طارق رمضان:ميزانية اتحاد الكرة تكشف فضيحة إنفاق مليون و600 ألف جنيه علي كأس السوبر المصرية؟

المؤكد أننا عندنا مستند - زي عندنا فضائية كده - من واقع المستند اتحدث معكم أقول لكم الحقيقة كاملة بدون رتوش وأتعجب معكم وسنجلس طويلا طويلا نتحدث ونقص علي اولادنا واحفادنا كيف حدث هذا كيف تم صرف هدا المبلغ الضخم علي مباراة واحدة أقيمت في دولة واحدة نظمتها شركة واحدة ودفعت قيمتها دولة الإمارات الشقيقة؟
كيف ننفق كل هذه الأموال علي مباراة ثم نكتشف أن جميع التكلفة والنفقات قامت بها دولة الامارات الشقيقة في مباراة السوبر الشهيرة والتي كشفنا أسرارها وكنا منفردين بأسرار بيع مباراة السوبر في الإمارات؟ لكن المستند كشف أسرارا أخري وطرح أسئلة أخري كثيرة خاصة أن الأموال الموجودة في نصوص مصروفات النشاط الفني في اتحاد الكرة مرتبطة ببعضها -يعني كل نشاط قدامه مصروفاته؟
فليس لدي اي مانع أن تعطي مرتبات وأجور لأعضاء الجهاز الفني لمنتخب مصر الاول 9 ملايين جنيه ولا تقولي إن أعضاء المنتخب الاوليمبي بياخدو 7 ملايين بناقص 2 مليون جنيه عن المنتخب الاول- ايش جاب لجاب - انت اوليمبي يعني صغنون لسه - أما الكبير كبير- وبعدين إن عايز حسام البدري وأعوانه زي مستر كوبر وأعوانه ؟ بتهرج - لازم تعرف ان مستر كوبر ليه ضهر ومسنود إما أنت يا منتخب اوليمبي مين بقي بيسندك مين بقي حضرتك؟
بس -7 ملايين جنيه برضوا حلوين مش وحشين يعني -هو صحيح واحد بياخد 90 الف دولار شهريا وانت بتاخد ياعم حسام يا بدري 120 ألف جنيه شهريا بس انتم زي بعض يعني ماجاتش علي فارق الدولار يعني - المهم تحيا مصر-؟؟
لكن تخصص3 ملايين جنيه مصروفات المنتخب المصري لمنتخب مصر النسائي - التابع للدكتورة سحر الهواري - ومليون جنيه للكرة الشاطئية هو ده اللي مش ممكن ابدا علي العموم النفقات دي وحكاية المنتحب الوهمي المسمي كرة القدم النسائية ومدي أهميته وقاعدته الجماهيرية - ده موضوع كبير اااوي هنفتحه في مقالات قادمة إذا كان لنا عمر واستمرار بقي- البند العاشر من مصروفات النشاط الفني في الموازنة التقديرية لاتحاد الكرة المصري لعام 2015-2016 هي المفاجأة الكبرى وعليك- أن تضع ملايين علامات التعجب والانبهار والازبهلال كمان- فالبند يتحدث عن كأس السوبر المصرية وقبله بالضبط يتحدث بند آخر عن مصروفات بطولة كأس مصر وبطولات الدوري العام -اول - تاني - تالت - جميل رائع لكن ماهو التعجب في الحديث عن مصروفات كل هده البطولات أقولك؟ حضرتك كأس السوبر المصرية أقيمت فين - في الامارات - مين اللي دفع فلوسها - الامارات - مين اللي وجه الدعوة للحضور؟ الامارات مين لي دفع مصروفات الطيران والشاي والسكر والباتيه وغيرها ؟ الامارات ؟
طيب اذا كل حاجة دفعتها الامارات وكشفنها كلها في المقالات اللي فاتت؟ فتلاقي - ان اتحاد الكرة المبجل - المحترم - حاطط في بند مصروفات النشاط الفني مليون و600 الف جنيه مصروفات كأس السوبر المصرية؟؟ لازم تستغرب - وتنح -وتسأل ؟ صرفتم مليون و600 الف جنيه علي كأس السوبر المصرية ازاي يعني؟ حد واقف في البلكون بيدخن سيجارة يقولي- بدلات سفر لاعضاء الاتحاد اللي كانوا هناك- أرد وأقول مليون و600 الف بدلات سفر ليه كل عضو هياخد كام والبعدين كلهم كانوا كام يعني اربعة خمسة ستة علي اكتر تقدير؟؟
هيقولي احتمال تكون دي تكلفة الكأس الجديدة اللي كانت زي الدهب اللي استلمها النادي الاهلي - ارد واقولك الحاج محمود الشامي قال إن الكأس دي تكلفتها 150 الف جنيه والاتحاد لم يتكلف أي شيء وكمان دفعت ابو ظبي تكلفتها في اطار أنها هدية للفريق الفائز؟؟ يبقي إزاي تم وضع مبلغ مليون و600 الف جنيه في المصروفات علي النشاط الفني في اتحاد الكرة ؟؟ مباراة واحده تتكلف مليون و600 الف ليه يعني كانت مباراة ايه ثم ان وضع المبلغ في الميزانية إذن نحن أمام مليون سؤال - حضرتك قمت بيع المباراة الي برزنتيشن وحصلت علي 150 الف جنيه طبقا لما سمي بايرادات النشاط الفني - وحضرتك لم تحصل علي اية حقوق سواء في التذاكر أو الإعلانات علي الفانلات او الملعب -او اي حاجة يعني - يبقي المبلغ الموجود في الميزانية ده إيه ؟؟ حد يقولنا يمكن احنا غلطانين مثلا ومش عارفين نقرا أو لازم نغير النضارة مثلا - لكن البند واضح جدا بند عشرة في مصروفات النشاط الفني- أيوه اسمه كده - شكلة كده ؟؟؟؟
لم يفسر لنا اتحاد الكرة المصري لماذا وضع هذا المبلغ في مصروفاته واين أنفقه ولماذا أنفقه في الأصل إذا كان هناك شركة تنظيم وتكسب وأعطتك مبلغ 150 ألفا مقابل حقوق البث والتنظيم للمباراة ؟ لم يفسر لنا اتحاد الكرة المصري كيف انفق مليون و600 الف علي مباراة واحدة وأنفق 350000 فقط علي مسابقة كاملة اسمها كأس مصر يعني دور 16 ودور 8 ودور4 ودور نهائي يعني ماتشات كتيرة اوي اوي ؟ أنا في الانتظار لأي رد من اتحاد الكرة يفسر لنا اللغز ويرد علي السؤال كيف انفقتم مليون و600 الف جنيه علي كأس السوبر المصرية