محمد صلاح: يا مساء الخير ، شعراء العامية المصرية كبار فيهم فصاحة أكتر من شعراء الفصاحة ، العامية المصرية باعتراف أعضاء مجامع اللغة هي الأقرب للفصحى من بين كل العاميات العربية .. شعراء العامية عبر تاريخنا كله أنتجوا أشعار عاشت وبقت ورغم الكلام الكتير عن اندثار العاميات الحقيقة لم يبق غير النماذج الكبيرة والمهمة زيي أي فن بيبقى نماذجه الكبيرة وأسماؤه اللي حركت الحجر بعد ما حفرت فيه خلاصة إبداعها عبد الله النديم ، بيرم التونسي ، فؤاد حداد ، صلاح جاهين ، عبد الرحمن الأبنودي ، أحمد فؤاد نجم ، سيد حجاب ، مجدي نجيب ، فؤاد قاعود ، جمال بخيت .. ميزة شعر العامية المصرية إنه قريب من الناس مليان بالأحاسيس المرهفة اللي بتتقال بكلام مفهوم .. كلام فاتح على الوجيعة وكل ما بكانا أكتر وخلانا نحلم أكتر كل ما فردنا له صفحات في قلوبنا وأرواحنا .. صحيح القصيدة الفصيحة أتغنت لكن الأغنية اللي عن شعر عامي وقفت جنبا إلى جنب مع أفضل قصائد الفصحى وقالت كلمتها وكل ما فارس من فرسانها لقى صوت مُعبر ولقى المُلحن المُبدع تُحلق الكلمة ويا اللحن مع الصوت الجميل ويوصلوا للآفاق مع أغنية تعيش وتبقى لأجيال قصيدة العامية المصرية مش بس أغنية دي من عبد الله النديم لسيد حجاب ارتبطت بالشعر السياسي يمكن للظرف التاريخي ، أرث الاستعمار ، قضية الاستقلال أو ثورة وبعد ما ارتحنا من النضال ومن الحروب شويه شفنا القصائد العامية العاطفية وشفنا القومية بحِس جديد ، سمعنا مسحراتي فؤاد حداد اللي صحا المصريين ، وسمعنا مسحراتي جمال بخيت اللي بيصحي كل العرب .. اللي غنى لزويل ومحفوظ ولأم كلثوم ولدولة قراءة القرآن المعجون بحب مصر حب الوطن اللي باقي منه ومنا .. شاعر العامية المصرية ساعات رائع وساعات مؤلم ، مداوي وجارح ، ماكينة أحلام ، آلة زمن بتاخدنا لبكرة لكن اتفقنا أو اختلفنا فيه هو روح جديدة .. روح جديدة حنسمعها ونشوفها دلوقتي حالا في كلام ..... مسئول فاصل محمد صلاح: العامية المصرية في أرقى نماذجها حنلقى الفن ، المهنة ، الوعي اتربطوا في ضفيرة واحده من الكلمة العامية حمّالة الوجوه ، الكلمة المُعبرة عن العبقرية المصرية المُحبة للتسجيل الكلمة المرايا صاحبة الوجوه المتعددة عقلية عاشقة للمجاز لمضرب الأمثال حبا الكلمة واللي بتشيلة الكلمة من معاني كتيرة كل واحد يفهمها على قد فهمة .. مقاصد الشعر العامي ، خيالاته ، معانية ، أمارته رايح على فين حيكون لينا عنه النهاردة مع الشاعر جمال بخيت كلام ......مسئول ومن كلام الشاعر جمال بخيت فكرة القومية العربية ضمت مجموعة من القيم منها احترام الثقافة والأدب والفن وبالتالي ظهرت لدينا قامات أدبية كبرى وهو ما أدى إلى حدوث نهضة وتطور هائل في الزجل منذ أيام بيرم التونسي تحول إلى ما يسمى بشعر العامية. أنتمي لجيل الرئيس الراحل جمال عبد الناصر بكل ما كان يحمله من أفكار ورؤى مثل القومية العربية وهذا ما شَكل وجداني الشعري حتى الآن. فؤاد حداد كان أول مَن ألتقط فكرة أن المسحراتي الذي يجوب الأزقة لإيقاظ الناس من النوم للتسحُر في رمضان هو شخص بإمكانه القيام بدور أكبر وأعمق يتمثل في إيقاظ وعي الناس وضمائرهم. مسحراتي العرب ليس مجرد ديوان شعري ، المسحراتي مسيرة حياة دعوة إلى الوحدة والحب ، حب الوطن في مفهومه الواسع. حاولت عند كتابتي لمسحراتي العرب أن لا أكرر ما سبق فلجأت إلى تغيير الأوزان الشعرية خاصة وأن الأستاذ فؤاد حداد اعتمد وزنا رئيسيا في حلقاته كما اجتهدت كذلك في اختيار المواضيع. أجمل حاجة في الدنيا البُنى مش الهدم المعرفة بتبقى مفيدة لما كل واحد يجي يبني على اللي سبقه حتى لو قدم بضاعته بشكل جديد ده اللي بيزرع الأمل ويمنع التوهان الكلمة الجميلة عِبادة ونسمة المحبة سكر زيادة ، العلم نور والعقل زينة والغنوة محبة لكل دين وأنا بغني يا مؤمنين نفطر بتمر رشيد وفي طابا يجي العيد ده كلام الشاعر جمال بخيت اللي حيكون لينا معاه دلوقتي كلام ..... مسئول فاصل محمد صلاح: ارحب بالشاعر الكبير استاذ جمال بخيت منورنا يا استاذ جمال..خلص رمضان والناس اتسحرت وكنا بنسمعك في عمل يومي وبنشوفك على القناة الاولى في التليفزيون المصري عن المسحراتي قبل كده كان ارتبط المسحراتي في اذهان الناس دايما بفؤاد حداد ليه محدش غيرك قرب من المنطقة دي جمال بخيت: لا فيه ناس عملت اكتر من مسحراتي انما يمكن مكانش ليه صدى محمد صلاح: ليه ؟ جمال بخيت: لان البناء العبقري اللي عمله فؤاد حداد وهو بناء يخض الحقيقة ولذلك انا لما بدات عندي فكرة ان انا اكتب المسحراتي قعدت في تردد في الحكاية دي حوالي 3 سنين يعني هل اقترب من هذا الموضوع اللي فؤاد حداد عمل فيه هذا الهرم العبقري العظيم واللي عاش في وجدان الناس من خلال صوت كبير وعبقري وملحن عظيم حتة من قلب مصر زي ما بنقول عليه سيد مكاوي فقعدت 3 سنين متردد في المسالة دي لحد ما ربنا فتح عليا بوجهة نظر ان كل عصر مطروح عليه قضايا غير العصر اللي التالي ليه او السابق ليه واحنا القضايا اللي اتطرحت على جيلنا اكيد كانت مختلفة عن القضايا اللي طرحت على جيل العبقري العظيم الراحل فؤاد حداد ثم انه هناك دائما متسع لموضوعات جديدة وافكار جديدة ممكن تُناقش من خلال شكل المسحراتي اللي هو شكل لما تدور على جذوره مابداش مع فؤاد حداد هو بيرجع الى الدولة العباسية وما يسمى لما كتر المسلمين وكتر الناس وبقى فيه حاجة ان الناس تصحى وقت مكانش فيه بقى التليفزيون ولا الفضائيات ولا الحاجات دي فظهرت الحاجة الى وجود شخص يلف على الناس عشان يصحيهم وقت السحور وكان المنشدين اللي بيقوموا بهذه المهمة الانشاد بتاعهم يسمى "فن القومة" .. من ان الناس تقوم تصحى يعني ففن القومة دا فن موجود طبعا في الادب العربي ساهم فيه كثيرين جدا جدا وابدع فيه كثيرين جدا جدا ولكن مع فؤاد حداد خد شكل كمان العمل الفني اللي يذاع من خلال الاذاعة ثم بعد كده التليفزيون وكأنه البداية اعتقد انه الحمد لله ربنا وفقني في ان انا اعمل شئ مختلف محمد صلاح: لو اتكلمنا على فن كفن القومة زي ما انت بتقول كده انت شعرك دايما من اكتر من ربع قرن قائم على التحذير من مخاطر يواجهها العرب ، عن دق ناقوس الخطر لاخطار اللي بتواجه الامة العربية بشكل عام مصر والامة العربية بشكل اشمل يعني انت من هنا انطلقت لفكرة إنه المسحراتي العربي مش بس مسحراتي بيسحر المصريين مسحراتي العرب عشان يقوموا من غفوتهم اللي مالهاش حل ؟ جمال بخيت: اه والله هي شكلها مالهاش حل ولكن دائما فيه مساحة للامل موجودة ودايما الواحد بيقول المهم ان الفكرة بتظل باقية وبتظل حية يمكن الاشخاص شئ طبيعي الى زوال ، الانظمة الى زوال ، انما اللي بتبقى دائما الفكرة وكلما كانت هذه الفكرة ذات مصداقية وذات نفع للناس هتفضل باقية الى ان تصادف الزمن اللي تتحقق فيه فانا من حرصي انه لو دولة الوحدة العربية دي لو مقامتش في العصر اللي احنا عايشين فيه لازم الفكرة دي تظل موجودة لانها اصبحت مسالة حياة او موت واحنا شفنا العالم كله النهاردة بيتجه الى التكتلات الكبرى فالحد الادنى في هذه المنطقة إن يقوم تكتل اقتصادي يعني على اسس نفعية بحتة حرية التجارة حرية انتقال الاشخاص حرية التنقل ، الزواج ، العمل ..دا يكاد يكون شئ بديهي ومنطقي ونفعي لا يرجع الى انه فيه شعراء متخيلين او انها فكرة رومانسية ..لا ..هي فكرة مش رومانسية هي فكرة واقعية وعملية وضرورية لاستمرار هذه المنطقة على خريطة العالم محمد صلاح: الشعر العامي كان دايما بعيد عن النقاد بشكل كبير لكن رجاء النقاش قرب من المنطقة وذكرك في مقال ليه الله يرحمه كان خلفيات المقال دا ايه ؟ جمال بخيت: الله يرحمه طبعا لكن انا معنديش فكرة لان انا تلقيت المقال زي بقية القراء او حتى حد نبهني انه الكاتب الكبير رجاء النقاش كتبك من ضمن سلسلة شعراء العامية المهمين يعني وحطك أنت كأخر العنقود في وسط بيرم التونسي وفؤاد حداد والابنودي وسيد حجاب وهذه الاسماء العظيمة وفؤاد قاعود هذه الاسماء العظيمة في تاريخ شعر العامية انا طبعا دا كان يعتبر بالنسبة لي وسام كبير جدا وان كان زي ما انت وصفته هو اشارة اكتر منه تناول نقدي لانه شعر العامية حتى الان للاسف الشديد لم يتم تناوله نقديا ومازالت حتى الدراسات الاكاديمية فيه شحيحة جدا قليلة جدا لما نقول الشاعر الفلاني اضاف كذا او ملامحه كذا يبقى انطباعات كشعراء خاصة بينا بين بعضنا البعض اكتر منها دراسات نقدية بتصل الى إنه إيه اللي يميز يعني سيد حجاب عن عبد الرحمن الابنودي وايه اللي يميز بناء عبد الرحمن الابنودي عن فؤاد حداد يعني وهكذا ايه اللي يميز تجربة صلاح جاهين ايه خصوصية تجربة صلاح جاهين ايه اللي عمله بيرم التونسي ومعملوش حد من اولاده او احفاده كل دا احنا ناس ايدينا في الحكاية ممكن نحسها ممكن نتكلم فيها ممكن نلمحها انما غير مؤسسة حتى الان على دراسات نقدية محمد صلاح: انت ليك قصيدة عن ابن بطوطة اللي بيسحر الناس من طنجه لعكا نسمعها كده ؟ جمال بخيت:بقول -مسحراتي العرب - ومعايا مخطوطة - جدي نقلها لي - من ابن بطوطة- بالمللي مظبوطة -امشي على قدمي -من طنجة للغوطة اوصل لاحلامي -وافرح بإسلامي -وأنا روحي مبسوطة -كان ابن بطوطة -من اهل خطوتنا -اشواقه مخلوطة -بسنين محبتنا -ماشي يسحرنا -ويرد غربتنا - قاللي ما تستغربش - من خطوة الايمان - انا جاي من طنجة- قاصد نسيم وهران - اتوضى في جربة - عشان اختم القران - واصلي في طرابلس- واتباهى بالاوطان - واصوم في مسراطة - واستقبل الغفران - وافطر بتمر رشيد- وف طابا يجي العيد- وهناك يدلك طير-على عكا ام الخير -ويتم خط السير -الى الجولان والشام -الغوطة تستقبلك -بالحب والاكرام -وملابس الاحرام -اسعى لاعلى مقام -ارض الحجاز تناديك -والكعبة تفرح بيك -تلقى جميع اراضيك -في عيوني محطوطة -بطوطة له بطولات -وفي خطوته كرامات -يتوضى في الانهار -ويصلي في الطرقات صليت فروضي وراه -ومشيت وراه سنوات -مطرح ما يسقي نبات -اسمع كلامه وابات -ازرع معاه فدادين -وابني معاه عتبات -بطوطة له بطولات ومغربي العبايات -طيب كانه النهر -زي السحاب والدهر -رافض حدود القهر-والختم والجوازات ..... محمد صلاح: انت ليه مسمي القصائد في ديوان مسحراتي العرب حلقات مش قصائد ؟ جمال بخيت: لان انا الحقيقة كاتبها في شكل حلقات تليفزيونية يعني بمعنى ان انا كل قصيدة فيهم انا كاتبها على شكل حلقة تليفزيونية يتناغى فيها الشعر مع الغناء مع الانشاد ال3 فنون دول فمن هنا جاءت تسمية حلقات محمد صلاح: فيه حلقات من ديوان العرب اتنشرت؟ جمال بخيت: يعني زي ما كتبت في مقدمة الديوان الاول إن انا اتخيل الديوان الكامل لمسحراتي العرب 30 ليلة ال10 اللي اتكتبوا أتنشروا ال10 التانين لم ينشروا بعد ال10 الاواخر في ذمة ربنا سبحانه وتعالى حين يكون في العمر بقية وفي الشعر مدد محمد صلاح: انت كتبت حلقة من الحلقات أو قصيدة من القصائد بعنوان قراء القران الكريم سميتها حس التلاوة محدش قرب منه المنطقة دي جمال بخيت: ماهو دا المعاناة اللي انا بعانيها في المسحراتي الحقيقة هذا التحدي القائم مع البناء العبقري اللي عمله فؤاد حداد ان انا من اللحظة الاولى بحاول اشوف موضوعات لم يتم تناولها من قبل على قد ما اقدر او موضوعات تم تناولها عند شعراء تانيين بس مش عند مسحراتي فؤاد حداد انا زعلان على انه تصادر لنا مدارس اخرى في القراءة بينما احنا المدرسة المصرية في تلاوة القران الكريم انا رايي انها مدرسة لم يجود بمثلها الزمان حتى يقولك عليها ايه من التعبيرات يقولك دولة القراء انه عملوا دولة قراء القران الكريم اسماء عظيمة جدا في تاريخ التلاوة كل واحد فيهم يعني شخصية وكيان واحساس وبعدين هذه الدولة بهذه الاسماء انتشرت في كل دول العالم الاسلامي محمد صلاح: طب نسمع حاجة ؟ جمال بخيت:بقول *مسحراتي العرب ترتيلي -بيصب في نيلي رقة - واحساس وحلاوة - وبنيت وزوقت سبيلي - على ندى احلى تلاوة لسّاني باسمع في الحصري - بقلبي وبروحي وبصري - تجويد على فن وتغريد - على شوق من الحس المصري - على حنان على مية ورد على رحمة في عروقي بتسري - لساني بسمع في الحصري - وبعيش على صوته نعيمي- ابدا صلاتي وتسليمي -يصاحبني صوت البهتيمي يباركني حس المنشاوي -يطربني حس الطبلاوي -صوت عندليب ودعاء كروان -وصفولي حس الشيخ عمران -ساعة ما يتلو من القران ايات رضا واعجاز وبيان -الماذنة لما ارتفعت - عرفنا ان الشيخ رفعت -بيشد عودها بادانه -وهي دايبة في وجدانه -نور الايات لمس العمران كل الشهور حاوطت رمضان - الحضرة بدات بالغفران - عبد الصمد يتلو الرحمن - والنور وبعديها الفرقان - ياتينا من حلو الترتيل -وكاننا في حضرة جبريل -احمد ندا يقرا الانسان - لروح تطيب من اوجاعي - يهل صوت الشعشاعي - سقيني من نبع الكوثر - التوبة في ضميرنا بتحضر ومصطفى من بيت سماعين - صب الندى في روح السامعين- نعلى معاه من دنيا لدين - صوت العرب يا مستمعين - بيذيع تلاوة علي محمود جدي انتشى واخر العنقود - لما ابتدى بسورة الاخلاص - وقل اعوذ برب الناس - من البسملة بنقول الله - ونعيدها تاني في صدق الله - اسمع شعيشع واتهنى - على فرع منسوب للجنة - الصيف يغرد والبنا - لقينا في الصورة وطننا - وراينا في الروضة مكاننا - الصيفي غرد والبنا لاعرفت امشي ولا استنى - وبلادي مفتوحة قصادي - سمعت صوت شيخنا القاضي - عبد العظيم زاهر راضي - واحمد نعينع لو يقرا - بالقلب اسمع وانصت له - ومصطفى غلوش راغب - يقرا الايات فابتسمت له - وانا رايح اسّحر في بلادهم - وامد قلبي بمدادهم - الاقي ناس بتقول الله والاقيني معرفش عددهم - اوصل بصوتي لابعادهم - اقول يا مصر المحروسة - دول الولاد وانا اسعدهم - ولا حد يعزف أرغولك - ولا حد في الحق يطولك - ولا حد بيكي هيتساوى - على ندى احلى تلاوة - انت الخلود مهما تروحي - لا بتغرقي ولا بتنوحي - الدنيا تحتار من صمتك - وبتهمسيلي وتبوحي - انت الخلود - وانت حياتي ونجاتي - وسفينة نوحي - بسم الله اسمع ترتيلك - المولى يهديني فتوحي - لو الزمان عنك حاشني - وصوتك الحلو وحشني - يقابلني صوت طه الفشني - تطيب على البعد جروحي - النقشبندي بيمشي وحيد - يملا بلاد الله تغريد - تسابيح مدد وغنا وتجويد على ما تيسر من روحي محمد صلاح: الله .. قولي ياجمال اناس دلوقت في المجال بتاع الشعر والالحان والقصائد الكل بيلهث ورا المكسب المادي يعني بس قصائد جمال بخيت بتاعة الناس اللي مابتدفعش يعني ازاي ماشية الحكاية دي معاك ؟ جمال بخيت: والله فيه القناعة الاصلية عندي والمفروض تبقى عندنا كلنا انه الرزق في ايد ربنا يعني هذه حقيقة ازلية فالرزق في ايد ربنا يعني اكيد مش في ايد لا مطرب ولا مطربة ولا شركة انتاج ولا شركة كاسيت ولا مدير محطة ولا مسئول في دولة يعني هو الرزق بايد ربنا الل انا بعمله ايضا دا مستوى من الابداع له متذوقيه محمد صلاح: بس ما بيدفعوش يعني اسهل انك تستغل هذه الموهبة في كتابة اغاني يعني عملت اغاني يعني الموهبة دي ممكن تخلي صاحبها يمشي مع السوق وتترات افلام مسلسلات وحكايات لطيفة جمال بخيت: بس الحقيقة الواحد بيبص انه عينك على انه تكوش على قرشين النهاردة وتروح مع اللي راحوا يعني اللي ماتوا وهما احياء ولاّ تنحت اسمك على جدار معبد فرعوني خالد لحد النهاردة الفنان اللي نحت عليه كل الناس بتيجي من اقاصي الارض عشان تتفرج على ابداعه وهو مات من 7 الاف سنة يعني دي اختيارات في الحياة انت مختار ايه ومع ذلك عايز اقولك انه انا باللي انا عامله باصراري على انه القيمة تبقى هي متجهي الحقيقة ان انا موجود والحمد لله وعندي حضوري محمد صلاح: مبسوط ؟ جمال بخيت: لا انا عايز اقولك انه من ناحية الناحية المادية افضل كتير من شعراء استهلكوا نفسهم في التعامل مع السوق محمد صلاح: انت عملت قصيدة اتعملت في فيلم دكان شحاته بصراحة يعني انت انسان تكنولوجي يعني متابع إل Face Book وإل Internet وإل YouTube جمال بخيت: لا والله انا بس قالولي خش يا جمال شوف ... محمد صلاح: انا خشيت بالنيابة عنك وشفت وهقولك اللي شفته الانطباع انه القصيدة وانت بتلقيها مسجلة نجاح اكبر بكتير من النجاح اللي حققته في الفيلم نسب المشاهدة والقراءة عليها في إل YouTube وال Google وغيرها من المواقع المهمة اللي بيرتادها الشباب عالية جدا انت تفسر لي دا بايه ؟ جمال بخيت: هو طبعا القصيدة اتقالت الاول قبل الفيلم يعني بفترة يمكن ب3 او 4 شهور محمد صلاح: اه بس لما اتقالت في الفيلم كاغنية ما غطيتش عليها ؟ جمال بخيت: لا ما هو دا صعب ان فيه قصيدة وبقالها كل هذا الحضور عند الناس صعب انه لما يتغنى منها جزء يعني اللي اتغنى في الفيلم مكانش القصيدة كلها لما يتغنى منها جزء صعب انه يغطي عليها ولكن عايز اقولك على حقيقة تثبت النجاح المذهل للاغنية ، يمكن بالنسبة للشريحة اللي بتتعامل زي ما أنت بتقول مع إل Face Book وإل Internet والتليفزيون لان الناس شافت القصيدة دي في التليفزيون لا عايز اقول فيه عالم اخر واحنا بنسجل الاغنية انا شاورت عليها وقلت يا جماعة الاغنية دي هتتغنى في الافراح الشعبية فطبعا خدوا كلامي على محمل الهزار محمد صلاح: وأنت في الهزار فظيع جمال بخيت: وأنا الفكرة عني زيي ما أنت بتقول إن أنا بهزر كتير فما أخدوش كلامي على محمل الجد ، جينا وإحنا في شهر رمضان كنا بنصور نفس