ودعنا.. الفقر!!

عاوز أتكلم معاكي في موضوع مهم، بس نتفق الأول.
- نتفق علي إيه؟
إنك ما تنكديش علي زي عوايدك.
- أنا، بانكد عليك!! مش فاهمة، هو إيه الموضوع؟
هو إنتي قريتي الأرقام بتاعة الجهاز المركزي للتنظيم والإدارة؟
- قصدك مؤشرات بحث الدخل والإنفاق والاستهلاك؟ أيوه قريتها، حلوة قوي، بيقولوا مستوانا ارتفع يعني مش حانكد عليك ولا حاجة.
كويس، الحمد لله، اللي عاوز أعرفه هم ليه بيعملوا البحث ده؟
- إيه السؤال الغريب ده!! عشان يعرفوا وصلنا لإيه، البحث ده معمول عشان يشوفوا الفقرا حالهم اتحسن ولا لأ، وطلع اتحسن الحمد لله.
ما هو ده اللي محيرني، شوفي أنا معترض من أولها علي الطريقة اللي بيحسبوا بيها. - مش فاهمة.
يعني هم بيقولوا عملوا البحث علي ميتين ألف واحد وأخدوا المتوسط بتاع دخلهم وانفاقهم واستهلاكهم، أنا معترض علي حكاية المتوسط دي، إنتي إيه رأيك؟
- فهمت قصدك، افتكرت المثل بتاع أنا ورئيس مجلس الإدارة مرتبنا مليون جنيه. صح؟! ؟ عليكي نور، الحساب بتاع المتوسط ده مابقاش ينفع عندنا في مصر لأن الفروق بقت كبيرة قوي، لما يقولوا متوسط نصيب الفرد من الإنفاق تلات آلاف وسبعميت جنيه في السنة يعني بتاع تلتميت جنيه في الشهر حتلاقي الرقم ده اتحسب إزاي؟ - بالمتوسط، جمعوا الميتين ألف واحد دول صرفوا كام في السنة وقسموها علي ميتين ألف يطلع المتوسط.
طب لما يبقي أكثر من نصهم بيصرفوا مثلا ألف جنيه بس أو حتي أقل والباقي بيصرفوا عشرة وعشرين ألف، مش يبقي الحساب بالمتوسط ده يطلع نتايج مش مضبوطة.
- طبعاً، وهي دي فعلا الحقيقة، بس حتي بالحساب بتاعهم عارف النتيجة دي معناها إيه، إن الواحد من دول بيصرف عشرة جنيه في اليوم ما بين أكل وشرب ومواصلات وعلاج ومصاريف مدارس وهدوم وفواتير كهرباء وتليفون.
آه، طب ليه بيعملوا كده؟
- وأنت عاوزهم يعملوا إيه؟ كل الدنيا ماشيه كده في دراساتها وأبحاثها، بس ممكن يعملوا حاجة تانية.
أيواا.. يعملوا إيه بقي؟
- يعملوا متوسط كل شريحة لوحدها، يعني يقولوا لنا الفقرا كام ومتوسطهم كام والأغنيا قد إيه وبيصرفوا قد إيه، ساعتها حنفهم أكتر إحنا ماشيين إزاي لكن طبعا هم مش عاوزينا نفهم.
عملوا كده، في بعض حاجات، يعني مثلا بيقولك أنه مش صحيح أن الفقرا زادوا فقر ولا الأغنيا زادوا غني.
- ده كلام الوزير عثمان محمد عثمان مش كده!
آه، من البحث.. عنده أرقام إن نصيب الفقرا زاد ونصيب الأغنيا قل. - ياسلام، بالذمة!!
بجد الجرنال معايا أهو خدي شوفيه.
- مش مهم، أصل حكاية الأغنيا دي عند الحكومة بتاعتنا غير عندنا خالص. ؟ يعني إيه؟
- أصل هم رأيهم إن اللي عنده موبايل ودش وتليفزيون ملون أغنيا.
صح، بس هو قال أنه بيتكلم عن الأكثر غني.
- ماشي، إذا كان نصيبهم اتأثر فده عشان هم رجال أعمال كبار اتأثروا بالأزمة العالمية مش عشان لا قدر الله أنهم بيحاولوا يعملوا عدالة في التوزيع.
بتدوري علي إيه في الجرنال؟
- أهي.. شوف الأرقام بتاعتهم، بيقولوا الفقرا استهلاكهم زاد نص في المية، والأغنيا قل أكثر من ربع في المية بحاجة صغيرة.
طب وليه مايشتغلوش عشان الاتنين يزيدوا؟!
- عموما المهم أنه فرحان عشان الفقرا استهلاكهم زاد، حتي لو نص في المية، وده معناه إن دخلهم أكيد زاد.
ما هي دي اللي عاوز أتكلم فيها، اشمعني قال إن الدخل زاد وماقالش إن الأسعار ارتفعت.
- عشان ده معناه إن رغم الزيادة اللي حصلت في الدخل مستوي الناس قل بسبب ارتفاع الأسعار والبحث معمول عشان يثبت أن مستواهم ارتفع، قاموا عملوا إيه، ماجابوش خالص سيرة الأسعار دي.
