حالة حوار

حالة حوار
تقديم : دكتور عمرو عبد السميع
تاريخ الحلقة : 7 أغسطس 2010
د/عمروعبدالسميع :مساء الخير وأهلا بكم في حالة حوار ثقافة الانتماء حلقات خاصة من هذا البرنامج نستضيف فيها رموز السياسة والاقتصاد والأدب والفنون والرياضة والإبداعات في كل المجالات لنجيب فيها عن سؤال يعني أية كلمة وطن ويعني أية الرابطة التي تشدنا لهذا الوطن ضيفي اليوم موسيقار كبير مزج بين قواعد التأليف العلمي للموسيقي في الغرب وما بين روح الشرق اسمعوا له كويس هيكلمكم عن تأثير الموسيقي في هندسة وجدانات الشعوب هيكلمكم عن الأغنية الشعبية والأغنية الوطنية هيكلمكم عن عناصر التي تشكل مزاج الشباب الغنائي والموسيقي هيكلمكم عن الانتماء ولكن من بوابة جديدة جدا الانتماء بالمزيكا ويا أيها الشاب الجميل حب بلدك حب وطنك ده الحب بعدة مستحيل . اسمحوا لي أولا ان أرحب بضيفي وضيفكم الكبير الأستاذ الموسيقار والأستاذ عمر خيرت وأرحب بأبنائي وبناتي شبات وشباب مصر أهلا وسهلا بكم
د/عمروعبدالسميع :أستاذ عمر تخيل بقي ان سؤالي الأول هو عن اللي حصل دلوقتي عن هذه المقابلة المتحمسة العاطفية من الشباب لمجرد ذكر اسمك الحقيقة وأنا بأبعد لهذه الحلقة وكنت أتصفح شبكة المعلومات العنكبوتيه الانترنت وكتبت على مؤشر البحث عمر خيرت فلقيت 270 الف موقع وعنوان يتعرضوا لعمر خيرت
أ / عمر خيرت : ما شاء الله
د/ عمرو عبد السميع : أما دراسات نقدية وكلام عنك وأما موسيقاك بشكل مباشر وشوفت أيضا روابط الفيس بوك اللي الشباب ينضم إليها حول اسم عمر خيرت حوالي 50 ألف شاب تفسيرك لهذا الارتباط بين وبين الشباب أيه
أ / عمر خيرت : طبعا بشكر ربنا على الهدية الجميلة دي ان حب الناس للفنان ده شيء ما بعده شيء في الدنيا يعني ودي هي الجائزة اعتقد الكبرى اللي ممكن أي فنان ينالها حب الناس والجمهور فده الحقيقة يسعدني فوق الوصف
د/ عمرو عبد السميع : بالقطع يعني ان رابطة الفنان بالجمهور رابطة تسعده وحماس الجمهور للفنان مسئلة تسعده ولكن ما أسئل عنه في الحقيقة هو الارتباط بينك وبين الشباب على وجه التحديد يعني أنا لما بشوفك في الأوبرا أو في ساقية الصاوي أو في بعض الحفلات المتناثرة هنا أو هنا بلاحظ هذا الارتباط بالذات مع النوع اللي بتقدمه من موسيقي جي منين ده
أ / عمر خيرت : اعتقد تعطش الشباب لحقائق معينة في الدنيا يعني عن طريق الفن طبعا هو الظروف العامة والاقتصادية للحياة اللي بنعشها كلنا يعني لها تأثير قوي على الشباب يهيئ لي يعني أما يلاقوا أي بصيص من شيء يعني جاد أو شيء في صدق يلتفوا حوله
د/ عمرو عبد السميع : يعني معني الجدية أو حضور معني الجدية في موسيقاك هو اللي يعمل هذه العلاقة مع الشباب ولا تعبيرها عن مشاعر بعينها جواهم
أ / عمر خيرت : لأ تعبيرها عن مشاعر بعينها
د/ عمرو عبد السميع : اللي هي أيه
أ / عمر خيرت : احتياج الشعور بالراحة النفسية دي ممكن الموسيقي تديها للناس الشعور بحب الناس حب مصر حب المجتمع ممكن الموسيقي برضه تديه للناس بدون ما يشعروا يعني ميبقاش شيء موجه لو أنا مثلا رسمت خطة ان اعمل كده أنا دي حاجات تيجي من عند ربنا وبتكون الحمد لله صادقة من ناحيتي فتقابل بنفس المشاعر يعني
د/ عمرو عبد السميع : شوف بقي حضرتك أسلمتني الى حتة عتبه لموضوع مهم جدا جدا اللي هو لما الشباب يحس بهذا الانفعال أو بهذه الراحة مع نوع الموسيقي اللي أنت بتقدمها له طيب ليه ميديش نفس الاستجابات لأنواع أخري من الموسيقي
أ / عمر خيرت : ما هي الموسيقي شقين يعني في موسيقي تخاطب الوجدان وتخاطب الروح وفي موسيقي تخاطب الغرائز والجسد
د/ عمرو عبد السميع : أزاي تخاطب الغرائز والجسد يعني اللي هي تخلي الواحد يرقص يعني
أ / عمر خيرت : يرقص يعني في البالية ما هو الرقص
د/ عمرو عبد السميع : ما لسه كنت أقول لحضرتك طيب ما البالية رقص برضه
أ / عمر خيرت : في رقص غير بالية بقي رقص يبقي همجي شوية وفي نوع من اندماج غير طبيعي بين الإنسان وجسمه مع اللي بيعمله دي ويبقي له عوامل أخري بيشد لحتت تانية يعني
د/ عمرو عبد السميع : يعني حضرتك عاوز تقول ان الموسيقي اللي فيها إفراغ لهذه الطاقة الروحية عند الشباب هي الموسيقي الجادة الراقية الشباب ميال لها ومش ميال الى الموسيقي الغرائزيه الأخرى اللي بتخاطب الجسد طيب احنا بنشوف في حالات معينة ده مبيحصلش
أ / عمر خيرت : ما تقدرش تقول ان ده مسلم به 100% وإلا الناس بتوع البيزنس ما يشتغلوش
د/ عمرو عبد السميع : بقت تجارة الحكاية قوي
أ / عمر خيرت : طبعا
د/ عمرو عبد السميع : أزاي
أ / عمر خيرت : هي الحاجات اللي خصوصا الكلبس وبقت مرئية كمان يعني الموسيقي لوحدها كانت قبل ما يخترعوا الفيديو كليب والحاجات دي كان في أنواع من الموسيقي منها اللي أنا أتكلمت عله دي إنما في الوقت الحالي بقي في عالم مساعد اكبر للممنوع المرغوب يعني اللي هو الأشكال اللي بنشوفها طبعا عن طريق الموسيقي والغناء والموديل اللي بيظهروا وده طبعا بيثير الناس ويشد ويجيب فلوس
د/ عمرو عبد السميع : خليني أحاول توصيف الموسيقي اللي حضرتك بتقدمها وصححني قولي أنا بتكلم غلاط ولا بتلكم صح يعني احنا شيفين ان هناك مزج بين القواعد العلمية للتأليف الموسيقي كما يعرفها العالم الغربي أو كما تعرفها الموسيقي الغربية وهناك أيضا الروح الشرقية حاضرة وبشكل كبير جدا شوفناك بتعمل ده في عدد كبير جدا من المتواليات الموسيقية إذا جاز التعبير بل شوفناك أيضا رافد من روافد نهر عائلي له علاقة بهذا يعني أبو بكر خيرت عم حضرتك اللي كان مهندس معماري كبير قوي قوي يا أولاد وهو اللي أسس الكونزلفتوار في مصر له اسطوانات كان عملها زمان مع وزارة الثقافة
أ / عمر خيرت : سينفونيات