المطرب الملحن الجميل أحمد سعد اللي عمل الغنوه في الفيلم هو نفسه اللي كان مشترك معايا في مسحراتي يا مصراوية اللي كان بيتزاع على القناة الأولى في رمضان فأثناء التصوير كنا في شارع المعز لدين الله الفاطمي في القاهرة القديمة أتلموا شوية من شباب الجمهور بيتفرحوا على التصوير واحد منهم ما يعرفنيش إنما يعرف أحمد سعد قاله يا أستاذ أحمد وأنت نجم الجيل وأنت راجل كذا وأغانيك العظيمة وأبتدا يفتح معنا حوار وعرفنا إن هو مطرب وسمعنا صوته ... شيء هايل وبعدين قاله على فكرة يا أستاذ أحمد أنا بغني أغانيك في الأفراح وأغنية مش باقي مني أنا يكسر بيها الدنيا في الفرح ، أنا افتكرت إنه بيقول الجملة دي كده مجاملة لمطرب هو بيحبه وإذا به انطلق وسمعنا الأغنية من أولها لأخرها ويجي في حتت يقولها بوجع وحته يقولك هنا بقى لازم أرقص الفرح كله لأن فيه حاجه في الغنى الشعبي تلاقي كلام حزين راكب على إيقاع راقص ما تعرفش التوليفة دي بيعملوها أزاي إنما دي مثلا اللي نجّحت كتاب حياتي يا عين وكانت بتتغنى في كل الأفراح الشعبية وحاجات لعبد الباسط حمودة تلاقي فيها وجع وفيها جرح شديد جدا إنما إحساسي اللي أنا حسيته إن الغنوة دي بإيقاعاتها دي إنها تنتمي لهذه الفئة الوجع الشديد إنما في نفس الوقت فيه إيقاع شعبي شديد الشعبية حتوصل للأفراح وده بيدل برضه إن القصيدة نجحت عند شريحة كقصيدة وكأغنية نجحت عند شريحة أخرى محمد صلاح: طب سمعهلنا نشوف تنفع في الأفراح ؟ جمال بخيت: بقول*مش باقي مني - غير شوية ضي في عنيا - أنا حدهملك - وأمشي بصبري ف الملكوت - يمكن في ضوئهم تلمحي خطوة تفرق بين الحياة والموت- مش باقي مني - غير شوية نبض ف عروقي - خُدي وعيشي - وأفتحيلي تابوت - أفرح بريحة ورد فرعوني- وربنا ف عوني - إذا دخلت الجنة ولاّ النار - حشتاق إلى ضحكتك- وقعدتي ف الدار- والقهوة متحوجه - من طيبة العطار- في كل يوم الصبح- أشرب حليب قبطي- وف النهار والمسا - أمسك ستار الكعبة - لو سبتي - وأثبت إذا هربتي - أهديكي عمري - وحسي وجوارحي- أهديكي جرحي- هو اللي باقي ف دنيتي- لما خلص فرحي - مش باقي مني- غير شوية لحم ف كتافي- بلاش يتبعتروا في البحر- بلاش يتحرقوا- ف قطر الصعيد ف العيد- بلاش لكلب الصيد تناوليهم - خدي اللي باقي من الأمل فيهم- وأبنيلي من عضمهم- ف كل حارة مقام - وزوريني مرة وحيدة - لو كل ألفين عام - ألم الجراح يتلم- مش باقي مني-- غير شوية دم - متلوثين بالهم- مُرين وفيهم سِم - كانوا زمان شربات- والنكتة سكرهم- شربتهم الخفافيش- في قلب أوكارهم - مش باقي مني- غير شوية دم- مقدرش أسقيكي – مواجعهم- ويرضة مقدرش - ارميكي وأبيعهم - يمكن في مره- تعوزي تطلبيني شهيد ح أحتاج يوميها الدم - يمضي على شهادتي- مش باقي مني - غير شوية قوة ف إرادتي- على شوية شعر - من خطي- حاسبي عليهم - وأنتي بتخطي وأنتي صبحك دلال - بتعطري شطي - مش باقي مني - غير شوية ضي في عنيا - أنا مش عايزهم- لو كنت ح المحك - وأنتي بتوطي- في معركة مفيهاش- لا طيارات ولا جيش - وأنتي في طابور العيش- بتبوسي أيد الزمن - ينولك لقمة- من حقك المشروع- مش باقي مني - غير شهقة شهقة ف نفس مقطوع - بفتح لها سكة - مابين رقه وضلوع- مابين غبار ودموع- وأنا تحت حجر المقطم- ف الدويقة بموت - أنا والعطش - لجوع يئن تحت التراب- وأنا صوتي مش مسموع- يا حلمنا الموجوع - من المرور ممنوع- مستني لما يمر- موكب سلاطينك- مش باقي مني – غير شوية رحمة - من طينك- على شوية صبر- من دينك- مش باقي مني - غير حبة غنا تايهين- ف الضلمة مش لاقين - حِس الفواعلية- ولا صوت مراكبي عفي- فوق المعدية - ولا صوت بنات العذارى- في كل صبحية- والغنوه أمنية- يا ما نفسي أقابل - حبيبي وأنا ع الزراعية- صوتك صوتهم غاب- وأنا تحت حجر المقطم - بموت لوحديا - الليلة راحت عيوني- تطل ع البستان- وجناين الرمان - رجعتلي توصف- عناد الغل والدخان - وسحابة سودا تضلل- ع الغنا الغلبان- رجعتلي توصف- هبوب الموت - على الألوان - رجعتلي توصف - خيال الذل - ف موائد الرحمن- مش باقي مني- غير شوية كُفر بشروقك- وأنا منبع الإيمان- السجن عشش ف قلبي- وماشي ف شوارعك- نفس اللي باعني وخدعني- بالرخيص بايعك- حشيل حمولي أنا- ولاّ حشيل حِملك- ما عدت أملك شيء- فيكي ولا فيّا- ولا قيراط ولا بيت - ولا نسمة صافية- تلاغي النيل بحُريّة - مش باقي مني غير شوية حُب جرحني- ولا باقي مني - غير شوية ضي ف عنيا محمد صلاح: أنت نشأتك في حي مصر القديمة تحديدا في منطقة ابو السعود لو حد تاني نشأ في حي تاني راقي شوية ونشأ نشأة مختلفة يقدر يطلع كلام زي ده جمال بخيت: أه طبعا ملهاش علاقة خالص لكن مما لا شك فيه النشأة زمانيا ومكانيا بتأثر في تكوين أي شاعر في الدنيا لكن إحنا شفنا نماذج كتيرة زيي أحمد بيه شوقي كتب وهو من أصول تركية وكتب عن مصر وفي منفاه زرف الدمع الغزير يعني عايز أقول لك إن الصدق والإحساس بالناس ليس حكرا ومقدرش أجنب الأغنياء إنهم يحسوا بالأخريين إحنا شفنا سياسيين أولاد بشوات واعتنقوا الفكر الماركسي حساسية وحبا في إنصاف البسطاء أو الفقراء دي وجهة نظرهم وده كان سائد في وقت كتير فإذاً مقدرش أقول أن كل مَن وُلِد وفي فمه – بحكم الطبقة أو السكن – ملعقة من ذهب مش حيحس بأوجاع الناس أو بآلامهم محمد صلاح: بيعود لأيه ده؟ جمال بخيت: إنسانيته وثقافته وموهبته وبذرة الشعر اللي هي ربنا بيحطها جوه الإنسان مرتبطة بقيم الحق والخير والجمال بمعنى ما تلاقيش شاعر حقيقي بيدعوا إلى الشر أو إلى القبح يعني كل شاعر حقيقي ربنا أعطاه موهبة الشعر أعطاه معها حب الحق والخير والجمال ، فالمسألة إن أنا أبن الحي الشعبي وبتشرف بالانتماء للحي الشعبي وابن صعيد مصر لأن الحي الشعبي اللي أنا نشأت فيه كان مصب لهجرة داخلية من قرية السوامعه شرق في الصعيد إلى حي مصر القديمة فأنا جمعت بين الحسنيّيّن يعني صعيدي في مصر القديمة محمد صلاح: صعيدي في مصر القديمة بيحب أم كلثوم أوي وكررها في قصايده أكثر من مره لكن خصها بقصيده معينه بتاعتها .. ليه؟ جمال بخيت: أصل أم كلثوم دي مش مطربه من وجهة نظري المتواضعة دي زي ما كانوا بيقولوا الشعر ديوان العرب أنا بقول أغاني أم كلثوم هي ديوان حياتنا المعاصرة .. أم كلثوم طاقة فذة في مجال الطرب هي معجزة طَربيه دي مبدئيا بس لماتحط دي على جنب وتبص تلاقي أنها رحلة كفاح فكري رهيبة جدا .. واحدة مولودة في قرية بسيطة جدا تتحول في يوم من الأيام من هذه البنت اللي في قرية بسيطة خالص على هامش الحياة تقعد قصاد كبار شعراء مصر وتناقشهم فيما يكتبون وأحيانا تقترح تعديل الشاعر يقر إن التعديل اللي اقترحته أم كلثوم أفضل من اللي هو كان كاتبه محمد صلاح: وشعراء بوزن مين؟ جمال بخيت: بوزن أحمد شفيق كامل هو اللي حكى لي الحكاية بنفسه يعني مش حاجة سمعنا عنها دا أحمد شفيق كامل حكى لي بنفسه هذه القصة فهذه الثقافة اللي وصلت لهلا أم كلثوم اللي هي فهمت إنها محتاجة للثقافة فلجأت إلى مصادرها يعني بتطلب من أحمد رامي إنه يثقفها وإنه يقرأ لها الشعر العربي القديم وإنه يشرحه لها ويشرح لها معانيه ده جانب أخر تعالى لجانب ثالت رباعيات الخيّام على سبيل المثال ، رباعيات الخيّام دي عمل أدبي عالمي أخذ صفة العالمية وتُرجم من الفارسية إلى أغلب لغات العالم فأحمد رامي على استحياء يترجمه إلى اللغة العربية تقدر تقولي في الوقت اللي أحمد رامي ترجم فيه هذا العمل فيه كام واحد في الأمة العربية من أولها إلى أخرها يسمع عن حاجة أسمها رباعيات الخيّام حقول لك عشرات لن يتعدى العشرات وحتى لو أحمد رامي نشرها في ديوان حيبقى مئات اللي حيسمعوا عن ربعيات الخيّام وحيشتروها وحيقروها أو حيبقوا بضعة آلاف فيجي صوت أم كلثوم يغني هذه الرباعيات فملايين والملايين بتتكرر لأن كل جيل بيسمع رباعيات الخيّام بتضاف إلى الملايين التي استمعت إليها .. مثلا الهادي آدم مَن منا كان من الممكن أن يسمع عن الهادي آدم الشاعر السوداني الكبير لولا "أغدا ألقاك" اللي غنتها له أم كلثوم .. إبراهيم ناجي شاعر عظيم ومؤثر في مجال المثقفين نقلته الإطلال إلى الشارع محمد صلاح: طب ورينا نظرت إليها أزاي ؟ جمال بخيت: عملت لها حلقة من حلقات مسحراتي العرب لأن أنا معتبرها من الشخصيات اللي سحرت العرب على قيمهم وعلى تاريخهم وعلى أمجادهم وجمّعتهم أمه واحده أتلمت حول أم كلثوم بصرف النظر عن الحدود السياسية المصطنعة اللي بينهم فقلت في مسحراتي العرب* من المحيط للخليج - صوتها يونسني - هو اللي أسسني- على سلو قلبي - على أراك عصيّ- على عرفت الهوى - على دليلي احتار- على إبراهيم ناجي - بيغني للأطلال- على لحن سنباطي- شاف الهوى دمعي- وشربت شرباتي - على صوتها وحضورها- وف ضلها ونورها- سمعت عبد لوهاب في يوم لقاء السحاب- بينادي ع الأحباب- أهل الهوى ياليل- فاتوا مضاجعهم- وأتجمعوا يا ليل - صحبة وأنا معهم- مع بيرم التونسي- مع بليغ حمدي وأحمد شفيق كامل - الليلة حنغني - مع شعبنا العامل- قرب يا شيخ الغنى - قرب يا زكريا - غني بحُريه- هات القصيجي معاك- والعود وهات الرضىفي حضرة السيدة ثومه- من المحيط للخليج - صوتها يونسني - هو اللي أسسني - على همس رق الحبيب- سلوا كؤوس الطلى في حانة الأقدار- جددت حبك ليه- حيرت قلبي معاك- حكم علينا الهوى- حولنا مجرى النيل- وعشقنا كل جميل- يرقص على غصني- لحن لداود حسني مع كلمة من رامي- ومعنى من شوقي- مع نبض عم جاهين - لما يقول راجعين- إلى فلول خالدة- في حضرت السيدة - السيدة ثومه- من المحيط لخليج صوتها يونسني- هو اللي رباني- على عطر رباني- هو اللي أسسني- على دولة للوحدة والحب غايتها- يحضرها صوت ناصر- يحكي حكايتها -يحكي ضمير زايد- يروي في نخلتها- قلب الملك فيصل- يديها معناها- هواري بومدين - بيعلي رايتها- في دولة الوحدة- كل الشعوب حاضرة-كل القلوب بتطل على وعد ست الكل- على سحر ولد الهدى- على دارت الأيام- والحكمة من حِسها- رباعية للخيّام- برضاك يا خالقي- يحضر حديث الروح- حارة وصحارى ودوح- ثورة وأمل وجروح- وكل عطر يفوح- وكل قلب يبوح- حاضرين في حفلتها - عايشين في غنوتها-أمة حنين منشدة في حضرة السيدة- السيدة ثومه -كنا نسيج - وبقينا نزيج - من المشاعر- والأهازيج- أسرتنا ثومه بقولة آه- لقينا معنى جميل وبهيج- فأصيلة قالوا الناس الله- وصل صداها لحد مليج- غنوتها ردت فينا الروح- أم القوين سهرت قي أبو تيج- الشعر يملا الدنيا زهور- احساها يملا الشعر أريج- دي أمه واحدة بإذن الحق- جمّع في صوتها محيط وخليج محمد صلاح: يا عيني اللي بيتابع نشاطك في السنين اللي فاتت بيلاحظ إنك دايما قلِق وعندك شكوك في جدوى الأغنية والقصيدة من الأساس يمكن في ذهنك عشان قعدنا نغني ونكتب لفلسطين خمسين سنة طب أنت شايف جدوى الشعر والزجل والشعر العامي والقصائد والغنى اللي بجد رايح فين؟ جمال بخيت: هو انا قلت هذا الكلام وأعلنت هذا القلق وهذا الشك وقلت فعلا انه احنا قعدنا نغني لفلسطين 50 سنة فاحتلوا العراق إذن الغنا ليس له من سلطان والقصيدة واللوحة والمقطوعة الموسيقية ليس لهم من سلطان ولكن هذا لا يعني انهم بلا جدوى هما يبقى لهم جدوى في حالة واحدة في حالة تكامل الأدوار يعني إذا إحنا فضلنا كأمة معتمدين على الشعر فقط الشعر مش هيعمل حاجة معتمدين على الغنا فقط الغنا مش هيعمل حاجة لابد من انه تتكامل الأدوار كل حد عليه دور يعمله .. اللي عليه دور انه يحارب بالسلاح لازم يحارب بالسلاح واللي عليه دور انه يحارب بالعلم لازم يحارب بالعلم واللي عليه دور انه يتفوق بالسياسة لازم يتفوق بالسياسة واللي عليه دور انه يعمل تقدم تكنولوجي يعمل تقدم تكنولوجي واللي عليه دور انه يعلم الأجيال تعليم صحيح ومنتج يعلم الاجيال تعليم صحيح ومنتج .. مع كل هذه الأدوار يأتي دور الغناء عشان يشحذ الهمم ويوسع دائرة الأمل ويعلي من قيمة كل شئ جميل وكل انتصار في حياتنا انما اللي حصل ان كل هذه الفاعليات اللي انا اتكلمت عنها مش شغالة والشعر لوحده والغنا ..انما هنقعد نقول شعر،الشعر في هذه اللحظات ليس له جدوى ... محمد صلاح: انتى القيت قصيدة في أوزبكستان في جامع الإمام البخاري ؟ جمال بخيت: آه.. دي حكاية عجيبة جدا جدا من أعجب ما في عمري انا اعتقد أن المشهد دا ذروة مشواري الشعري كله .. أنا كاتب قصيدة الإمام في مسحراتي العرب وفي بحثي عن موضوعات محدش طرقها قبل كده عدت بذاكرتي الشعرية كده اكتشفت إن الإمام البخاري دا صاحب اهم كتاب للمسلمين بعد القران اللي هو "صحيح البخاري" ومع ذلك الإمام البخاري محدش كتب عنه قصيدة ، ربنا ألهمني وكتبت عنه قصيدة ونشرت في ديوان ، بعد الحكاية دي ب 10 سنين فوجئت بتليفون من المستشار الثقافي المصري في أوزبكستان بيقولي يا جمال انت ليك قصيدة اسمها الامام البخاري والإمام البخاري ابن البلد اللي احنا فيها دي اكتشف القصيدة هو بنفسه واتصل برئيس الأوبرا المشرف الموسيقار هناك عندهم مشرف على فرق الأوبرا زيي مثلا ما نقول هنا سليم سحاب عندنا الراجل