رئيس جامعة القاهرة على «فيسبوك»: لو حد عمل بنصايحي وسقط هقول حسابي مزيف

الخشت: جربوا تذاكروا وتريحوا شوية بموسيقى عمر خيرت ونشوف النتيجة إيه
وجه الدكتور محمد عثمان الخشت رئيس جامعة القاهرة كلمة للطلاب، قائلا: "عاوز أقولكم إني وقت لما كنت طالب زيكم كنت بذاكر كويس جدا وبلعب كويس جدا، ولم يكن هناك تعارض بين المذاكرة واللعب، وكان اللعب بيجدد نشاطي وبيعمل restart لذهني".
وأضاف الخشت على صفحته الشخصية في موقع "فيسبوك": كنت بلاقي إن استيعابي بقى أفضل، والضغط العصبي بقى أقل، خاصة إن الضغط العصبي بيزيد عليك لو كنت تنافس على المركز الأول على الدفعة، وتساءل "إيه رأيكم تجربوا تعملوا زي ما كنت بعمل، وتعملوا Restart بحفلتين ورا بعض للموسيقار عمر خيرت، واللي يحضر واحدة لا يحضر الأخرى عشان يعطي فرصة لبقية زملائه، وطبعا الحفلتان مجاني، ولو حد باع التذاكر على القسم على طول".
وقال رئيس جامعة القاهرة "طبعا أنا عارف إن في نوعين، نوع هيقول شايفين أهو رئيس الجامعة كان بيلعب ودول أنا عارفهم كويس أوي، اللعبية اللي مبيذاكروش غير آخر السنة ودول إن شاء الله سوف أحولهم مكتب، ونوع هيقول احنا هنذاكر فقط لكن أنا بقولكم جربوا تذاكروا وتريحوا شوية بموسيقى عمر خيرت ونشوف النتيجة هتبقى إيه، علشان احنا دلوقتي بنغير طريقة التفكير وماشين بمبدأ الإدارة بالنتائج وصواب أي فكرة بنتائجها على أرض الواقع، وربنا يستر، لو حد سقط على طول هقول الحساب ده fake" في إشارة لحسابه على فيسبوك.
وأوضح الخشت أن الحفل الأول للموسيقار عمر خيرت تنظمه الجامعة في 25 ديسمبر الجاري في الساعة السابعة مساءا، وفي اليوم التالي في نفس الموعد، مؤكدا أن الدعوات مجانية برعاية الشباب والمدن الجامعية بمناسبة مرور 110 عاما على إنشاء جامعتنا العريقة.