د/ عمرو عبد السميع : لكن كمان في توزيعات لألحان شعبية زى لحن أيه العبارة مثلا بتاع سيد درويش كان عامل له توزيع اوركسترالي
أ / عمر خيرت : ولما بد يتسني
د/ عمرو عبد السميع : وخلط ما بين قواعد التأليف الموسيقي عند الغرب وروح الشرق أنت بتعمل ده هل الشباب قادر على استيعاب الصيغة دي ولا هو يميل الى تبسيط أكثر يعني عاوز موسيقي غربية أو موسيقي شرقية
أ / عمر خيرت : لأ هو إذا كنا أتكلمنا عن أد أيه الحمد لله في جمهور وفي ناس بتسمع الى شغلي أنا أنا تلميذ الرائد ده أبو بكر خيرت والاتجاه اللي هو اتجه بالظبط زى حضرتك ذكرت انه أزاي نصل بموسيقانا الى العالم عن طريق العلم مع الحفاظ على روحنا الشرقية هو عمل الأمثال دي بالإعمال السيفونية اللي عملها أنا نفس الشيء في شغلى يعني دائما تلاقي روح مصرية أو شرقية في أعمالي غصب عني لأني أنا أتولدت وعشت هنا ودرست الموسيقي
د/ عمرو عبد السميع : بس لما درست ما هو علمك بروفسور كارو الطلياني ودرست بعد كده في لندن يعني مفيش المؤثر الشرقي ده يعني حاضر يعني
أ / عمر خيرت : لأ يعني لازم يبقي جوايه والا مش هينفع ما هي الفكرة كده يعني أنت مصري مولود هنا واتعلمت العلوم زى الطب زى الهندسة
د/ عمرو عبد السميع : ملحنتش الحان شرقية كح
أ / عمر خيرت : بمعني
د/ عمرو عبد السميع : يعني شرقية خالص يعني مفيهاش هذا اللون من التأليف الموسيقي الغربي
أ / عمر خيرت : آه أصل لو هو شرقي يبقي لحن فقط خط لحني واحد إنما الفكرة هي اكبر من كده بكثير جدا يعني مع جمال هذا اللحن اللي عيشنا علية مع العظماء الملحنين الكبار بتوعنا كلهم يعني إنما يبقي ان ده يبقي بدائي شوية موسيقانا بتعتمد فقط على اللحن والإيقاع مفيش علوم الهرموني اللي بتدي الثراء
د/ عمرو عبد السميع : التوافق الصوتي
أ / عمر خيرت : التوافق الصوتي اللي هي بتدي يعني ربنا خلق الأذن
د/ عمرو عبد السميع : في حاجة اسمها الهرموني وحاجة اسمها الكونتربص
أ / عمر خيرت : الكونتربص دول يدوا أبعاد ثلاثية للسمع السمع مش بس مونوا
د/ عمرو عبد السميع : مش نغمة مفردة مونوا
أ / عمر خيرت : آه يعني تسمع صوت واحد وإيقاع والمطرب يقول نفس الحاجة وهذا العدد الغفير من الموسيقيين قعدين يقولوا نفس الموضوع من هنا كانت
د/ عمرو عبد السميع : اللي هي كانت والله زمان زمان والله
أ / عمر خيرت : فمن هنا جاءت الفكرة للرائد أبو بكر خيرت مش الفكرة هو حب يشتغل أزاي منبقاس احنا زى العالم كله عندنا قوالب موسيقية كمان الى جانب الغناء لان دي ان احنا حياتنا انصبت من القديم على الغناء فقط وده برضه نوع لبلد عندها حضارة
د/ عمرو عبد السميع : طيب أنا عاوز أسئل من خلال الكلمتين دول مجموعة المؤثرات المباشرة اللي شكلت الوجدان الموسيقي لمبدع اسمه عمر خيرت يعني تحكيلهم بتسمع مين وتسمع أيه وبتسمعه أزاي وبعدين درست أيه واهتميت بمين بالتحديد من الموسيقيين الغربيين من الكبار كده كده
أ / عمر خيرت : آه يعني هو مبدئيا لازم يكون ربنا سبحانه وتعالي مدي موهبة والا مش هينفع أي شيء من الأول وأنا من حظي اتوجدت في أسرة محبه جدا للفنون من أول جدي لحد أبويه لحد وجودي أنا واهتمامهم بصدق وحب لجيل كبير من الفن فجدي محمود خيرت ده كان محامي وكان شاعر وكان أديب وموسيقي وفنان تشكيلي
د/ عمرو عبد السميع : أكاديمية الفنون
أ / عمر خيرت : شغلانه وكان بيته في شارع خيرت اللي هو مسمي باسم جده أو أبوه لان كان في صالون دائم للفن في هذا البيت أسبوعيا
د/ عمرو عبد السميع : عارفين شارع خيرت اللي يصل ما بين ميدان لاظوغلي وبين المبتديان
أ / عمر خيرت : بالظبط يحضره سيد درويش ومحمود مختار المثال والمنفولطي الأدب ومحمد حسن الفنان التشكيلي ناس أئمة الفن في ذلك ومما يذكر ان أم كلثوم وعبد الوهاب أول ما يلتقي كانوا في البيت ده وغنوا قدام سيد درويش جزء من العشرة الطيبة أوبرت
د/ عمرو عبد السميع : أوبرت العشرة الطيبة
أ / عمر خيرت : فده يوريك البيئة اللي أنا وبعدين أنا مكنتش معاهم طبعا
د/ عمرو عبد السميع : لكن الأجواء وانعكاساتها تفضل مستمرة
أ / عمر خيرت : تفضل مستمرة الى جانب ان والدي كمان وهو مهندس معماري وعازف بيانو جيد جدا وتعلم أصول لان جدي محمود خيرت أصر انه يعلم ولادة الفنون ومنهم الدكتور عمر خيرت اللي أنا اتسميت على اسمه ده فتوجرف من أحسن من الفتوجرف في العالم
د/ عمرو عبد السميع : مصور فتوغرافي
أ / عمر خيرت : آه ومن ضمن العشرة الأساسيين في اللندن صالون يعني يبقي في عشرة من أهم عشرة في التصوير الفتوغرافي اللي يتوفي منهم يجي واحد بداله يعني دائمين فشوف تفكير الجد أو ان هو أد لأولاده الفرص ان كل واحد يلاقي موهبة برع أبو بكر خيرت في الموسيقي الى جانب الهندسة
د/ عمرو عبد السميع : طيب أنا أوقف حضرتك هنا دقيقة واحدة علشان أكلمك عن العلاقة بين الهندسة بالذات وبين الموسيقي بالذات احنا بنشوف بره مثلا دراسات نقدية كثيرة تتعمل على الموسيقي الكلاسيك فيقل لك مثلا ان موسيقي سبستيان بخ عمله زى العمارة الباروك مثلا أو موسيقي فلان عمله زى شكل أخر من أشكال المعمارية في علاقة
أ / عمر خيرت : أكيد في البناء
د/ عمرو عبد السميع : يعني أنا شايف ان أقاربك كلهم كانوا مهندسين ودخلوا على الموسيقي ودخلوا على عزف البيانو
أ / عمر خيرت : في التأليف الموسيقي زى البناء المعماري تقريبا
د/ عمرو عبد السميع : مزيكتك فيها أي لون من ألوان العمارة
أ / عمر خيرت : مش عارف تصور مفكرتش
د/ عمرو عبد السميع : فكر فيها دلوقتي معايا
أ / عمر خيرت : أقول أيه زى بيوت بتاعة الدويقة مثلا
د/ عمرو عبد السميع : لأ على العكس الحقيقة ده احنا بنشوف أنها منظمة جدا ولها منطق جدا ولا فكر جدا بشكل يجعلها بعيده جدا عن الدويقة هنقبلها كنكته يعني
