علي هامش العشق

1
لحظات القلب المتوارب
أنصحكم.. ما تقلدونيش
أنا بامشي في عز الضلمه يوماتي
واطلع علي شباك القمره
بحبال النور.. واللبلاب
واخطف فستانها..
واهرب م الحراس.. والناس
وأعدي البر التاني..
من غير مجاديف
ألاقيها قصادي وبتلومني علي نظراتي
والجنيّات إللي محوطاني في كل مكان
وانا مستني مفاجآت منها
تتحقق..
وما تتحققش
مش ممكن حد يقلدني..
وانا بازرع صحاريها بنخلي
وانا باضحك ضحكه..
بتكسّر كل إزاز الحزن
أو بارسم لوحة بألوان الطيف..
فيها ادق التفاصيل..
فيها ارق التفاصيل..
مش عاوز حد يقلدني..
وانا باصرخ وبعزم سكوتي..
وانا صوتي المبحوح.. بيبوح
وباحقق احلامي..
وانا باصحي من الفجر انادي عليها
وهي بتسمعني.. ومش عاوزه ترد..
وتوارب قلبها.. وتوارب بابها..
2
جربي مره تحبيني
حبيني.. عشان تتفتّح أزهار الكون
وتغنّي العصافير ..
أغنيه جديده يوماتي
حبيني عشان الشمس تدفي الدنيا
ونجوم الليل تنزل ع الأرض تنوّر
والأطفال ترجع ..
تضحك في الشارع مع بعض
وتطيب كل جروح العالم
يبقي سلام بين أي شعوب بتحارب..
ويزيد متوسط اعمار الناس
حبيني..
واكتشفي معالم عشق غريب
هتقل ملوحة موج البحر..
والمساحات الخضرا..
هتغطي صحاري العُمر
حبيني..
حروف الشعر هتكتر
وتخلّي الإرهاب يرجع ويعيد حساباته!
حبك هيخلّي جرايم الناس تتلاشي
والبورصه تحقق أرباح
ويزيد الحد الأدني لأجور العمال
ويعيد الأستقرار..
والأرض تدور..
بشوييييييييش!
3
رساله
آسف إنّي ما صدّقتكش
لمّا حلفت..
إن مافيش حاجه في الدنيا..
اسمها حب
قولت اكيد..
تعبان نفسياً
او قصة حبه ما كملتش
خدت الموضوع تهريج
وبعتنا نجيب العشا
ونكمل لعب الكوتشينه
وشربنا الشاي..
وما خدتش بالي تماماً
من حالة قلبك..
كان لازم ادقق اكتر..
في ملامح عينك
آسف جداً..
اني اخدت كلامك باستخفاف
لو فكرت في معني كلامك اكتر..
كنت أوفر علي نفسي سنين..
كنت ما ضيعتش عمري.
آسف.