البنت ميار وأبوها الغيطي × حوار مختلف جداً

محمد الغيطي سيناريست مختلف بأفكاره.. وميار الغيطى نجمة صاعدة استطاعت أن تلفت الانتباه لموهبتها خلال فترة بسيطة .. ولأن ميار هي بنت الغيطي.. كانت السطور القادمة تحمل مزيجا من حوار بين أستاذ وتلميذته وأب وابنته.. ولذلك تركنا الكلام كما هو بدون أي تدخل منا .
تصوير : أميرة عبد المنعم
أستاذ محمد .. بتخاف على ميار من إيه؟
الشارع.. الشارع بشع وفيه فوضى غير محدودة.. الحمد لله هي متربية ومتأسسة كويس وأنا ماعنديش قهر وبنيت مؤسستي التي لا أملك غيرها على الحوار والديموقراطية والحرية والتدين في نفس الوقت.. إنما إنت بتلاقي بره نماذج تربية المادة فيها كل شيء .. أنا مربيها على إن الإنسان بتربيته وأخلاقه وعلمه.. وعلشان كده طول الوقت بفكر إزاي أحميها وأخليها تتعامل مع العقليات العشوائية والفوضى الموجودة في الشارع..
ميار .. لما بتحصل لك مشكلة ، بترجعي لبابا ولا بتحليها لوحدك؟
أعتمد على نفسي ، لكن أكيد أفكاري اللي بحل بيها المشكلة جاية من القواعد اللي اتعلمتها في البيت ، وبعدين بابا علمني أكون مسئولة عن أفعالي.. أي مشكلة تقابلني لازم أكون مسئولة عن حلها زي ما كنت مسئولة عن وقوعي فيها..
أستاذ محمد .. بتثق في حلولها؟
في معظم الأحيان.. وبنسبة كبيرة جدا..
ميار .. كنت حاطة الفن في حساباتك؟؟
أيوه لكن ماكنتش مخططة إنه يكون في هذا الوقت لكن الصدفة لعبت دور كبير.
طيب ليه مادخلتيش معهد سينما؟
مهنة الممثل بالذات.. مش مضمونة.. وعلشان كده ماكنتش عاوزه أتخرج من مكان بتاع ممثلين.. عاوزه يكون عندي أكثر من اختيار بحيث لو فشلت في التمثيل أقدر أشتغل حاجة تانية.. كمان ما يدرسه الناس في معهد التمثيل بشوفه هنا في البيت في جلسات العمل اللي بيعملوها مع بابا.
ميار .. عرفتي توفقي بين دراستك والتمثيل؟؟
بص ده كان شرط بابا الأول.. قالي دي قصاد دي.. لو قصرتي في دراستك مفيش تمثيل.
ثم يرد الغيطي قائلا : أنا دايما كانت مكافأتى لها وهى صغيرة لما تجيب درجات كويسة أني آخذها معايا التصوير وهي الحمد لله دايما بتطلع من الأوائل..
ميار .. قلت إن فرصة التمثيل جاءتك بالصدفة.. إزاي؟
قابلت تامر حسني في حفلة وتعرفت عليه وقال لي إنه يعرف بابا وبعدين فوجئت به بيطلبني في فيلم الكابتن هيما ، ولما رحت وإداني السيناريو وقرأته قال لي هتعملي "توته" فلقيت الدور فيه قيمة حلوة قوي .. غالبا الأخ الكبير بيتعامل مع أخته معاملة قاسية .. هيما مش كده.. هيما بيقول إن بالحب والاحترام ممكن نعمل كل حاجة ، وتامر نجم محبوب فالناس ممكن تتأثر بيه.. فوافقت على الدور لأني حبيته لما قرأته.
وبالنسبة لمسلسل بنت من الزمن ده.. هل قبلتيه دون أن تقرأيه لأن والدك هو المؤلف؟
لا طبعا لأن الناس مش هتقول ده مسلسل والدها.. هيقولوا ميار قدمت دور حلو أو وحش فلازم أختار كويس.
