الحوسة

أعتقد أن كثيرين سيعترفون مثلي بكم الحوسة التي وجدت نفسي غارقة فيها .. قد يكابر البعض مدعيا أنه كان عارف كل الحاجات و فاهم كل الكلام .. و خلوني أحكيلكوا ..
الولاد نازلين عادي في مظاهرة .. عارفينها احنا المظاهرة دي .. شفناها كتير في التليفزيون .. الولاد مش بخير .. المظاهرة ماعدتش بسلام .. الولاد متحاصرين في التحرير و بينضربوا .. الولاد رجعوا بالليل و بيحكوا عن اللي حصل .. كنت أيامها قعيدة الفراش لا أتحرك .. بدأت أتابعهم علي كل الوسائط .. فيسبوك .. تويتر .. ميل .. موبايلات .. أرضي .. كله ..
الولاد نازلين تاني بكرة .. و توالت الأحداث .. تفاقم الموضوع و تحول مع الأيام إلي كم من المعاناة و البكاء والغضب و الهتاف و الإصرار .. لحد فرج ربنا .. و لكن ..
بدأت أشعر أن الموضوع محتاج شوية اطلاع .. هو إيه الفرق بين المظاهرة و الاعتصام و الاحتجاج و المسيرة الصامتة او الناطقة و التجمهر والوقفة ..
يادي الخيبة .. هات يابني الكتب اما نشوف أحسن نعك في التوصيف ..
بدأت أراجع معلوماتي .. و ما إن بدأت أفهم و أميز الفرق إلا و انهالت علي الحوسات الواحدة تلو الأخري ..
ده فيه كلام كبير قوي بيتقال .. شعرت أني تخلفت عن الواقع أو مسايرة التغيرات التي تحدث .. و لكن لأني قعيدة فقد بدأت الأسرة و الأصدقاء يجتمعون عندي .. أول واحدة انطسيت فيها كانت حكومة التكنوقراط .. كله بصلي وسألني .. يعني إيه .. هه .. طبعا .. جايه حالا .. كات هنا من شوية معرفش خفست راحت فين .. ثانية واحدة اقوم آخد الدوا .. و اختفي داخل الدولاب لأفتح الكتاب .. يعني إيه تكنوقراط .. إنتي فين .. حالا .. انتي بتعملي إيه جوه الدولاب .. ههه .. تصدق بجيب الروب قامت الضلفة قفلت عليا .. طب تعالي تعالي .. طلعناها من عالنت .. ياراجل .. مانا كنت عارفاها ..
ثم توالت .. و انتشرت .. و تشعبت .. وتوغلت .. اللطيف في الموضوع أني وجدت معظم اللي حواليا لايصين نفس اللوصة .. استني يابني اما نشوف الحكومة الائتلافية دي عاملة ازاي .. غير الانتقالية و الا ولاد عم .. خلينا في تسيير الأعمال .. لا دي سهلة دي .. طب ايه الفرق بين التعديلات الدستورية و الإعلان الدستوري .. اقولك انا ماهو لما .. استني استني .. هو تنحي و الا تخلي و كلف والا فوض و الا عين .. آه فيه فرق .. لأن مش مفروض يتنحي .. ده موظف يبقي يستقيل .. ليه يا عم ماهو عبدالناصر تنحي .. لا ده قيفها ساعتها كده .. الله .. طب لو تخلي يبقي كده لسة رئيس و الا خلع .. ماهو كلف النائب .. ماهو النائب برضه اتخلع .. شوف ..
استنوا استنوا .. إيه .. نرد كلنا كأننا شوية عيال ملمومين نذاكر مع بعض ليلة امتحان الثانوية العامة .. لقيتلكوا واحدة بقي لازم نفهمها .. مين عارف الفرق بين اللجوء السياسي و الديني و الجنسي .. وده وقته .. مش جاية دي علينا الايام دي .. ماحدش فتح موضوع اللجوء ده .. خلينا في الأهم .. أحسن كده حانلوص .. و بعدين الواحد برضه قيما و سيما لو اتسأل و ماعرفش يجاوب يتفقس ويتفضح .. طلع الصفحة بتاعة الإقامة الجبرية و تحديد الإقامة و المنع من السفر و قوائم ترقب الوصول ..
قل لي يا هذا .. ما هو تجميد الأرصدة و ماهي شروط استعادة الأموال المهربة .. و ما الفرق بين المحاكمة المدنية والعسكرية و متي تقام محكمة الثورة ..
أياميها كانت المدارس و الجامعات معطلة .. لكن في بيوت كثيرة كان فيه دروس خصوصية و لجان امتحانات ومراقبين و كله .. و الشهادة كانت انك تكون علي مستوي الحدث .. و فاهم البلد بيحصل فيها إيه ..
و كنت افتح التليفزيون ألاقي يا خويا العيال بتوع الثورة دول فاهمين كل الكلام .. و فاقسين كل الفقاقيس .. الله .. إشمعني الواد ده عارف الفرق بين المجلس العسكري و المجلس الرئاسي واللجنة التأسيسية .. الواد ده أنا شاكة فيه .. ده حافظ الدستور صم .. الواد ده صمام و بتاع علوم سياسية .. ما كلنا خدنا الدستور في المدارس .. مش فاكرين منه إلا الغلاف .. ولا علوم سياسية ولاحاجة .. ده شاب عادي بس مذاكر .. طب ذاكر ذاكر لا نتفضح .. عشان نفهم بس بيقولوا ايه و نعرف حانخش أنهي حزب .. هات يابني تعريف الليبرالي والعلماني و الفرق بين السلفي والصوفي والإخوان و الجهاد ..
من مزايا الثورة أنها جعلتنا كلنا ناخد دكتوراة في السياسة عندما فوجئنا بالمستوي الثقافي و السياسي للثوار .. فوقونا .. ذاكرنا بجد لما اتفحتنا .. ماحنا ماكناش مهتمين .. ماكانتش بتاعتنا .. كنا نقول يعملوا اللي يعملوه بقي .. ماهم سادينها في وشنا من كل الطرق .. حتي السياسيين القدام كانوا بيطلعوا يقولوا كلام مجعلص يجيب تشنج في عضلات الرقبة و تهدل في زوايا البق المفتوح مصحوبا بعلامات الهبل ..
و لن أطالب بأن تدخل السياسة في المناهج الدراسية .. هي العيال حاتذاكر ايه و الا ايه .. كل المطلوب أن نجعلهم يحبوا هذا البلد و يصدقوا إنها بتاعتهم .. و نسمح لهم بالتعبير والانخراط في الأنشطة .. و يعبروا ' بكل الأدب ' عن رأيهم .. و هم متأكدون أنه سيسمع .. ساعتها لن يواجهوا الحوسة اللي احتسناها دي .. بس الحمدلله ربنا ستر .