أ / عمر خيرت : هي الحقيقة موسيقي بحاول اعبر عن مصر بعيدا عن العمارة لان العمارة عندنا تشوهت في الأشكال اللي بنشوفها حتي مش ضروري الدويقة أي منطقة يعني المهندسين
د/ عمرو عبد السميع : خليط من أنماط معمارية متنافرة ولا تعبر عن شيء وليست جزءا من الثقافة الوطنية بأي حال من الأحوال الى آخرة يعني
أ / عمر خيرت : بالظبط بس أنا بتكلم في البناء في الأصل مش بس الشكل فكرة البناء يعني البناء الموسيقي فيه توافق كبير بينه وبين البناء المعماري
د/ عمرو عبد السميع : يعني أنا كنت بشوف في فيلم سينمائي شهير جدا أسمة اماديس عن اماديس موتسرت الموسيقار الشهير انه كان بيألف أحيانا الموسيقي بتعته بفواصول زمنية تساوي ضرب كورة البلياردوا في أضلاع المائدة ودائما باستمرار بيعمل المزيكا على المسافة دي أو على السرعة دي يظبط
أ / عمر خيرت : ده في عمل من الأعمال يعني
د/ عمرو عبد السميع : في عمل من الأعمال اذن القصة فيها نوع من المقاربه ما بين الشكل الهندسي ده أو مابين المسافة والزمن والحقائق دي وما بين الموسيقي و تأليفها الإبداعي طيب نرجع تاني لحكاية العائلة كمل لي
أ / عمر خيرت : أتولدت وقراءت عن الحاجات دي وسمعتها من أبويه وكنت وأنا طفل من خمس سنين عاوز اقعد على البيانو وده اللي شد انتباههم إني بشوف أبويا يقعد قبل ما يروح شغله الصبح يقعد يعزف شوية حاجات بقي لموتسرت وبخ
د/ عمرو عبد السميع : فاكر أوائل الحاجات اللي لعبتها كانت أيه
أ / عمر خيرت : أنا أول حاجة طلعتها كان جزء من السينفونية الثانية لابو بكر خيرت اللي كان أبونا ياخدنا نشوف الأوبرا القديمة بقي نحضر الكونسرات اللي كان بيعملها
د/ عمرو عبد السميع : في عدد من المؤلفين المصريين في الفترة دي بيألفوا تأليف اوركسترا لي جمال عبد الرحيم أبو بكر خيرت الخ
أ / عمر خيرت : عزيز الشوان ويوسف جريس
د/ عمرو عبد السميع : وكان في ناس تطوع النغمات والإيقاعات الشعبية علشان تعمل بها أعمال ذات طابع اوكسترالي حتي سليمان جميل لما عمل فرقة الآلات الشعبية عمل بعض الاسطوانات اللي بتتعامل مع الإيقاعات اعقد بكثير من الشكل الساذج أو البسيط اللي هي بتطلع به اتفضل
أ / عمر خيرت : فكان جزء من السنفونية الثانية لابو بكر خيرت في الوقت ده شد انتبها أبويه باستمرار أنا كنت اقعد ولما يقوم هو أنا اقعد أحاول اللي أنا سمعته ده أطلعة بودني على حظي ان جه الكونزلفتوار أسس سنة 59 فتقدمت ضمن أول دفعة تدخل المعهد ومن هنا كانت البداية واستمر ده مع الدراسة طبعا
د/ عمرو عبد السميع : أية بقي التطلعات اللي كانت عندكم كطلبة أيام ما كنتم في الكونزلفتوار دراسة جديدة ومجال جديد يتفتح قدام الناس في مصر وأكيد فهم متباين عن الطلبة زملائك وأنت كان أيه نوع الحوارات اللي دائرة بينكم
أ / عمر خيرت : يعني طبعا كنا صغيرين على مسئلة الحوارات دي بس بنسمع الكلام وخلاص يعني تروحوا تاخذوا السبت أو الخميس درس اللي هو القراءة والكتابة و كان
د/ عمرو عبد السميع : قراءة النوته يعني
أ / عمر خيرت : وكان معظمهم اغلبهم أجانب وطبعا كان الجو شياكة شوية أنا مكنتش في مدرسة عربي
د/ عمرو عبد السميع : عاوز تفهمني ان الجو دلوقتي مبقاش شياكة شوية
أ / عمر خيرت : لأ للأسف آه الكونزلفتوار
د/ عمرو عبد السميع : بقي أزاي
أ / عمر خيرت : لأ وحش جدا
د/ عمرو عبد السميع : يعني أيه و حش جدا متقول يعني أيه
أ / عمر خيرت : لأ المبني مش مظبوط مش نظيف غير اللي أنا شفته خالص
د/ عمرو عبد السميع : ومضمون الدراسة
أ / عمر خيرت : اختلف لأنه زى أي حاجة بتحصل يعني فاهم قصدي أزاي بس هي الفكرة الجملية ما زالت موجودة أدافع عنها شوية معلش بعد أذنك يعني
د/ عمرو عبد السميع : لأ ل أتفضل أنا مش ضد
أ / عمر خيرت : طول ما هذا الصرح موجود أذن في أمل من وجه نظري كبير قوي لحياتنا
د/ عمرو عبد السميع : رحت درست لطلبة الكونزلفتوار
أ / عمر خيرت : لأ أنا معرفش ادرس أبدا
د/ عمرو عبد السميع : ليه
أ / عمر خيرت : دي موهبة ثانية خالص
د/ عمرو عبد السميع : موهبة تانية طيب كمل
أ / عمر خيرت : كان هو الوقت دي زى ما بحكي كل حاجة نظيفة وتبرء وشياكه وبتاع أنا كنت من النوع يعني ده اللي خلاني مؤلف موسيقي واقدر اعمل حاجات تانية أنا مش بيقلقني شوية الجو المنظم زيادة عن اللزوم ده فاهم قصدي أزاي أحب العب برضه مع أصحابي وروح الملعب
د/ عمرو عبد السميع : كنت بتلعب أيه مع أصحابك
أ / عمر خيرت : كورة
د/ عمرو عبد السميع : كنت تلعب في مركز أيه
أ / عمر خيرت : لأ ده في الشارع
د/ عمرو عبد السميع : ايوة كنت بتلعب في مركز أيه
أ / عمر خيرت : في كل حته
د/ عمرو عبد السميع : مهاجم حارس مرمي
أ / عمر خيرت : والله زى ما يجي لأ مش حارس مرمي وشوية كانوا عاوزني ابقي حارس مرمي في النادي الأهلي
د/ عمرو عبد السميع : الحمد لله كان النادي الأهلي ضاع يعني
أ / عمر خيرت : ده في سن عشر سنين يعني مش حارس مرمي أيام عبد الجليل وعادل هيكل
د/ عمرو عبد السميع : عبد الجليل ده كان حارس أسطورة في النادي الأهلي زمان قوي قوي
أ / عمر خيرت : فانا كان يعجبني عبد الجليل بقي يعني أنا كنت عاوز ابقي كده فكان الجو العام في الكونزلفتوار في أبو بكر خيرت بقي شخصية من الناس بتاعت زمان اللي هي دغري زيادة عن اللزوم كان ميسلمش عليه وأنا في المعهد ودي كان شيء يؤرقني جدا الله ده عمي شفني ومسلمش عليه احكي لأبوية فابوية يضحك
د/ عمرو عبد السميع : علشان ما تحسش ان في تفضيل لك على حد تاني أو تعتمد على غير موهبك
أ / عمر خيرت : لدرجة انه شقطني سنة ومش أنا السبب فيها امتحان من الامتحانات قعدت طول السنة أذاكر حاجات لبتهوفن ومتسرت طول السنة وطيب في أخر السنة امتحنت واللجنة سقفت لي حته أجانب
