وردة العرب

وقالولى: تحبَّها.. ..؟
أنا قُلْتِلْهُمْ: عجب ..
وِشّ الأمل والخير..
والعلم.. والأدب.
لو حاسَّه بالسعادة
أو حاسَّة بالغضب
ولا انكتبْش عَنْها
مهما عنْها انكتب
يمكن علشان سمارها
والاّ توبها القصبْ
ورِمْشها السنابل
وشَعرها الدَّهب.
وايّاكم تسألونى
فى الحب عن سبب
دا كفايه يا مصر كنتى
وكفايه يا مصر إنتى
أول شموس الدنيا
وكلمة العرب!!
■ ■ ■
بينى وبينِك حياتى
والنبض اللى ف وريدى.
ياللى دمعك عذابى
وفى ابتسامتك عيدى.
يا بدايتى.. يا نهايتى
ياللى وجودك وجودى
ياللى حدود ابتسامتك
هيه آخر حدودى.
لو ينطق حد إسمك
بيهزنى الطرب
ده انتى عِشقى ورزقى
إللى بعد التعب.
واياكم تسألونى..
فى الحب عن سبب
دا كفايه مصر كنتى
وكفايه يا مصر انتى
أول شموس الدنيا
ووردة العرب..!!
■ ■ ■
أنا عاشقِك بناسِك
بمصنعِك.. بِفَاسِك
بمدفعك.. برايِتك
وبضحكِك وبْحَماسِك
أنا على دين بلادى
أموت وأعلِّى راسِك
لو قاسوا يا مصر قلبى
يِطْلَع على مَقَاسِك.
دا الحب مش أغانى
ولا حِسْبَه.. تِتْحَسّبْ
الحب شمس طالعة
مِش ممكن تِتْحَجَبْ.
وايّاكم تسألونى..
فى الحب عن سبب
دا كفايه يا مصر كُنتى
وكفايه يا مصر انتى
أول شموس الدنيا
وقِبْلِة العرب..!!