور عنية؟".. لكن كمّلت بصوت واطى "هتنتخبى مين يا بعيدة؟".. فجأة صرخت فيا زى الطور الهايج .."بتقول حاجة يا زنكلونى يابن بهية؟"... رديت بسرعة" لا يا حبيبتى.. بكُح بس !!"
سعد سعد.. يحيا سعد!
راحت مكمّلة وياريتها ماكمّلت.." هنتخب سعد الصغير يا زنكلونى.. ده أحسن واحد يبقى ريس !!"..هى قالت كده من هنا..وانا مادريتش بنفسى إلا والدكتور بيفوّقنى من حالة الإغماء اللى جت لى ... وطبعاً بعد مافقت دفعت الزيارة المنزلية بتاعة الدكتور اللى جابته سنية !!.. ورحت قايل لها "سعد الصغير يا سنية؟.. حرام عليكى.. يفهم ايه سعد ده ؟.. وياترى ايه الأسباب والمبررات بقى ؟"..ردت زمارة القطر " أول حاجة حلوة فى سعد الصغير..انه صغير !!.. مش كبير زى الناس التانية.. يعنى العمر قدامه طويل وهيخدم البلد.. "، "وبعدين يا زنكلونى ده كل البشر بيحبوه.. وبيفكرنى كمان بالزعيم سعد زغلول !!"
هنا بقى ماقدرتش استحمل وصرخت" بيفكرك بمين ؟ سعد زغلول؟..أنا كده هيجيلى شلل يا سنية..ازاى يا أم العريف ؟"
ردت .." مش الإتنين كانوا بيقولولهم ..سعد سعد يحيا سعد ؟", " وبعدين سعد الصغير ده مش بيرقص؟.. يعنى احسن واحد يلعب سياسة!! "وبعدين كفاية انه هيوفر العنب لكل مواطن ..وياريت العنب بس..انت ماسمعتوش غنى للبرتقان؟..ولا أغنيته حمرا يا قوطة.. شوف الطماطم بقت بكام النهاردة؟!..وياريتها حمرا زى بتاعة سعد الصغير!!"..ساعتها قلت لسنية زمارة القطر .." ماخلاص ياسنية..نأبك طلع على شونة...سعد انسحب "..راحت سنية راقعة بالصوت الحيانى" يالهو بالى..سعد انسحب؟..."..طبعاً حمدت ربنا ع اللى حصل لحسن لو كل الناس فكرت زى سنية كان زمان البلد خربت.
المهم....فات كام يوم و صحيت يوم الجمعة متأخر مالقيتش سنية فى البيت، مسكت الجرنال لقيت المانشيت الرئيسى فيه "مليونية لعودة سعد الصغير لإنتخابات الرئاسة"..
قلت افتح التلفزيون أشوف ايه الحكاية..اول مافتحت ماصدقتش عنيه...لقيت سنية واقفة قصاد بيت سعد الصغير وهى راكبة حمار ومعاها جماهير من ستات البيوت وبتهتف وتقول "بحبك يا حمار.. ولعلمك ياحمار.. ده انا بزعل أوى لما.. حد يقولك يا حمار!!"
بقلم: عمرو عكاشة
الريس محروس!

من ساعة الثورة والمحروس ما بيقومش من قدام التليفزيون.. بيديها حبة مصارعة حرة وحبة برامج توك شو..اللي ينقط اني لما احب اقول رأيي أو اعلق على كلام الضيف..ألاقيه مقاطعني ويقول: "عشنا وشفنا عصمت بتتكلم في السياسة..انت آخرك تقفي قدام البوتاجاز"!!..طبعا انا اولع وارد عليه: "فيه إيه يا محروس!!..اياك محدش بيفهم غيرك!!"
المهم ان الأيام دي ماورناش حاجة نتكلم فيها غير مرشحين الرياسة.. ودول خمسة وخميسة في عين العدو ما يتعدوش..اتاري بلدنا ولاده صحيح..هما يزيد عددهم من هنا واحنا تزيد حيرتنا من هنا..
بس مكدبش عليكم انا عنية ع المرشحين الكبار.. بس محتارة برضه مين فيهم.. قلت ما بدهاش وسألت المحروس في فاصل اعلاني: " إلا قول لي يا محروس انت ناوي ترشح مين؟"..من غير ما يبصلي راح رادد: "لا يا ناصحة..قولي انتي الأول".. أنا أول ما قال لي كده رحت فاتحة ع الرابع: "بص انا لسه مش عارفه اقرر.. فكرت في.. بس لقيته... وبعدين فكرت في.. بس طلع.. وبعدين قلت ما يضرش..هو حد كامل.. بس بعدين فكرت في.."..راح مقاطعني وهو بيشخط: "حيلك حيلك يا وليه..انتي بالعه راديو..خلاص مش عاجبك حد..محدش قدامك مالي عنيكي..يكون في معلومك ان المرشح التقيل لسه مظهرش!!"..ولعت ورديت: "مين هو يا ابو العريف..ما تفطمنا!!"..لقيته قايم وهو بيتمتم وبيقول: "زي القرع صحيح"!!
المحروس والمحروسة "أم 44"
بقيت آكل في نفسي..لغاية ما في يوم وانا راجعه البيت لقيت الناس اللي في الحتة عمالة تحييني..أي نعم انا علاقتي بالناس كويسة, بس مش لدرجة السلامات في الرايحة والجاية.. محطتش في دماغي.. وأول ما طلعت البيت, مفيش دقايق وسمعت زعاريت, وقبل ما اعرف مصدر الزغاريت كان فيه خبط جامد ع الباب..فتحت لقيت طوفان بشري سحبني لجوه...اشي أهل الحتة على ام المحروس واخواته على ناس عمري ما شفتهم على كاميرات تليفزيون ومذيعين.. مبقتش فاهمة حاجة وانا بغوص في وسط الناس.. وكان فيه هتافات عجب من نوع: "واحد اتنين..المحروس ده وش الخير".."المحروس آهه آهه"..وشويه يفط كبيرة عليها صورة محروس وهو مربع ايديه الاتنين ومكتوب تحته: "المحروس والمحروسه مالهمش غير بعض"!!
مفيش دقايق ولقيت المحروس داخل وهو راكب على أكتاف الناس وبيحييهم بكل ألاطة.. ولا توفيق عكاشة في زمانه.. نزل وهو بيحاول يعدل هدومه.. والمذيع بسرعة وجه له سؤال: "ياريت ياأستاذ محروس تقول لنا برنامجك إيه لمصر"..
راح رادد بعد ما اتنحنح شوية: "اأنا عندي رؤية اقتصادية وسياسية.. مش هاخلي مصر بس ام الدنيا..هاخليها أم 44..عشان الكل يعملها ألف حساب..خد عندك مثلا..امريكا دي هنفرسها..مش هنسمع لها كلمة وهناخد المعونة برضه..أما اسرائيل فهاقفل لها خط الغاز وهخليها تغير بالأنبوبه غصبن عن بوزها..هاعمم الشحن ع الطاير للعيش والسولار..وشعار حملتي: في الغلاسه ماضون لغاية ما نقبض المعلوم"!!
هو قال البقين دول من هنا..والناس اشتعلت تصفيق وهتاف..وانا في وسط ذهولي المغولي, لقيت وشي في وش امه وهي بتقول: "ايه يا عصمت يعني ما سمعتناش زغروته..زي القرع صحيح"!!
بقلم: رانيا صالح