د/ عمرو عبد السميع : ايوة حكاية أجانب بقف عندها لأنها هي دي اللي بتخليني أحس ان المؤثر الغربي في تكونيك الموسيقي ان اكبر بكثير من المؤثرات الشرقية وارجع للحكاية دي تاني يعني
أ / عمر خيرت : لأ ملهاش علاقة ده علم هو مش بيعلمني أخلاقة هو بيعلمني القراءة والكتابة والعزف المظبوط والحاجة والعلم بتعهم فملهاش علاقة زى ما تدرس طب باللغة الانجليزي غنهم كده فالهندسة في ملاحظات كلها بتدي باللغة الانجليزية
د/ عمرو عبد السميع : طيب حضرتك مع حضور الفكرة اللي تقولك أية ان المحلة هي قمة الوصول الى العالمية وان حضور النغمات الشعبية هو أمر ضروري للدلالة على الحالة الوجدانية لشعب مكا ولبلد ما
أ / عمر خيرت : ده صحيح علشان كده أتكلمنا قولت الروح الشرقية أو المصرية لازم تكون في موسيقاك مع هذا العلم علشان الناس بره تقدر هذا يعني مينفعش انك تعمل زيهم وخلاص
د/ عمرو عبد السميع : خلصت الكونزلفتوار وبعدين
أ / عمر خيرت : لأ دي البداية وبعدين جه في فترة كان أبو بكر خيرت اللي أنا حكيت عنه ده كان توفي هو في سنة 1963 يعني كان عمري حوالي 15 سنة دي كانت مرحلة انتقالية جامدة جدا في حياتي اني أنا فضلت مع المايسترو كارو اللي هو مدرس البيانو وعزفت درامز مع الفرقة اله الإيقاع الغربية وشدني الجو ده أنا عاوز اللي هو أيه زى ما بقول لك كده وأنا كنت بروح والعب في الكونزلفتوار فلابس ابقي لابس أيه وقاعد مش عارف أيه وكده أنا عاوز حرية و كل ده بيضيف اني أنا أكون مؤلف في يوم من الأيام على فكرة وكان أبويه عمره ما كان
د/ عمرو عبد السميع : عاوز تخلق عالمك الخاص بك أنت متعش في عوالم الآخرين
أ / عمر خيرت : برافو عليك بدون ما أفكر يعني حتي مكنتش عاوز ابقي زى أبو بكر فاهم قصدي أزاي ولو انه كان ياريت
د/ عمرو عبد السميع : حست أمتي بالظبط انك وصلت لده
أ / عمر خيرت : مع أول عمل عملته
د/ عمرو عبد السميع : اللي هو كان أيه
أ / عمر خيرت : ليله القبض على فاطمة آه أنا بقي عندي شكلي الخاص بي وكان قبل كده أنا كان ممكن ابقي زى أي حد من اللي أنا حبتهم أو من اللي أنا سمعتهم وده الطبيعي في عالم الموسيقي والتأليف
د/ عمرو عبد السميع : رحت تدرس أيه في لندن
أ / عمر خيرت : مش روحت لندن محاولة للعيشة هناك و الدراسة إنما أنا درست بالمراسلة من هنا في الايمي تكنولوجي إنما رحت لندن الفترة دي اللي هي بعد 67 كنوع من
د/ عمرو عبد السميع : تأزمت قوي ي 67 كان سنك اية 18 سنة
أ / عمر خيرت : تقريبا آه كان 18 , 19 سنة
د/ عمرو عبد السميع : عبرت عن ده موسيقيا
أ / عمر خيرت : بعديها بانوراما أكتوبر
د/ عمرو عبد السميع : بانوراما أكتوبر اللي عملته سنة 1989 وبعدين بعد كده عملت عن العبور سنة 2000 وعملت حاجة في افتتاح الدورة العربية سنة 2006 كلها أعمال ذات وهج وطني في الحقيقة لكنها مرتبطة في النهاية بروح الانتصار أكثر منها تعبير عن الهزيمة هو احنا ننكسف نعبر عن أحزاننا عن هزائمنا
أ / عمر خيرت : طبعا
د/ عمرو عبد السميع : ليه ما الدنيا كلها فيها كده
أ / عمر خيرت : نحاول دائما نبعد عن الانكسار يعني أي انسان عاوز يعمل أو يعيش فلازم المرحلة اللي انكسر فيها
د/ عمرو عبد السميع : بس يمكن إخضاع الإبداع لقرارات من النوعية اللي حضرتك بتقولها دي يعني مثلا تشوفسكي لما عمل افتتاحية 1812 مش كانوا جيشين جيش القيصر الروسي وجيش نابليون وكان واضح التمازج اللي هو عاملة أو التداخل ما بين نشيد المارينز الفرنساوي وما بين نشيد القيصر الروسي ساعة ده ينهزم وساعة ده مينهزمش ساعة حتي روسيا اللي هي بلد تشوفسكي بتنهزم وبيعبر عن ده موسيقيا مش عيب ولا حرام
أ / عمر خيرت : محدش قال عيب وبتلاقي حتي في أكتوبر دي موسيقي الانتصار في لحظات اية سبب ان أنا عاوز أقول كده انه أكيد في سبب حزن خليني عاوز انتصر فهي الموسيقي بتعبر عن جميع المشاعر الإنسانية يعني في حالة الهزيمة ما ممكن أنا اعمل لك سنوفونيات
د/ عمرو عبد السميع : ايوة
أ / عمر خيرت : بس مرجعها على أني مبدئيا مش هيبقي
د/ عمرو عبد السميع : يعني أنت تتعلق بالأمل أو موسيقاك في هذا السياق موسيقي تبشريه
أ / عمر خيرت : ده المطلوب وممكن تعبر عن الحزن وعن الأرق وعن الهزيمة وعن كل حاجة إنما لازم لها مخرج والا متبقاش دي حياة بقي
د/ عمرو عبد السميع : يعني اللي يقعد ويسمعونا دلوقتي حاجات مقرفة ويقول لك دي حاجات عن تمزق الشباب وبتاع
أ / عمر خيرت : أقول له أنت حر
د/ عمرو عبد السميع : تروح تمزق بعيد عني في هذه المعزوفة الحوارية إذا جاز التعبير يعني في الحقيقة أنا باتوقف كثيرا أمام نقطة بالغة الأهمية الأغاني الوطنية اللي احنا درجنا على اعتبارها أغاني وطنية بنسمعها من الخمسينات والستينات مختلفة شوية عن الحالة الموسيقية اللي حضرتك بتصنفها بتاعت التبشير للانتصار والأمل في الإنسان وكذا يعني هي أغاني تعبوية إذا جاز التعبير اية الفرق ما بين الحالتين
أ / عمر خيرت : هو في نوعين يعني في موسيقي وطنية لازمات أو حروب في الدنيا كلها مش بس هنا بتعبر عن ده بإشكال معينة بتحس الجنود على الثبات والرجولة والأقدام وهكذا ولها معايير خاصة وأشكال خاصة معروفة برضه في العالم كله وبنستعمل حتي في التدريبات أو الاستعراضات
د/ عمرو عبد السميع : أو حتي الأناشيد الوطنية للدول المختلفة يعني
أ / عمر خيرت : بالظبط كده ونوع ثاني عن حب الوطن
د/ عمرو عبد السميع : بيناسب أكثر انحيازا للنشيد الوطني المصري الحالي من الناحية الموسيقية ولا للنشيد الوطني السابق والله زمان يا سلاحي بقول من الناحية الموسيقية يا أستاذ عمر
أ / عمر خيرت : لأ من الناحية الموسيقية يعني 100% سيد درويش
د/ عمرو عبد السميع : التاني أيه