يرد الغيطي قائلا: عاوز أقولك إن مسلسل بنت من الزمن ده اللي رشحتها فيه داليا البحيري رغم إني رشحت غيرها.. مجدي أبو عميرة في "قلب ميت" ماعرفش إن ميار بنتي غير بعد أول يوم تصوير وساعتها راح كلمني وقالي انا أشكرك إنت جبت لي "وجه" كان نفسي أشتغل مع زيه من سنين..
وأضافت ميار: وكان اللي مرشحني للمسلسل أحمد عبد الفتاح مؤلف المسلسل ومؤلف فيلم كابتن هيما.
ميار .. كونك بنت الغيطي بيأثر على اختياراتك؟
أكيد.. شئت أم أبيت فأنا بنت محمد الغيطي ولازم أحافظ على اسمه.. وأعتقد أن الاسم في صالحي لأنه هيخليني دايما أختار أعمال ذات قيمة..
ثم يرد الغيطي قائلا: وعايز أقولك إنها فاجأتني ورفضت سيت كوم 30 حلقة ولما سألتها ليه قالت إنه تافه وبصراحة ساعتها سعدت جدا لأن ده تفكيرها..
أستاذ محمد .. إمتى اطمنت عليها؟
لما شفتها في رمضان الماضي.. ردود أفعال الجمهور كانت جميلة جدا وفوجئت بناس على الانترنت معجبين بيها جدا.. حتى إني مانمتش في اليومين اللي عيطت فيهم مصر بسبب مشاهدها في مسلسل "قلب ميت" .. كل نجوم مصر كلموني.. محمود ياسين كلمني مكالمة لا أنساها.. غادة عادل ووفاء عامر ومجدي كامل.. وغيرهم كلموني وقالولي ميار عيطتنا ..
أحسن حاجة في ميار إيه؟
إحساسها عالي ودماغها حلوه لكنها عنيدة شوية..
ميار .. إيه أول نصيحة قالها لك بابا لما دخلت مجال الفن؟
فاكره إن لما إتكلمنا في موضوع الفن وخلاص هبتدي أول يوم تصوير قال لي إحترمي الناس تحترمك واحترمي مواعيدك وقال لي مش عاوزين حاجة فيها عري أو ابتذال وخدي بالك من نفسك..
ميار .. ممكن وانتي بتتناقشي مع بابا تختلفي معاه؟
كتير.. وبنتناقش ويا تقنعني يا اقنعك ولو ما اقنعنيش خلاص.
أستاذ محمد .. ممكن تفاجئ بها في دور وماتبقاش راضي عنه؟؟
ممكن بس مش قوي لأني عارف إن عندها ثوابت ..
ترد ميار: يفاجئ بآداء لكن مش هيفاجئ بأني قدمت دوراً مش محترم مثلا.. في قواعد طالما متفقين عليها خلاص مفيش حاجة هتتغير.. وعايزة أقولك إن اللي قاعد قدامك هو الغيطي الصغير مش حد تاني .. دماغ واحدة..
أستاذ محمد .. ايه اللي شايف إن ميار مفروض الفترة الجاية تشتغل عليه علشان تبقى أحسن؟؟
هي محتاجة تقدم أدوار جيدة في مناخ نقي لأن المناخ الفني صعب جدا ومليء بالأشواك.. خد بالك قنوات الاتصال بين الموهبة والإنتاج صعبة جدا وحساباتها معقدة.. أنا بقولها من دلوقتي إنتي قدامك مشوار صعب جدا وطويل.. ده الطبيعي وأنا مؤمن أنه على المرء أن يسعى وليس عليه إدراك النجاح ..
في نهاية الحوار: تقولي ايه لبابا يا ميار؟
أقول له كلام كتير قوي.. أقوله شكرا على حاجات كتير.. ميرسي إنك ربتني على قواعد كويسة وخليك معايا علشان فى اللي جاي محتاجة لك تكون جنبي ، وأنا قاعدة على قلبك في البيت والشغل..
أستاذ محمد .. تقول إيه لميار؟؟
احترمي مواعيدك واحترمي الآخرين علشان يحترموكي ..وماتديش أمان قوي للناس ، وأنا واثق في موهبتك وعقلك وده اللي مديني الأمان..