دا يطلع بالصدفة انه كان عايش في مصر فترة فبيعرف يتكلم عربي باللهجة المصرية فلما قرا القصيدة انبهر بيها هو طبعا الامام البخاري منسوب الى مدينة بخارى اللي هي إحدى المدن الكبرى في أوزبكستان فخد قرار بسرعة انه هذه القصيدة لابد من إنها تلحن باللغة العربية وقرروا إنهم يلحنوا النص العربي ويلحنوا النص الاوزبيكي ويعملوا احتفالية في أوبرا طشقند دار الأوبرا في طشقند اللي هي عاصمة أوزبكستان وبالتالي فبقى من باب الضرورة انه يحضر الشاعر اللي كتب القصيدة المهم سافرت انا وعملوا لي برنامج مدته اسبوع في 3 مدن مهمة هناك وكانوا محضرين القصيدة مكتوبة على عدة لوحات مكتوبة بالعربي وبالاوزبيكي بالترجمة بتاعتها وكان المفروض في كل مدينة من دول انا باهدي هذه القصيدة إلى جهة ما سواء في سمرقند او المفروض اهديها للمتحف ساعة ما وصلت عشان اهديها وصلت ساعة صلاة الجمعة فكان مفتي سمرقند هو اللي هيلقي خطبة الجمعة فوجئت بيه بأنه إحنا دخلنا عشان نصلي فكان هو عنده علم بالموضوع ففوجئت بيه بيحكي القصة للمصلين وبيقول اسمي في الوسط انا مش عارف هو بيتكلم على إيه بيتكلم بالاوزبيكي لقيت المستشار الثقافي المصري بيقول قوم يا جمال قلت له اقوم فين قاللي قوم عشان المفتي قدمك عشان تقول القصيدة فوجئت فعلا بان أنا في هذا المحفل الديني الجميل وقفت والناس مهيأة بشوق .. هما عندهم حب للإسلام بشكل كبير جدا 30 % من اللغة الاوزبكية كلمات عربية اللي حاضرين دول بما إنهم متدينين فشئ طبيعي انهم بيقروا قران فعندهم إلمام إلى حد ما باللغة العربية منهم كتير دارسين لعلوم الدين باللغة العربية ساعة ما وقفت وقلت القصيدة في الجامع في وقت صلاة الجمعة في مشهد نادر الحدوث فوجئت بان الجامع كله بيضج بالتصفيق بعد انتهاء القصيدة وكانت الحقيقة لمحة عجيبة في حياتي بحمد ربنا عليها محمد صلاح: نسمع قصيدة البخاري . جمال بخيت: بقول* مسحراتي العرب - بيقرا ويسمع-صحيح البخاري - رواه للمقيم - والنسيم اللي ساري- رواه للبوادي- بصوته الحضاري- لذات المباني - وذات الصواري- رواه للسحاب- اللي ضلل حنيني - رواه للأراضي - اللي باست جبيني - رواه لابن عربي - وإيمانه اليقيني- رواه للأوروبي - ولسانه اللاتيني - وتركي وفارسي - وياباني وصيني- رواه اندونيسي- وماليزي وتتاري - حديث المحبة - رواه البخاري محمد صلاح: انت ليك قصيدة بعنوان الأحلام غناها علي الحجار من فحوى كلامها انت مستني شئ يحصل مستني حلم يتحقق ويمكن كل حد بيسمعنا عنده حلمه اللي نفسه يتحقق عن طريقه او يحققه له حتى أو مستني حد يرجع يحقق له احلامه من ربع قرن أو اكتر سمعت منك قصيدة بعنوان ارجع بقى نسمعها كده والمعنى في بطن الشاعر جمال بخيت: لا المعنى معلن هي مجموعة من القيم اللي انا بتمنى فعلا انها ترجع تاني ويبقى نفس قوة حضورها في الحاضر هو بنفس حضورها في الماضي وفي المستقبل محمد صلاح: طب سمّعنا..؟ جمال بخيت: بقول* ارجع بقى - وفك حبل المشنقة - وامسح همومنا باللُقى - يا جدرنا تحت التراب- يا حلمنا فوق السحاب- ياعمرنا طال العذاب - في الانتظار رجعوا التتار - لكننا اشواك بتتحدى العطش - وجنود بتتحدى الفرار- نسقط ساعات - ننزف ساعات - لكننا نفضل كبار - نفتح عيون للانبهار متشوقة فارجع بقى - وفك حبل المشنقة - وارفع راياتك - يا ابي قريش - بتسال عن نبي - يهديها من بعد العمى - خالد قتل مسيلمة - لكن جنوده الكدابين - عينهم في طابا - عدوا فرسان الخطابة - ويلجموهم بالسكوت - في عصر بيروت الحزين - خالد قتل مسيلمة - لكن جنوده الكدابين بيفتتوا بصبر - وبيحفرولي - في سينا قبر - وبيركبوا نيلي العنيد - وبيخنقوني في الصعيد - بكلام نكت وبتريقة - فارجع بقى - الشمس سكنت كل غرب - حلفت مارتجع - للشروق من أي شرق - ان لم تكن في الانتظار - انت وسيفك والتتار - تحت القدم - فاقضي بصوتك ع العدم- اعدل موازين الزمان - رتب في الفضا - واكسي وجوهنا بالرضا - بعد الشقا - دي الامة لسه محتجاك - والارض لسه مهياة - فارجع بقى - ارجع بقى محمد صلاح: كل واحد عنده حلم عايز يحققه مستني حد يحققه له او يقدر يحقه بنفسه ، قال الشاعر جمال بخيت كلامه النهاردة وقال شعره كان شعره كلام جميل كلام معقول المهم انه كان شعر وكلام ....... مسئول خلص الكلام نلتقي في الحلقة المقبلة
