كل سنة وانتى طيبة يا سنية

23مارس..كان يوم من أجمل أيام عمرى...لغاية ما اتجوزت زمارة القطر اللى اسمها سنية..بقى يوم منيل زى وشّها..قال إيه؟..لازم اجيب لها هدية..طب ازاى واحد يجيب هدية لولية؟..هى صحيح أم..بس أم لعيالى..مش أمى أنا..وبعدين أمى أنا كان صوتها حنين...مش زى زمارة القطر..
من يوم ما اتجوزتها وهى مستلمانى..عاوزة هدية فى عيد الأم..وتكون هدية ماحصلتش مش هدية أى كلام..يعنى م الآخر هدية دهب..أقولها منين يا سنية؟..ده المرتب بيطير قبل ما بيدخل فى جيبى..مفيش فايدة...ولا اللى بيدّن فى مالطة..طول السنين الى فاتت جبت هدايا..هى مش دهب صحيح..بس كانت هدايا غالية..إشى طقم صينى بالشىء الفلانى..وإشى طقم اكسسوارات من أبو 200 جنيه..وياريت عجبت..كله مش عاجبها...طبعاً طالما صممت على هدية دهب يبقى لازم أنفذ اللى فى دماغها وإلا يبقى ياويلى وسواد ليلى..
مكانش فيه قدامى الا الموكوس سلكاوى زميلى فى الشغل حلاّل العقد والمشاكل اللى انا عارف ديتّه..مشاريب ببلاش..من كام يوم رحت قايله"الحقنى يا سلكاوى يا خويا..الولية سنية عاوزة هدية.."..راح رادد: "قبل ما تتكلم ..فين كباية الشاى اللى فى الخمسينة؟"...رحت صارخ بأعلى صوتى لعم دسوقى الساعى.."وعندك واحد شاى فى الخمسينة وصلحه للأستاذ سلكاوى..وكمان واحد حلبة حصا ..وفوقيهم قرفة كمان على حسابى".....رد عليا سلكاوى.." كده نبتدى الشغل يا زنكلونى يا خويا..
الصيني يكسب
شوف يا حلاوة..مشكلتك دى حلها بسيط أوى..مش سنية الشهيرة بزمارة القطر عاوزة هدية دهب..خلاص..هاتلها دهب "..رحت صارخ فيه.."ماهو انا يافكيك لو معايا أجيب دهب كنت جبت..انت كده هتخلينى الغى المشاريب يا سلكاوى"..رد " حيلك حيلك ياعم زنكلونى..ماهو انت هتجيب دهب برضه...لكن بسعر حنين..انت ماسمعتش عن الدهب الصينى؟ زى الدهب العادى بالظبط..ومراتك مش هتلاحظ الفرق"..
عنها وسمعت كلام الموكوس ده..وياريتنى ماسمعت كلامه..نزل معايا لواحد من بتوع الدهب الصينى..واشتريت سلسلة ومحبس..وطلعت على أم قردان اللى ماتتسمى سنية..وأول ما دخلت عليها رحت بايس إيديها وانا بقول.." سنية يا حلوة ياأجمل غنوة..عايشة فى قلبى وجوة كيانى..غالية عليا وضىّ عنيا..يا أجمل كلمة نطقها لسانى..اتفضلى يا أجمل أم..هدية عيد الأم !!"..لقيتها مسكت الهدية وفجأة...فتحت باب الصالون ونادت.." تعالى يا خواجة جورج..شوفلى الدهب ده أصلى ولا تقليد..ايه يا زنكلونى..ماتعرفش الخواجة؟..ده صاحب محل الدهب اللى على ناصية شارعنا..ماهو انا مش ضامناك ياروح خالتك"...............طبعاً باقى الحكاية معروف..بس حمدت ربنا...أنا احسن من غيرى....عنبر المستشفى اللى انا فيه مليان حالات أخطر منى بكتير!!
بقلم:عمرو عكاشة
المحروس وعيد الأم!
قلت اعمل ناصحه في عيد الام المره دي..ماهو مش كل مره اجيب انا الهدايا من جيبي وينتهي اليوم والكل فاهم ان المحروس هو اللي جابهم..قلت لازم ادبسه المره دي..اول ما شفته رحت قايله: "بص يا محروس عيد الام السنه دي مش زي اي سنه"..راح مقاطعني: "ماتقوليش!!! لغوه؟!!!"..