أ / عمر خيرت : يعني ممكن يبقي عالمي شوية
د/ عمرو عبد السميع : أنت عارف رأي حضرتك في هذا يطابق موسيقار الأجيال الأستاذ محمد عبد الوهاب اللي قال لي سنة 1987 عن هذا النشيد تحديدا والله زمان يا سلاحي قال لي في حته روسي شوية حسيت أنت حاجة زى كده
أ / عمر خيرت : ايوة
د/ عمرو عبد السميع : في هذا السياق أيضا خليني أكلمك عن موسيقي الدراما هل دي حلت محل الغناء التقليدي في تلبية الاحتياج الداخلي لدي الناس يعني احنا بنشوف ليلة القبض على فاطمة قضية عم احمد الارهابي وغيرها من وجه القمر من ضمن المسلسلات التلفزيونية الشهيرة اللي حلت محل الغناء
أ / عمر خيرت : لأ هو صعب تحل محل الغناء لان الغناء ده شيء بشري مهم جدا في الموسيقي ما هو الصوت البشري ده أجمل صوت الأوتار اللي ربنا عملها دي هي اكبر صح والباقي كله د مهم جدا جدا انه يكون عندنا موسيقي الى جانب الأغنية يعني مينفعش انه بس تبقي الأغنية هي الموضوع الموسيقي بقي باية بتطلق الإنسان للعنان المتلقي أو المستمع انه يبقي عنده شيء من الحرية انه يفكر زى ما هو عاوز يحس زى ما هو عاوز الأغنية بتبقي موجهة عن طريق الكلمة الكلمة بتقول كذا يعني هو ده الموضوع يعني إنما الموسيقي ممكن تخلق لها كلماتها جواك وتعيشها أنت مع نفسك بتطلق بقي عنان الفكر والأحاسيس شيء ساحر يعني الموسيقي لها قوة مقدرة كبيرة جدا جدا على التأثير على الإنسان
د/ عمرو عبد السميع : أستاذ عمر أنا عاوزك تتخلي عن تالققك أنا عارف ان ده صعب
أ / عمر خيرت : آه اقلع الجرافته
د/ عمرو عبد السميع : وتكلمني بمنتهي الموضوعية عما يسمي بالاغاني الشبابية دلوقتي رأيك في هذه الموجه تفصيلا أيه
أ / عمر خيرت : يعني هي دي مرحلة انتقالية ما فيش حاجة اسمها شبابية
د/ عمرو عبد السميع : من أيه لأيه مرحلة انتقالية من أيه لأيه
أ / عمر خيرت : من شكل الأغنية الكلاسيكية المصرية اللي تعودنا عليها أيام أم كلثوم وعبد الحليم وعبد الوهاب والطويل وغيرهم يعني كل الفترة الكلاسيكية دي اللي هي هتفضل عيشة على طول دي مرحلة مهمة جدا الى محاولة إيجاد شكل جديد للأغنية أنا في اعتقادي انه غير مدروس إطلاقا
د/ عمرو عبد السميع : عشوائي
أ / عمر خيرت : عشوائي
د/ عمرو عبد السميع : هو ده الدويقة بقي
أ / عمر خيرت : هو ده الدويقة عشوائي
د/ عمرو عبد السميع : فإحنا شغالين اليومين دول أغاني الدويقة وحكر أبو دومة والحاجات دي كلها يعني
أ / عمر خيرت : فده تعبير طبيعي عن الأحوال
د/ عمرو عبد السميع : بس خليني أقول لحضرتك حاجة لما تكمني عن انه هذا الغناء مرحلة انتقال الغناء الكلاسيكي بتاع أم كلثوم ولا بتاع عبد الوهاب أو بتاع عبد الحليم ولا كده الى مرحلة أخري المفترض أنها تواكب حقائق عصرية أكثر خليني أقول لك ان انطباعي عن الكثير من أعمال هؤلاء الرواد اللي غنوا الغناء الكلاسيكي أنها أكثر تطورا مما يقدم الآن ومن الناحية الموسيقية أيضا ومن الناحية التوزيع الموسيقي أيضا
أ / عمر خيرت : آه صدقا يعني الناس دي كان بيقعد سنة بيشتغل علشان يعمل أغنية هو والمجموعة اللي معاه فعلشان كده دي لازم تعيش فاهم قصدي أزاي زى السينفوينة يعني زى ما بنسمع ان بتهوفن لحد دلوقتي أو الكلاسيكيين دول كلهم بيخشوا في المنطقة دي حاجات كلاسيكية طول عمرنا نسمع الأغاني دي وتفضل موجودة في الذاكرة
د/ عمرو عبد السميع : يعني أنا بالمصادفة قبل ما أجي أسجل مع حضرتك الحقيقة كنت باسمع أغنية شهيرة جدا للسيدة أم كلثوم من الحان الأستاذ محمد عبد الوهاب غنتها سنة 1969 اسمها أصبح عندي الآن بندقية من كلمات نزار قباني تأليف الموسيقي للأستاذ محمد عبد الوهاب التوزيع الموسيقي الأستاذ محمد عبد الوهاب في هذه الأغنية شيء بالغ الرقي والتقدم يعني فإحنا منقدرش نقول ان احنا دلوقتي من الجيل اللي يدعي ان هو بيطور الأغنية
أ / عمر خيرت : مش بيطور محاولة لإيجاد شكل جديد للأغنية تتناسب مع اللي هو بيحصل اللي هو سريع سريع
د/ عمرو عبد السميع : اللي هو سريع سريع ما دمنا جبنا سيرة عبد الوهاب فحضرتك عملت شريط وهابيات
أ / عمر خيرت : لأ اثنين
د/ عمرو عبد السميع : أو اثنين علشان تعمل فيه توزيع جديد لأعمال الموسيقار الكبير محمد عبد الوهاب الاقتراب من واحد زى محمد عبد الوهاب مسئلة تورث التردد يعني الواحد ميقدرش يعمل الحكاية دي إلا إذا تحلي بقدر كبير جدا من الجراءة والجسارة
أ / عمر خيرت : لأ ده هو اللي طلب
د/ عمرو عبد السميع : حصلت أزاي بقي انك أنت عملتها
أ / عمر خيرت : لأ أصل هو شوف الأغاني دي احنا اتفقنا على حاجة في أول حديثي ان ده لحن وإيقاع فكرة الاوركسترا لشين أو التوزيع الاوركسترا لي دي كان عاوزة أولا دراسة طويلة جدا فالملحنين العظماء دول مكنش عندهم الحظ اللي جاء لنا احنا في جيلي في وجود الكنزولفتوار ان احنا نتعلم أسس تأليف الموسيقي العالمي علشان نقدر نوزع فكان عبد الوهاب الله يرحمه كان لما يحب يوزع حاجة يجيب اندريا رايدر أو على إسماعيل أو غيرهم فكان يبقيوا أيه يعني الاثنين يعملوا العمل اللحن الأساسي وفي التوزيع هو اندريا رايدر فانا عاوز أوري يعني أية توزيع اوركسترا لي بحاجات استحالة أنها تتعمل ليه لان من أجمل الأصوات اللي غنت في الدنيا صوت محمد عبد الوهاب
د/ عمرو عبد السميع : طبعا
أ / عمر خيرت : أزاي تسمع الناس موسيقي عبد الوهاب دي ومش هو اللي بيغني ده نوع ده موجود في العالم كله طبعا ان الأغاني الشهيرة جدا تتعمل موسيقي فقط فدي كانت بداية التجربة وهو شجعها جدا الأستاذ محمد عبد الوهاب فكان ده الفكر فانا عاوز أوري أزاي البيانو والعود هيقوم محل البطن مع التوزيع الاوركسترا لي و الهرموني والحاجات اللي احنا اتفقنا بوجودها في العلم يعني فمن هنا أصبح الموضوع عمل عمل اوركسترا لي بتاع عبد الوهاب وأنا عامل توزيع بس مفيش غناء ودي خطورة الموضوع إنما الحمد لله ان ده كان مع بداياتي وبدء المشوار ده يمشي وبعدين طلب هو تاني الألبوم الثاني بس كان هو توفاه الله بقي
