إزاى تبقى «ديك البرابر»

الموضة دلوقت إن شبابنا نصهم بقوا «نحانيح» جمع نحنوح، والنحنوح «حاجة كده زى سوما العاشق.. حساس بس بزيادة وواخد الدنيا على جناح يمامة».
ويمكنك أن تجد النحانيح أيما وجهت وجهك على بروفايلات البنات كالذباب «عاملين كده زى إخواتهم.. مش بيدوس لهم على طرف ودايمًا معاهم على طول الخط»، والمحصلة اكتساب صداقات جديدة و«مزز» أكتر وربما عاهات أكتر – انتا ونصيبك- و«صور مع بنانيت كتير وهزار وضحك وتليفونات وخروج وكدهون».
و«عشان تبقى نحنوح قد الدنيا عليك اتباع الخطوات العشر التالية»:
1 - ركز على كام بنت كيوت (من بتوع القهر الذكورى) وحطهم فى favorite حتى ترى كل ما يكتبنه.
2 - اعمل لايك لأى مادة يقمن بنشرها خصوصًا لو فيها شتيمة للرجالة والتحرش والقهر الذكورى والباذنجانى و«اوعى تنسى تناديهم على الوول باسم الدلع».
3 - انشر دايمًا على صفحتك أشعارًا رومانسية «إنت مش فاهمها» عشان يبان إنك عميك «عميق يعنى».
4 - احتفظ دائمًا ب«السمايل فيس» التافهة فى كل نقاشاتك عشان تبقى «واد حبوب وكل البنات تحبك».
5 - اتصور سيلفى كتير و«ياسلام لو كانت مع بنات.. وياسلام لو ضحكة مصطنعة بقى قال يعنى الواد لارج وكدهون».
6 - بين كل بوست وبوست انشر حاجات «مش حقيقية» عن مواقف محصلتش عشان تعمل بطل (خلى خيالك واسع) واحكى دايمًا عن ذكريات محصلتش.
7 - اتعامل مع البنات فى البروفايل على إنك اختهم (مش أخوهم) عشان يتعاملوا معاك على المستوى ده وأنت من جواك بتبقى عاوز تاكلهم أكل.
8 - لما تكون عاوز تصاحب واحدة حلوة اعرف كل البنات الوحشة أصحابها لفترة طويلة عشان لما تضيفها تقبلك على طول وتبدأ النحنحة العادية فتجيب معاك.
9 - افضل هاجم «الرجالة الوحشة» اللى بينتقدوا المرأة واتكلم عن بنات حواء كأنهن ملائكة الله على أرضه لا يخطئن أبدًا والرجال سبب كل الآثام.
10 - بين كل فترة وأخرى ضع بوست ومنشن فيه شوية «بنات عادية» وقول فيه كلام عن الثورة والحرية والنضال عشان «تجيب رجل البنات الحلوة أصحابهم».
«لو عملت كل ده.. هاتلاقى نفسك بعد شوية صوتك بقى «حنين» فى التليفون مع الرجالة والبنات كمان»، وستجد نفسك «بقيت حساس بزيادة، ونسخة من سوما العاشق».. وبتكلم الناس بصيغة المؤنث دايما حتى لو ولاد من غير ما تحس زى ما تقولهم «عارفة.. بصى».
بس المشكلة يا «ديك البرابر» أنك لما تفكر ترتبط بأى واحدة من اللى حواليك هتفاجأ أنها بتقولك إنت زى «أختى». •