المسطول عاجبه كسكسي الثورة

بالبلدى

نزلت ميدان التحرير وشفت الشباب المصري المعتصم واسترجعت ذكريات ثورة 25 يناير وكان معايا صاحبي المسطول في ميدان التحرير في ثورة يناير وامتدادها حاليا ثورة يوليو 2011 وسألت صاحبي المسطول عن رأيه في الثورتين فقال المسطول حأقولك رأيي بصراحة في ثورة يناير شارك الشعب المصري وكان فيه روح للثورة.
في ثورة يوليو رغم أن همه همه المصريين اللي شاركوا في ثورة يناير همه برضه اللي شاركوا في ثورة يوليو إلا أن روح ثورة يناير مش موجودة في ثورة يوليو، ويواصل المسطول تحليله أو كلامه عن الثورتين ويقول المسطول فيه ميزة في ثورة يناير مش موجودة في ثورة يوليو ان ثورة 25 يناير انطلقت بدون قائد وعلشان كده نجحت وكان القائد في هذه الثورة هو الله سبحانه وتعالي اللي استجاب لدعاء ملايين المظلومين المصريين.
واتحدي أي شخص يزعم أنه قائد لهذه الثورة حاتقولي حركات ابريل ويناير وفبراير وأمشير حأقولكم طيب من 3 سنين حركة 6 أبريل عملت مظاهرات في المحلة ولم تنجح في هذه المظاهرة أو هذه الثورة صح ولا مش صح.
نروح لثورة يوليو حنلاقي بدل القائد مائة قائد أغلبهم قفز علي نجاح ثورة يناير بالبراشوات ده غير الصحفيين والاعلاميين المتحولين اللي كانوا مع مبارك وقلبوا اتقلبوا وبقوا مع الثورة ضد مبارك واللي هاجموا الثورة رجعوا أيدوا الثورة والامثلة كثيرة وكل واحد عارف نفسه وكل واحد من الشعب لاينسي والناس المصريين عارفين كويس قوي مين همه المناضلين الحقيقيين والمزيفين.
قلت لصاحبي المسطول يعني مفيش حاجة عجباك في ثورة يوليو 2011 فقال لي لأ فيه حاجة عاجباني فقال المسطول «كسكسي الثورة» تعالي نضرب اثنين كسكسي الثورة وبعد كده نضرب صاروخين ووقفنا أنا وصاحبي المسطول نضرب اثنين كسكسي الثورة.