د/ عمرو عبد السميع : وضمن ما قال مصر الآن تغني غناء الدويقة ونتواصل بع الفاصل
فاصل
د/ عمرو عبد السميع : عدنا لنواصل التقليب في ملف الانتماء مع الموسيقار الكبير عمر خيرت ده وقت حوارك للشباب أدي ضيفنا اسالوه وحاوره وناقشوه
مساء الخير
أ / عمر خيرت : مساء النور
داليا محمد كلية إعلام ثالثة إذاعة وتلفزيون : أنا عملت بحث عن حضرتك عندنا ماده اسمها الموسيقي عملت بحث عن الموسيقي التصويرية في الأفلام المصرية لعمر خيرت أنا بس مش سؤال هو حاجة
د/ عمرو عبد السميع : قبل ما تقولي حاجة قولي لنا وصلت ليه بالظبط البحث ده
داليا : أنا تكلمت في البحث أنا قسمته لكذا حاجة بس مرضيتش اخذ قوي النشأة بتاعت حضرتك أو الحياة بتاعت حضرتك بوجه عام أنا اخترت الموسيقي اللي كنت عاوزة أسئل حضرتك عليها ان أنا لاحظت ان من سنة 85 لسنة 90 الموسيقي التصويرية بتاعت الأفلام بتاعت حضرتك قلت من سنة 85 كان يعتبر انجاز لحضرتك ان حضرتك عملت حوالي 6 أفلام وده انجاز طبعا 87 حوالي أربعة 88 بدءوا يبقوا اثنين و 90 فيلم واحد اللي هو جحيم 2 فليه الأعمال بتقل يعني ليه مابقتش بقوتها زى 85
د/ عمرو عبد السميع : طيب أنت في تقديرك ده بيحصل ليه هل ده بيحصل بقرار من المبدع ولا أحيانا لان إبداعاته في اللحظة دي
داليا : ممكن يبقي في ظروف أو مثلا هو حب ان هو يركز في حاجة معينة علشان تطلع حلوه قوي وإعماله أكيد كلها حلوه قوي ثاني حاجه كنت عاوزة أسئل عليها بسيطة حضرتك قلت جمله أنا عاوزة أتوقف عندها قلت ان التأليف الموسيقي أصعب من تلحين الكلمات فانا كنت عاوزة أسئل حضرتك قلت كده ليه
د/ عمرو عبد السميع : تمام زميلك
حامد فتحي الفرقة الرابعة كلية الإعلام جامعة القاهرة : الانتماء الحزبي حزب الوفد أنا عملت برضه البحث كنت مشترك أنا وداليا البحث عن حضرتك توليت وصف السمات
د/ عمرو عبد السميع : داليا حزب الوفد برضه ولا ل ولا كنتم عاملين ائتلاف ما بين الأحزاب
حامد : حضرتك ان توليت الجزء الخاص بوصف السمات بتاعت حضرتك سمات الموسيقي بتاعت حضرتك حضرتك تأثرت بالفلكلور الشعبي المصري والإفريقي ومزجت ما بين الموسيقي الكلاسيكية الأوروبية والموسيقي الشرقية لان حضرتك بتعبر ان الموسيقي الكلاسيكية الأوروبية انتقلت تأثرت بموسيقيين غربيين تأثروا بالموسيقي العربية اللي هي انتقلت إليهم من الأندلس وصقلية حضرتك أنا بسئل بس هل ده أسفر على إني الموسيقي بتاعت حضرتك تكون فيها تقابل رائع جدا أو تضاد رائع جدا زى ما شوفنا في خلي بالك من عقلك ان حضرتك تبدأ بطابع رومانسي وتنتقل الى طابع اعلي وبعد كده بترجع لطابع رومانسي وزى ما شوفنا برضه في القضاء في الإسلام بجد كان تقابل رائع جدا جدا يعني حضرتك بتنتقل بدون ما نحس ان في فرق وده بيعبر عن الموسيقي بتاعتك يعني الاسم مش بيعبر عن القطعة الموسيقية القطعة الموسيقية هي اللي بتعبر عن الاسم لو شفنا قضية عم احمد أنا أول ما شفت الاسم حسيت ان في قضية ومحكمة ودائما المحكمة بترتبط عندنا بان في حد مظلوم ولكن هي بتعبر عن طابع فرح وله بجد بيعبر عن مدي تملك لموهبة جامد جدا جدا أو شخصية رائعة بتقدر انك أنت تستخدم التضاد في إثبات موهبتك
د/ عمرو عبد السميع : احنا عندنا مشروع ناقد كبير والله هايل
أ / عمر خيرت : معلش كنت عاوز اعرف السؤال بقي يعني السؤال إيه بالظبط اللي حضرتك عاوزة
حامد : السؤال تأثر حضرتك بثقافات عديدة هو ده اللي خلي التقابل أو الشخصية الفريدة بتاعت حضرتك تظهر يعني حضرتك بين كل الموسيقيين مفيش يعني احنا مش شوفنا شخصية زى حضرتك الشخصية العربية كلها الموسيقيين العرب اللي هما سبقوا حضرتك رغم انجازهم الضخم جدا والموسيقيين الأوروبيين حضرتك عملت شخصية فريدة مزجت ما بين الطابع الكلاسيكي الأوروبي والكلاسيكي الشرقي
د/ عمرو عبد السميع : يعني أنت حبيت تقول لنا تعقيب أكثر منه سؤال بالتحديد
حامد : هو بجد أنا مش قادر أسئل سؤال
أ / عمر خيرت : علشان كده أنا بقول السؤال فين
حامد : حضرتك أنا عملت البحث وبسمع حضرتك كثير جدا يعني عايز أفكر أسئل سؤال أيه علشان في أسئل سؤال أنا مش لاقي مفيش أي نقطة عايز اسألها حضرتك
د/ عمرو عبد السميع : في حدود التعليق اللي أنت قلته ده كويس قوي زميلك
أ / عمر خيرت : يعني هو ده الرد زى ما حضرتك بتقول ان هو زى ما كنت باحكي مع الدكتور ان عملت بأنواع مختلفة من الموسيقي هو اللي كون شخصيتي يعني كمؤلف موسيقي مصري استمعت الى الغناء الشرقي والكلاسيكي المصري ودرست الموسيقي العالمية ومارست الموسيقي الجاز بقي في فاهم قصدي أزاي في توليفة مكنتش قاصدها إنما الظروف جعلتني
د/ عمرو عبد السميع : وساعات الموضوع هو اللي بيفرض على حضرتك يعني في مائه سنة سينما بحكم أنها تعرض لتاريخ حافل جدا للسينما وبأنواع مختلفة من الأفلام كان من الضروري ان الموسيقي تبقي مواكبة لهذه التغيرات الساخنة كل نغمة بتعبر عن شيء أو خليط النغمات بيعبر عن شيء كبير يالا زميلك
حامد : كان في نقطة بسيطة بس
د/ عمرو عبد السميع : طيب قول النقطة البسيطة
حامد : حضرتك وبس الموسيقي أو الغناء الشعبي اللي هما بيقولوا عليه أو الموسيقي الشعبية اللي هي منتشرة دلوقتي هي مش شعبية ده مجرد شيء مش ينفع نوصفه خالص يعني ما يندرجش للموسيقي غير في ان الات بس تشتغل وناس مش مؤهلين بيشتغلوا بس حضرتك
د/ عمرو عبد السميع : دويقة برضه هو كمان
حامد : أنا عاوز أسئل حضرتك التراث اللي هو الموسيقي الشعبية الأصيلة اللي هي زى مثلا اسكتلندا فيها موسيقي والدابكة اللبنانية والاستعراض الصيني يعني أية اللي ممكن الاقية بحيث يميز الشخصية الثقافية المصرية