- "لا يا محروس..كل ما في الامر انك هتجيب هديتك لامك وانا هجيب هديتي لامي..ولما نروحلهم نفهمهم اننا جايبين الهدايا مع بعض"..
- "ايه يا وليه!! ما ده اللي بيحصل كل مره..ايه اللي اختلف؟!!"..
- "ركز يا محروس..انت اللي هتجيب هدية امك يعني هتشتريها على حسابك..وصلت كده؟"..
- "بقى كده!! فعلا الثورة غيرت اخلاقك..ماشي يا عصمت ماشي"..
بصلي من فوق لتحت ومشي وهو بينفخ..لكن وحياتكم ولا همني..كنت حاسه اوي بنفسي..ومبسوطه اني ركبت دماغي..انا مش عارفه معملتش كده ليه من زمان..
اخدت بعضي ونزلت وسط البلد ادور على هديه..وفعلا اشتريت شنطه حكايه..وكمان كان عليها تخفيض..وقعدت افكر يا ترى المحروس جاب لأمه ايه..بصراحه الفضول تعبني..هموت واعرف اشترى لامه ايه..دورت من وراه في الدولاب..تحت السرير..تحت المرتبه..ولا الهوا..قلت مبدهاش وسألته..ولا عبرني..قلت في عقل بالي يمكن هايديها فلوس..
نزلنا عيد الام مع بعض وهو بوزه شبرين..حاولت الطف الجو ولا الهوا..كبرت دماغي..ماهو لازم يحس على دمه شويه..مش هو يحوشهم على قلبه قد كده وانا اصرف من مرتبي..المهم وصلنا وقدمت الهدية لامي وقلتلها انها هديتي انا والمحروس..ومايلت عليه اوشوشه وبقول: "شايف زي ما اتفقنا اهو..قلتلها انك جايبها معايا"..لقيته بصلي من فوق لتحت وراح مصدرلي قفاه..
الشنطة بتاعتنا كلنا..!
ماما عجبتها الشنطه اوي..وعجبت اخواتي البنات..وكل ما حد يسألني ذوق مين..اقول "انا والمحروس"..وبعد ما قعدنا شويه اخدنا بعضنا وعلى بيت امه..لاحظت انه طالع البيت ومعاه شنطه بلاستيك..قلت في عقل بالي يبقى عملها محروس واشترى هديه..عيني ما اترفعتش من ع الشنطة..هاموت واعرف جاب لامه ايه..مفيش ربع ساعة ولقيته بيقدم الشنطه البلاستيك لامه وهو بيقولها: "على الله يعجبك ذوقي يا ماما"..هي اول ما سمعت الكلمتين دول راحت خابطه على صدرها وقايله: "كفايه طلعتك عليا يا حبيبي..انت ابو الذوق كله..بس ع الله عصمت تتعلم"..اول ما طلعت الهديه..قلبي حسيته وقف ومبقتش عارفه اخد نفسي..والمحروس باصصلي وبيلعبلي حواجبه..نفس الشنطة اللي جبتها لامي!!!
قعدت تقلب في الشنطه وتقول: "يا خرابي يا محروس..دي احلى شنطه جاتلي..يخربيت ذوقك"..وبصتلي وهي بتقول: "شايفه يا عصمت..شايفه الذوق"..هي تقلب في الشنطة من هنا وانا دقات قلبي تحولت لمورستان ولا اللي بيخبط على حلل الومونيوم..وضغطي جاب الرابع وبقيت حاسه بالدخان خارج من وداني..ومع ان الجو لسه برد الا اني كنت حاسه اني قاعده في حلة ميه بتغلي ع النار..ومقدرتش امسك نفسي اكتر من كده..قلت لازم اتأكد..فطلعت جري ع البلكونه واتصلت بامي اسألها فقالت: "وفيها ايه يا عصمت؟!!..الراجل ملقاش وقت يجيب هديه لامه..فوعدني يجيبلي شنطه احلى..ده بدل ما تشكريني اني وقفت جنبك في الموقف المنيل اللي انت فيه..بقى تدخلي على حماتك ايد ورا وايد قدام..اخص عليكي اخص..خليتي وشنا زي السمسمه!!!"

بقلم: رانيا صالح