يبقي كل اللي عملوه ماينفعش، مش حنعرف منه حاجة.
- ولا يهمك، الأبحاث كتير، عاوز تعرف إيه؟
عاوز أعرف فلوسنا بتروح فين.
- شوف ياسيدي، الدراسات قالت إن الأكل والشرب بياخد نص دخل المصريين.
بيتهيألي بياخد أكتر.
- مش مهم، المهم بحث جديد لانج، بيقول إن أسعار الطعام والشراب زادت في سبتمبر السنة دي عن سبتمبر السنة اللي فاتت خمستاشر ونص في المية.
يادي الحوسة.
- خد عندك بقي من غير أبحاث ولا دراسات، مش قالوا بعضمة لسانهم الكهربا زادت خمسة في المية، والأدوية ربعمية في المية، بلاش دي، أنت مش دلوقتي بتضطر تركب تلاتة ميكروباص عشان توصل شغلك بعد ما كنت بتركب مرة واحدة.
آه، كل الناس بتقول إن سواقين الميكروباص عملوا كده بعد ما الأتوبيسات عددها قل قوي، فاستغلوا الموقف.
- يعني نقدر نقول المواصلات زادت تلتمية في المية.
لأ، مانقدرش.
- ليه.
لازم يعملوا بحث، الحكاية مش بالبساطة دي.
- ولو عملوا البحث وطلعوا متوسط إن المواصلات مازادتش ولا حاجة؟!
عادي. حتلاقي متوسط المصريين اللي بيركبوا عربياتهم ومايحتاجوش للمواصلات زاد. مش ربع مليون مصري اشتروا عربيات جديدة السنة اللي فاتت.
- آه، في دي عندك حق.
مع إني بعت عربيتي عشان ناكل بتمنها.
- بس دخلك زاد، حتنكر، مش مرتباتنا زادت؟
زادت وإنفاقنا زاد واستهلاكنا زاد زي البحث ما قال بالضبط بس مستوايا لأ، لازم يفهموا كده كويس.
- حيفهموها إزاي دي بقي.
لما واحد كان بياكل لحمة مرة في الأسبوع وبعد ما زاد بقي ياكلها مرتين يبقي مستواه زاد، لما واحد ماكانش مرتبه بيكفيه ودلوقتي بيقدر يحوش منه يبقي مستواه زاد.. هو إحنا لما من خمس ست سنين اشترينا العربية كان ده إزاي؟
- بالتقسيط.
ودفعنا الأقساط منين؟
- من مرتباتنا. ؟ طب لو أنا جيت دلوقتي وقلت لك حأشتري عربية بالتقسيط وندفع القسط من مرتباتنا حتقولي إيه؟
- حأقول إنك اتجننت، ده إحنا كل شهر نشوف إيه اللي ممكن نستغني عنه عشان المرتبات تكفي. ؟ يبقي مايقولش إن مستوانا زاد، لأ، ماينفعش وإذا فضل يقول كده يبقي عمر مرتبي ماحيكفي وعمر مستوايا ما حيرتفع.
- ليه بتقول كده؟
عشان لما يقول كده يبقي شايف نفسه ماشي صح، ولما حالي يوصل لكده يبقي ماشي غلط، مين بقي اللي حيحكم بينا.
- يجيبوا حكم من بره.
إنتي بتقوليها هزار بس واضح إن مافيش حل تاني.
- أنا بس عاوزاك تهدا شوية وتحمد ربنا، ده فيه في البحث نفسه رقم يجنن بلد، بيقولك فيه ناس عايشه بتلاتة وتمانين جنيه في الشهر، صحيح هو فرحان إن عددهم نزل من أربعة ونص في المية لأربعة في المية بس، لكن أهو إحنا في نعمة.. مش كده؟!
الحمد لله. بس برضه مايقولش مستوانا ارتفع.
- ما هو بيقول إن الناس هي السبب إن مستواها مابيرتفعش.
إزاي الكلام ده؟
- بيقول بيصرفوا علي بنود مش أساسية.
أه افتكرت، كل ده عشان الموبايل، بيقول بيصرفوا فلوسهم علي المحمول، تفتكري الوزير من دول معاه كام موبايل!
- وإحنا مالنا ومالهم، طب هم ناس شغلهم كتير عاوز تجيب نفسك زيهم.
أصل أنا حولت للكارت بتاع صلاحية مدي الحياة، ومش مطلوب مني غير مكالمة واحدة كل تلات شهور.
- إيه اللخبطه دي، إحنا بنتكلم في إيه دلوقتي!!
يعني أنا معايا موبايل أهو مش حيكلفني إلا بكتيره عشرة جنيه كل تلات شهور، يبقي أنا بأصرف علي بنود غير أساسية؟!!
-ياسلام عليك لما تقف له عالواحدة، مش قصده، كلمة وقالها عديها. ؟ أعدي إيه ولا إيه؟
- وفر مجهودك في الكلام للسنة الجاية.
اشمعني السنة الجاية؟!
- أصل من كتر البحث ده ما عجب الوزير طلب أنه يتعمل كل سنة بدل سنتين.؟