د/ عمرو عبد السميع : تمام زميلك بقي
مساء الخير يا دكتور عمرو أنا مطرب
أ / عمر خيرت : اسم حضرتك
شادي محمد عبد السلام
أ / عمر خيرت : مطرب وشادي ده شيء رائع جدا
شادي : أنا كنت حابب أتكلم عن أزمة الغناء اللي هي تخص أنا مش عارف الأزمة دي هل هي مننا احنا كشباب جديد بيغني ولا هي من كبار القائمين على صناعة الموسيقي يعني لان الموسيقي بجد الغناء عندنا بيتدهور بشكل مريع يعني أنا لما اقعد اسمع حتي ملقيش حد اسمع دلوقتي غير الناس القديمة بعض القلائل اللي هما
د/ عمرو عبد السميع : بتسمع مين يا شادي من الناس القديمة
شادي : بسمع كل الناس القديمة
د/ عمرو عبد السميع : زى مين يعني اختار حد
شادي : أم كلثوم فيروز عبد الحليم عبد الوهاب
د/ عمرو عبد السميع : وبتغني لمين فيهم
شادي : بغني لهم كلهم
د/ عمرو عبد السميع : طيب ما تغني لنا حاجة
شادي : على البلد المحبوب وديني زاد وجدي والحب كاويني على بلد المحبوب وديني زاد وجدي والحب كاويني يا مسافر على بحر النيل أنا لي في مصر خليل من حبه ما بنام الليل زادي وجدي والبعد كاويني
د/ عمرو عبد السميع : الله الله كمل بقي ما دام صوتك حلو كده تبقي تستحق تسئل سؤال
أ / عمر خيرت : عاوز أرد عليك ما أنت عارف الطريق اهو اللي هو الدراسة عن طريق الغناء الكلاسيكي المصري العربي اللي هما غنوه الأئمة العظماء دول وطول ما ده موجود طول ما هيبقي المدرسة دي موجودة
شادي : أنا بس يا دكتور بتكلم على ان الحاجات دي مش بلاقي لها دعم بمعني يعني أنا كل فين وفين لما الاقي حاجة حلوة مؤخرا حضرتك عاملها لريهام يعني حاجة جميلة جدا
د/ عمرو عبد السميع : ريهام عبد الحكيم المطربة الصغيرة الكبيرة
شادي : حاجة بجد تفرح كده طبيعي حولي كده عاوز القي حاجة كده ومحتاج أنا كمان اغني حاجة كده يعني أنا بقول طيب أنا عاوز اعمل حاجة كده حلوه فبص حولي طيب اعمل مع مين بروح لأصحابي أصحابي اللي هما الملحنين اللي زى ألاقيهم بيعملوا حاجات غريبة جدا
أ / عمر خيرت : أنت ملحن كمان
شادي : لأ أنا مش ملحن مطرب
أ / عمر خيرت : قصدي بتعمل في طرب يعني
شادي : وبامثل بس يعني
أ / عمر خيرت : وخريج أيه أو بتعمل أيه
شادي : أنا معايا ليسانس حقوق
أ / عمر خيرت : ما شاء الله عليك
شادي : فطبعا صعبان علي مش عاوز اغني الحاجات دي أنا عاوز اغني حاجة حلوه حاجة حلوه أنا أكون مستمتع بها لو حد سمعها يحس ان أنا بستمتع بها
د/ عمرو عبد السميع : عندك سؤال
شادي : آه عندي سؤال عاوز اعرف بس مين السبب في اللي بيحصل ده هل احنا كشباب صغيرين
د/ عمرو عبد السميع : القلب ولا العين
شادي : آه بالظبط نفس السؤال
د/ عمرو عبد السميع : طيب يالا زميلك بقي
بسم الله الرحمن الرحيم باسل عبد السلام طالب في كلية التجارة جامعة القاهرة : أنا بصرحه مش عارف أقول أية على صوت شادي وعلى كل اللي بيقوله بس نفس المشكلة دي برضه بتحصل
د/ عمرو عبد السميع : يعني أيه مش عارف تقول أيه يا تقول انه حلو يا تقول انه مش حلو
باسل : جميل جدا
د/ عمرو عبد السميع : اهو كده الكلام
باسل : مفيش أجمل من كده لأ أنا بتكلم برضه عن نفس السياق للشعراء اللي بيكتبوا وأنا المفروض يعني أني أنا بكتب زيهم أو بكتب انضمت لنفس السياق
د/ عمرو عبد السميع : ده طبعا علشان شادي يطلع يقولك الشعر بتاعك حلو مش كده
باسل : لأ خالص
أ / عمر خيرت : معلش اسم حضرتك أيه
باسل : أنا باسل تمام فانا بانضم لهم فنفس المشكلة اختلف الكلام من زمان ودلوقتي يعني زمان كان بيتكتب كلام زى مثلا أهواك وأتمنى لو أنساك ده كلام ينفع يتسمع لكن دلوقتي يفي كلام بيتكتب مينفعش حتي يتلحن ولا ينفع حتي يتعمل حاجة فدي برضه تعتبر اختلافه كبيرة جدا
د/ عمرو عبد السميع : ما أتلحن وتغني والتجربة ونجحت
باسل : لأ منجحتش نجحت على مستوي قليل جدا بس ما نجحتش على مستوي المجتمع كله المجتمع كله رافض الكلام ده
د/ عمرو عبد السميع : صح كده
باسل : وفي ناس بتأيد الحاجة الكويسة بالنسبة برضه لأستاذ للدكتور عمر كنت عاوز حضرتك هل ممكن في المستقبل ان يكون مشاركة بين حضرتك والأستاذ يحي خليل يبقي في دمج الموسيقيتين مع بعض في عملا ما أو مشاركة ما
د/ عمرو عبد السميع : اشمعني اخترت المثل ده
باسل : علشان هو حضرته قال ان هو كان زمان في الدرمز وبيشتغل في الجزء ده قبل كده فهل يمكن يحصل اندماج بينهم
د/ عمرو عبد السميع : خلاص
باسل : أخر حاجة بس عاوز اعرف هل في الموسيقي التصويرية لما حضرتكم تيجي تعمل مسلسل أو بتيجي تعمل فيلم هل بتطلع اللحن من أحداث الفيلم أو أحداث المسلسل ولا بتطلعة من الإحساس اللي بيطلع من الناس اللي بتمثل ولا بتطلع أزاي يعني
د/ عمرو عبد السميع : يالا زميلتك
اسمي أسمهان عادل
أ / عمر خيرت : اسمك
أسمهان عادل
د/ عمرو عبد السميع : مناسبة للحلقة جدا
أسمهان : متخرجة من معهد حاسب الي وكنت بغني في الأوبرا مع المايسترو سليم سحاب
أ / عمر خيرت : ما شاء الله
أسمهان : فعلشان بحب الغناء كنت عاوز أسئل حضرتكم ليه الأغاني دلوقتي يعني سريعة وكلماتها سريعة وإلحانها سريعة غير زمان نستمتع فيه بكلمات رائعة جدا والحان رائعة جدا فكنت عاوزة أسئل حضرتك أيه سبب سر غياب الأغنية المطوله
د/ عمرو عبد السميع : وكنتي بتغني أيه مع سليم سحاب
أسمهان : كنت بغني اغني من التراث لفايزة ووردة وأسمهان وفريد وكل القدماء
د/ عمرو عبد السميع : طيب ما تغني لنا حاجة لأسمهان يا أسمهان
أسمهان : عليك صلاة الله وسلامة عليك صلاة الله وسلامة شفاعة يا جد الحسنين ده محملك رجعت أيامه ده محملك رجعت أيامه هنية وتملت به العين
د/ عمرو عبد السميع : الله الله الله يالا زميلك بقي
