مصطفي عمار يكتب : حوار مع البدلة!

الاسم : بدلة رجالي
تاريخ الصنع : 28 يناير 2011
الوظيفة : تلميع من يرتديني
س: ما سر تواجدك في شوارع القاهرة دون سابق إنذار؟
ج: مجرد صدفة بريئة لأنني لم أكن أعلم أنني في شوارع القاهرة
س: ما سبب ظهورك المفاجئ في هذا التوقيت الحساس الذي تمر به البلاد؟
ج: أعتقد أنني كنت ذاهبة لمناسبة ما، لكنني ما اعرفش ما المناسبة ولا موعدها ولا مكانها!!
س: أكدتي أن تاريخ صنعك هو 28 يناير.. أين كنتي قبل ذلك التاريخ؟
ج: كنت عبارة عن قطعة قماش مركونة علي رف أحد الدواليب، الي أن قرر آخرون مصيري بتصنيعي وظهوري.
س: ما شعورك بعد ردود الأفعال المختلفة حول ظهورك في هذا التوقيت؟
ج: ربما أعجب البعض وغضب البعض الآخر لكنني في الحقيقة ماعرفش إيه سبب حدوث ضجة من الاساس، لأن الشارع فيه بدل كثيرة غيري ماشية وماحدش بيعلق عليها!
س: هل ظهورك المفاجئ طمعاً منك في مكانة أو منصب أو نجومية ماتخفيها بداخلك!
ج: ما اعرفش السؤال ده ممكن تسأله لصاحب قرار ظهوري!
س: ما تعليقك علي ما يحدث حالياً في البلد؟
ج: ما اعرفش حاجة لان أنا تاريخ صنعي 28 يناير 2011 واعتقد ان ده وقت قصير علشان اقدر اكون انطباعًا عن الاحداث التي يمر بها البلد.
س: هل تعلمين شيئاً عن الاشخاص الذين اتخذوا قرار تصنيعك وظهورك؟
ج: سمعت طرطشة كلام مش متأكدة منها!
س: أيه هو الكلام اللي أنت سمعتيه؟
ج: سمعت مثلاً اني اتعملت عشان اقف في وش جلاليب بيضة! وقمصان وبنطلونات ممولة من الخارج، وحاجات تانية بس أنا ما اعرفش الحقيقة فين!
س: بتقولي أن تاريخ صنعك 28 يناير 2011 يعني حضرتي موقعة الجمل، تعرفي ايه عن الموقعة ديه؟
ج: ما اعرفش غير الاسم بس لأني ساعتها كنت لسه صغيرة وعمري أسبوع أو عشرة أيام.. فمش قادرة أحدد ايه هي حكاية موقعة الجمل ديه!!
س: البعض اتهمك.. بأنك بتحاولي تسرقي نجاح ناس تانية علشان مش عاوزة تخشي الدولاب تاني، ردك إيه؟
ج: ما اعرفش حاجة عن الكلام ده، بس الي انا متأكدة منه إن كل البدل الي سبقتني ما دخلتش الدولاب تاني بعد ما خرجت منه.
س: أومال راحت فين؟
ج: فيه منها اللي راح طرة وفيه منها هربانين بره وفيه رجعت المصنع تاني وخرجت في صورة ترنجات!!
س: واضح إنك مراوغة ومش عاوزة تزعلي حد منك وبتكدبي في ردك علي أي أسئلة بتتسئليها؟
ج: ما اعرفش غير اللي قولته والأيام هتثبت إن أنا كنت بحمي باقي البدل وحريصة عليهم علشان نعدي ظروف صعبة بنمر بيها كلنا!
س: أيه هي الظروف ديه؟
ج: ما اعرفش أهي ظروف صعبة وخلاص!
س: ناوية تظهري تاني في أماكن تانية وفي أوقات تانية؟
ج: ما أعرفش بس لحد دلوقتي ظهوري الأولاني عمل حالة عند الناس فممكن أظهر وممكن أختفي حسب الظروف بس في الحقيقة مش عارفة هعمل ايه!
س: في أغنية بتحبيها؟
ج: لا في أغنية بتضايقني
س: ايه هي؟
ج : اغنية "ياما البدل بتداري سلطة ومحدش داري.
س: هل لديك أقوال أخري؟
ج: ماعرفش.