أخي المُتَشَدَّد

نصيحة لصديقي العزيز الوَدود
لو انَّك حاسِبني عَدُوّ.. و.. لَدود
طريقك ملَغَّم بصخر وجُمود
لأنَّك تنادي بقديم العهود
التغْيير بيحصل، دا طبع الوجود
وزمان الصحارَى لا يمكن يعود
دا شئ كان زمان
والدين في طفولته
الدين كان جديد
والصحَرا جفاف وعُنْف وقيود
***
سواء أنا مسلم.. سواء أنا قبطي
عايز تحَجِّب.. أمِّي وأختي
ماتخليك في أهلك وفي اللي يهمَّك
وليه حتى تظلم.. أختَك وأمَّك
***
مين حَكِّمَك على أهْل غيرَك
ومين وَكِّلَك على أمر غيرَك
لا بنسمع كلامك.. ولا بنستشيرَك
فكَّر وقَدَّر... وراعي ضميرَك
وخليك في حالك ما تبقاش عنيد
***
تنادي بخلافة... مُجَرَّد خُرافة
صدق اللي قال
كلام في الخيال
دي دعوة خراب وعين الخيانة
لا هِي وطنية ولا هِي ديانة
دي موجة لدعوى مالهاش وجود
مآلها التناسي.. مآلها الركود
بتخلق عداوة في كل النفوس
تفَرَّق.. تبعْزَّق
وعلى الناس تدوس
تسفك دماء، ويمُوت كام شهيد
وتسبِّب جراح نزيفها صديد
لا عاد فيه مَوَدة ولا عاد فيها عيد
وانت بتهتف هل من مزيد؟
ضميرك تحَجَّر وفِكْرك تبَخَّر
وقلبك جَفاف ومُخَّك حديد
***
فَكَّر في مصر
وأم الشهيد
وجارُه القُريِّب وصاحبه البعيد
وأرمِلة في الدنيا مالهاش سَنيد
وإبنُه اليتيم... وغيرهم عديد
راعي ضميرك... راعي إلهَك
إرحم عبيده
دا بيت القصيد
***
بتخطُب وتندِب، وتفضل تعيد
وعَمَّال تهدد بوَعْد ووَعِيد
أمْرَك غريب.. كلامَك شديد
تطبطب بإيد.. وتقتل بإيد
سياسة تقيَّة
ولِحية وطاقية
وسيف بل سيفين.. مع البندقيَّة
وتفضل تنادي وتخلق أعادي
وعايش في وادي واحنا في وادي
ولا بنستفيد.. ولا بتستفيد
***
حاقولها نصيحة
بسيطة ومريحة
الدين مش تزمُّت الدين مش قيود
وانا أهَم ليك من ابن الوَليد
وعروة وهُريْرة وأعشى ودَريد
أنا زيّ اخوك حمادة وفريد
أنا أقرب إليك من حَبْل الوَريد
إذا احتجت لِيَّا، أنا مش بعيد
حتلقاني جنبك مُخْلِص وَدُود
أساعدَك واساندَك
لا دينك وديني
ساعتها يحوشوني
ولا عمري أحيد
لأني ابن مصر، وانت ابن مصر
وانتَ أخويا.. إذا انتَ تريد!!
***
بنات مصر حُرَّة
وشباب مصر حُر
دا شيء مش جديد
في ساحة الميدان
في بحري وصعيد
دِينّا وَطَنّا.. والله شهيد
***
فتَّح عينيك... وبُص لبعيد
في عصر التقدم
ماعادش سيادة ولا عاد عبيد
في دُوَل الحضارة عَبْرْ الحُدود
طاروا وعاموا وعَبَرُوا السدود
وصاروا نسُور، وصاروا أسُود
حضنوا المُواطن من كل جنس
ومن كل مِلَّة ومن كل دين
مسيحي ومسلم ودرزي ويهود
وصيني وياباني وبوذي وهنود
مافيش فرق بينهم
ولا حد يقدر يخربش في دينهم
الدين في قلوبهم
مش مَعْرُوض في "شارع"
ولا عند قاضي ولا عند "شارع"
ولا في الحكومة ولا في الديوان
الدين في المعابد
في حضن الكنايس وجوا الجوامع
***
بتنادي ان دينك دين السماح
ودين التعايش ودين ارتياح
إن صَح كلامك
خُد الحلْو مِنُّه
خُد الرحمة عَنُّه
خُد مِنه الحلاوة خُد مِنه الجمال
خُد مِنه السماحة ومعنى الحلال
***
وخليك بس فاكر
أو اقْرا.. وذاكر
الدين مش حكومة الدين التعامل
وعصر الخيام وعصر القبائل
وعصر العبيد وعصر السبايا
وعصر الجواري وهتك الصبايا
عَدَّا ووَلَى
ومصر الأصيلة بأولادها أولَى
بكل العناصر تكون دولة كاملَة
***
بيت القصيد وخلاصة العبارة
الدنيا بتمشي تجاه الأمام
بعلم وزراعة وصناعة وتجارة
وكرسي الإدارة
لا هُوا لخاين
ولا حتى لأسقُف.. ولا للإمام
*****
مهندس عزمي إبراهيم