بالصور: رامو يكشف أسراره لموقع عيون ع الفن

حوار: رحاب فوزي- ياسر حماية تصوير: محمود صبري
"رامو زادا" هكذا عرفه الجمهور منذ 3 أعوام من خلال ألبوم واحد , وبعد كليب أثار ضجة وقت عرضه بسبب الفكرة الجديدة التي قدمها , اختفى "رامو" ليعود ويطل علينا بأغنية جديدة ولوك جديد , وكشف لنا "رامو عن أسرار غيابه وعودته خلال الفترة الماضية في هذا الحوار.
س: كنت غايب عننا كتير أوي ليه؟
ج: أنا عملت شغل في 2006 ونزلته وكان انتاج والدي وتوزيع روتانا للأسف كان فيه عيب في الدعاية بجانب الظروف التي تعرضت لها بموت شقيقي في انفجارات شرم الشيخ , ونفسيتي كانت تعبانة, فتوقفت الفترة دي اللي وصلت إلي 3 سنوات وبعدها الحمد لله باحاول استعيد نشاطي.
ونازللي أغنية جديدة اسمها "اللا لي" توزيع أحمد عادل وكلمات "محمد قناوي" وما تتعجبيش من اسمها هي مش أغنية شعبية هي استايل وشيك أوي, وتلحين حسين عبد اللطيف وإن شاء الله تعمل حاجة كويسة وتعجب الناس لان الفنان بلا حب الناس لا قيمه له.
س: نفسك تكمل بنفس الرتم وألا عايز تبقي مختلف؟
ج: أنا في أول طريقي كان عندي 17 سنة في الفترة دي كنت متخيل الشهرة إن الناس تبص عليك وتشاور وبس , لكن عرفت إن الشهرة مش كده فإما تتشهر لمجرد الشهرة أو الإبداع في شئ يحسس الناس إنك انتي فعلا بتبذلي جهد مش مجرد فنان وبس.
الناس بتشاور عليكي عشان انتي تستحقي , وإلا اصبحت انساناً تافهاً ليس متقناً لعمله.
الشهرة بالنسبة لي مش بحث عنها بقدر انني اريد ان اقدم ماهو مثمر وشئ انجح فيه يفرح به جمهوري.
س: السينجل الجديد مين شاركك في اختيارها؟
ج: الفضل الاول والاخير يرجع لوالدي لان هو موفر لي الفرصة والامكانات للبحث واشتري ما يعجبني , وكل الناس اللي جنبي والدتي التي تعبت جداً عشانها ومهما عملنا مش هانقدر نقولها أد إيه بنحبها واختي ومديرة اعمالي , وأصدقائي صاحب عمري "عبد الرحمن" و"عمرو" واقفين جنبي باشكرهم والحب مش بالكلام , لكن الحب من القلب للقلب.
س: برجك إيه؟
ج: الحمل , طموح عالي اتمنى هذا.
س: كان رد فعلهم إيه على السينجل؟
ج: قالولي لقيت نفسك أنت عامل حاجة شبهك فيها سنك وشخصيتك , وحاول تقديم صوتك وكاركتر شخصيتك في أغنياتك , وممكن تختار مهما سمعت شئ غلط او شئ مش مميز أو مش بتاعتك أنا باشكر الظروف اني لقيت الاغنية دي واتمنى ان تعمل شئ الناس ترضى عنه , قبل ما اكون ناجح كفنان اتمنى ان يكون حب الناس ليا رقم واحد وانا مؤمن بقضاء الله واهم شئ اني اجتهدت.
س: ضررك من روتانا؟
ج: كنت تايه , كان فيه سوء دعاية جدا
س: عقدك كان كام سنة مع روتانا؟
ج: 3 سنين
س: ما اخدتش حقك مع روتانا؟
ج: انا مش عارف انا خدت حقي وألا لأ بس اللي متأكد منه اني مخدتش دفعة منهم حقيقية , فالمفروض ان الالبوم يكون موجود ع الاقل في المحلات الكبري لكن في خلال شهرين كان الالبوم مش موجود في اي من المحلات الكبري , مفيش اي حس توزيعي او دعاية حقيقية , وده من الاخر انا مش هابكي على شئ مضي , انا اتعلمت من اخطائي لان الانسان لازم يتعلم من اخطائه ويسمع اكتر ما يتكلم , واتمنى ان اجد من يوظف قدراتي صح , ودي مشكلة روتانا معايا اني كنت تايه مش عارف الصح ايه وفين ومش عارف هاعمل ايه.
س: خطواتك اللي جاية ازاي؟
ج: هاركز على الميديا الفترة الجاية , وهاركز اني اجتهد فعلا مش مجرد كلام , واركز في اتقان شغلي واوصله في صورة صح , صورة ارضي عن نفسي فيها واجتهد واقدم شئ كويس , والشئ الحلو بيفرض نفسه , اعتقد لو حد شافني وانا متقن شغلي ممكن ييجي يقوللي انا عايزك , صحيح الانتاج صعب لكن ماتعرفيش ربنا شايل لك ايه , لا نعرف ما كتبه الله واهم شئ الصبر والارادة ويمكن الالبوم ما ينجحش وأهم شيء ان نقول الحمد لله على كل شيء.