نديم محمد سعيد طالب بكلية هندسة ومطرب : طبعا أنا من اشد المعجبين بحضرتك أستاذنا الكبير أستاذ عمر خيرت حضرتك عملت موسيقي كثير لأفلام ومسلسلات أثرت فينا لدرجة ان احنا بقنا نسمع الموسيقي دي نفتكر أحداث من المسلسلات أو من الفيلم ده حتي بنكون نسيين اسأميها ونفتكرها لما نسمع الموسيقي سؤالي عاوز أوجه سؤالي بس لحضرتك هل حضرتك شايف ان الموسيقي المعبرة والمؤثرة تحديدا ممكن ترجع تاني لان الموسيقي حاليا موسيقي سر يعه متوصلش لنا حاجة ما نستفدش منها حاجة
د/ عمرو عبد السميع : طيب يالا زميلك
علم الدين محمد كلية أعلام القاهرة : الموسيقي اسمي من ان يكون اده للهو والسرور فهي تطهر النفوس وراحة للقلوب أرسطو
د/ عمرو عبد السميع : أنت شايف ان في عارض ما بين الأمرين سيبك ان ده أرسطو اللي قال أنت شخصيا شايف ان في تعارض
علم الدين : تعارض فين
د/ عمرو عبد السميع : ما بن اللهو والسرور وما بين أنها اسمي وكلام من هذا القبيل
علم الدين : أكيد الموسيقي محترمة ولها هدف وتنمي روح الانتماء وعندنا تطهر نفوسنا يعني لما تكون الموسيقي بلا هدف وهدفها المتعة ومخاطبة الغرائز ده اللهو والسرور
د/ عمرو عبد السميع : أنت بتفرق هنا مابين الموسيقي الغرائزية زى ما كان الأستاذ عمر بيقول بالظبط وما بين الموسيقي الثانية القائمة على التفكير الجاد اللي فيها ارتباط روحي يعني
علم الدين : وتنمي الانتماء
د/ عمرو عبد السميع : تمام يالا كمل
علم الدين : تحدثتم عن السلام الوطني والنشيد الوطني نعلم ان موسيقي النشيد الوطني تنمي وتعزز ذرائع الانتماء لدينا اتسائل هنا لما لا يكون هناك سلام وطني عربي موحد ينمي عزيمتنا العربية ويوحد عروبتنا العربية ونحتفل به في مناسباتنا العربية عالميا أيضا هناك في قصور في الأغاني الوطنية العربية أو نري القليل منها مثل الحلم العربي والضمير العربي
د/ عمرو عبد السميع : تمام زميلتك
إيناس السيد على تجارة القاهرة : من خلال خبرة حضرتك في مجال الموسيقي هل حضرتك اكتشفت معايير لنجاح موسيقي وفشل موسيقي أخر بمعني ان في موسيقي تحقق هدف وموسيقي لا تحقق نجاح ولا هدف شكرا
د/ عمرو عبد السميع : تمام زميلتك
كريستن عادل فكري طالبه في اقتصاد وعلوم سياسية جامعة القاهرة : أتكلم عن الانتماء والموسيقي زمان كنا بنسمع أبوية وجدي يتكلموا ان هما يجتمعوا قدام فيلم لحليم أو أغنية لحليم ويحسوا بالانتماء للأسرة دلوقتي بابا وماما بيشفونا بنسمع أغنية أو نتفرج عن الفيديو كليب هما يجوا يطفوها أو يغيروها دي أول حاجة الانتماء والموسيقي أيه العلاقة بينهم تاني حاجة قرصن الانترنت وسرقة المقطوعات الموسيقية ورد فعل حد بقدر حضرتك على حاجة زى دي ثالث نقطة الغياب للكلمات دلوقتي مش في كلمات بقت في أغنية مصورة وبقي في أي حد بيغني
د/ عمرو عبد السميع : تمام زميلتك
مي عادل حسن كلية حاسبات عين شمس : دلوقتي مبقاش في انتماء كثير قوي زى ما كان زمان في انتماء أكثر من كده فازاي احنا نقدر نربط ما بين الانتماء والموسيقي ونرجع الانتماء تاني
د/ عمرو عبد السميع : تمام أستاذ عمر
أ / عمر خيرت : تلحين بسرعة كده زى ما قلت ان ده خط لحني واحد أما التأليف يبقي تقريبا أكثر من 245 خط تقراء ويتسمعوا مع بعض ده ببساطة حامد التأليف الموسيقي العبي الكلاسيكي وتأثره بالثقافات العالمية طبعا حديثي مع الدكتور عمر قلنا عن الموضوع ده التأثر ده لازم موجود الى ان تجد لنفسك أنت شخصيتك اللي تعبر بها من مكانك في وطنك زى ما حكيت اني أنا راجل مصري حبيت الموسيقي المصرية حبيت الموسيقي الكلاسيكية وحبيت موسيقي الجاز أو التوب ميوزك في العالم كله ومن هنا أتكونت لي شكل معين خاص بي بقت موسيقي عمر خيرت شادي أتكلم عن أزمة الغناء ومشكلة المطربين الجديدة وهو غني لنا وقولت له ساعتها على الهواء على طول انك أنت معندكش أزمة لأنك أنت واخد المدرسة المظبوطة لغناء والموسيقي المصري أو الشرقي باسل أتكلم عن الكلمات واختلاف الكلمات من زمن لزمن وده طبيعي زى اختلاف كل حاجة زى اختلاف الأجيال كلها لكل جيل يعبر عن نفسه بالكلمة
د/ عمرو عبد السميع : هو نفس اللي طرحته كريتسين برضه
أ / عمر خيرت : بالظبط أسمهان بتتكلم عن السرعة في ألغناء في الإيقاع الغنائي دلوقتي أنا أتكلمت مع الدكتور عمر برضه في الموضوع ده ان هو ده سمه تجارية اللي ماشي أيه دلوقتي ان يبقي في الإيقاع بالشكل ده فكل الناس تروح لناحية الحته دي مفيش التركيز أو التفكير في الموضوع كأغنية تعيش هو الموضوع دلوقتي دي تجيب أد أية وكام فلازم تبقي سر يعة نقعد نعمل أغاني زى فايزة احمد وأم كلثوم وورده والحاجات دي
د/ عمرو عبد السميع : وأسمهان
أ / عمر خيرت : وأسمهان ونقعد نسمع في الأغنية نصف ساعة أنا أحب كده فعلا أو ساعة دلوقتي الموضوع ثلاثة دقائق وخلصت السندوتش زى تيك اوي يعني وده سمه من سمات العصر هل الموسيقي معبره مش كده
د/ عمرو عبد السميع : ايوه
أ / عمر خيرت : دلوقتي فعلا كل وقت تعبر عنه موسيقاه والموسيقي مراه لتطور المجتمع وما يحدث في المجتمع الموسيقي بتعته هي اللي بتعبر عنه فلو في مشاكل اقتصادية أو مشاكل نفسية خصوصا اقتصادية دي لأنها مهمة جدا للفن يعني لو مفيش ناس جعانه مفيش فن يعني أكل ولا اسمع فن ولا اعمل فن أقول اشبع مش ضروري اشبع يعني ابقي مرتاح أني أنا قادر أكل وأكل عيالي ووديهم مدرسة وكده وودي فن بقي زى ما أنت عاوز دي برضه ردا على حضرتك فهي معبرة يعني اللي هو أنت مش مبسوط منها أذن معبره عن الحالة العامة اللي ممكن وبيحصل في الدنيا يعني
د/ عمرو عبد السميع : دكتور عمر يعني أيه كلمة وطن
أ / عمر خيرت : أم
د/ عمرو عبد السميع : الوطن هو أم والنقاش مستمر وحالة الحوار قائمة وعلى لقاء ان شاء الله .