رأي المسطول في الترقيعات الدستورية

بالبلدى

أنا حزين من نتيجة الاستفتاء وقلت أروح لصاحبي المسطول لاقيته برضه حرين زيي بالضبط ولكن المسطول صاحبي له تفسير خطير عن الاستفتاء قال المسطول «بص» ياعم ولاتزعل نفسك اللي حصل في استفتاء الدستور هاشرحه ليك في صورة بسيطة دلوقتي أنت ناويت تتجوز وقدامك بنتين حلوين تختار منهم واحدة تتجوزها. فقلت للمسطول بص أنا مش عايز اتجوز لاني عندي ظروف فقاللي المسطول صاحبي ياسيدي أقرض يعني وبعديين نبقي نشوف ظروفك اللي منعاك من الجواز دي بعدين. وأكمل صاحبي المسطول كلامه وقال أنت قدامك بنتين واحدة فيهم تم اغتصابها غصب عنها وعملت عملية ترقيع لغشاء البكارة بتاعها علشان تتجوز والبنت التانية حلوةوجميلة زي البنت الأولي بالضبط ولكن غشاء البكارة بتاعها سليم حتختار مين فيهم تتجوزها الأولي ولا الثانية وقبل أن أرد علي المسطول قاللي وده بالضبط يشبه الاستفتاء علي التعديلات الدستورية «بنعم أو لا».. «فنعم»تشبه الفتاة الأولي ولا تشبهه الفتاة الثانية. فقلت لصاحبي المسطول مش فاهم وضح أكتر فقال المسطول إن نعم وهي الفتاة التي تم ترقيع غشاء بكارتها ولا هي الفتاة اللي غشاء بكارتها سليم ما حدش قرب منها فقلت للمسطول بس أغلبية الشعب قالوا نعم بقيادة حزب الاخوان المسلمين والاقلية قالوا لا وهم شباب ثورة يناير ومعهم المثقفون والفاهمون لوضع التعديلات الدستورية. فقاللي المسطول إنت حتختار مين ولاقوللي إيه الظروف اللي منعاك من الجواز فقلت للمسطول «أصلي أخذت العزاء في النص التحتاني مني فقال المسطول إيه اخذت العزاء في نصك التحتاني أمال عايش ليه ياعم روح موت ده انت حالتك أصعب من البنت الأولي اللي رقعت غشاء بكارتها وأصعب من البنت التانية وأصعب من نعم ولا بتاعت التعديلات الدستورية واللي بالبلدي كدة فازت فيها الاخوان المسلمين واحد صفر علي شباب ثورة 25 يناير اللي كلهم قالوا لا ولكنهم اتهزموا رغم ان الثورة انتصرت!!؟
وجاي تقوللي إنك حزين علي التعديلات الدستورية ومش حزين علي نفسك وحاتلك.