أحبك وأحب اللي يحبك

السلام عليكم... أنا متابعة موقع بص وطل من زمان أوي ولأني عارفة إنه كويس ومقنع حبيت أبعت مشكلة هي مشكلة أختي.
المشكلة بدأت من إنها اتخطبت زي أي بنت وهي عندها 25 سنة أو أقل وعملنا شبكة وكتب كتاب بسبب ظروف سفر جوزها والموضوع كله تم في أسبوع واحد واتعرفوا على بعض أكتر وعرفوا شخصية بعض عن طريق النت. ولكنه لم يظهر منه أي شيء وحش ولكن بعد الزواج ظهر ما لم يكن يتوقعه أحد، فكان بيبين لنا إنه رجل وقوي الشخصية، أكثر شيء يهمه هو كرامته ورجولته ولكن طلع ابن أمه بيسمع كلامها بطريقة فظيعة، بيكره الناس اللي بتكرههم وأمه دي اللي هي حماة أختي متسلطة وعندها بنت أكبر من أختي بحوالي 4 سنين وغير مرتبطة أو مخطوبة، فيوجد غل وغيظ من أختي إنها أصغر منها ومتزوجة على العلم إن أختي تعليم عالي أما هي فتعليم متوسط وأختي تعاني من المعاملة السيئة والكلام اللي يتعب ومستحملة وبيشتموا فيها وجوزها ما بيعملش أي حاجة علشانها ودايما يقول لها روحي لأهلك مش باقي عليها خالص وبيقف مع أمه كتير وهو متأكد إنها بتكدب وبتؤلف وأختي ولدت طفلة وهو مقصر في حقها خالص، وأختي من يوم ما اتجوزته ما جابلهاش أي لبس ومش راضي يجيب لها حتى الأكل بتطلبه مش بيجيبه طول ما هو مع أهله وكل ما يملكه بيدّيه لأخته وأخوه، وبعد كده يستلف من أصحابه ويقصر في حق أختي وبنتها ومافيش أي اهتمام منه وحتى ما بيعرفهاش أي حاجة عنه وبيتريق عليها مع أهله قدامها، ومعاملته في منتهى البرود منه ومن أهله.
ومع ذلك أختي مستحملة علشان تربي بنتها ولكن طاقتها استنفدت وزعلت منه وقالت له عاوزة أروح لأهلي في ثانية جاب لها عربية وقال لها لمي هدومك ولبّسي بنتك ويلا هاوديكي عند أهلك ومن بعدها ما سألش فيها للعلم إنها تعتبر عايشة مع أهله في شقتها وكل عفشها يكاد يكون باظ وكل شيء بيبهدلوه وبيزعقوا لها حتى الأكل بيحطوه في مكان هي ما تعرفوش، ولما حماتها تيجى تفرق هي الوحيدة اللي مش بتديها وتقول لها نسيت. على الرغم من إن جوزها بيشتغل في الخارج وراتبه لا يقل عن 8 آلاف جنيه وكمان متجوزين بقالهم سنة بس وأهله بيعاملوا بنته بقسوة لأنهم بيكرهوا أمها، المشكلة دلوقتي أختي عايشة معانا ومش عارفة تعمل إيه تتطلق منه وتسيبه وخايفة من كلام الناس والشماتة، وفي نفس الوقت ما بقيتش طايقاه أرجوكم ردوا عليّ بسرعة؛ لأني محتاجة الرد.
نو


حتى يمكنني أن أنصح لأختك صديقتي كان لازم أعرف هي علاقتها إيه بأم جوزها؛ يعني هي داخلة مع أمه مسابقة مين يكسب ولا لأمه الاحترام والتوقير وتعاملها زي أمها بخيرها وشرها؛ لأنها ما تتغيرش والزوجة بس هي اللي تتغير!!
تتكلمين عن أختك وكأنها ملاك اتجوزت شيطانا ابن شيطانة ونسيت إن اللي ملوش خير في أمه اللي شالته في بطنها ورضعته وكبرته لغاية ما بقى راجل وبعدين ساعدته لما بقى له بيت وشبكة وقدمته مع البيت والشبكة هدية متواضعة لأختك عشان تشاركه في قلبه وفي بيته وفي مسئولياته تجاه أمه وأخته وكل أهله.. مش ده واجب الزوجة ولا إيه؟!!
يعني تعالي نقلب الآية ونتكلم بصراحة خلي أختك تحط نفسها مكان حماتها وتشوف سنين طويلة وقفت الست جنب ابنها لغاية ما بقى رجل ييجي النهارده وميسمعش كلامها؟؟ طب لو كان كلام مراته فيه حب ومعقول ومافيهوش غيرة من الأم مش كان سمعه؟؟
مشكلة أختك صديقتي أنها وضعت نفسها في مقارنة مع الأم التي لو عاش ابنها عمره كله يحقق لها ما تتمنى مش يسمع كلامها بس مش كفاية؛ لأن حق الأم ثابت وربنا وصى به في كل الديانات.
ونصيحتي لأختك صديقتي: لو رجعت المياه لمجاريها بينها وبين جوزها أنها تغمض عينها عن أمه تماما بل تعتبرها زي أمها وكل حاجة تسعدها تعملها ابتغاء وجه الله وحب زوجها وأن ربنا يعوضها في بنتها وولادها اللي جايين كمان إن شاء الله بالبر والرحمة وصلة الرحم.
وإن كانت أختك صديقتي لا تقدر على التواصل مع حماتها على اعتبار أن الحب معناه: أحبك وأحب اللي يحبك يعني تحب أم زوجها مثل حبها لزوجها وربما أكثر.
وما أقصده بالحب هنا هو أن تعتبرها كأمها، وتحاول أن ترضيها بأي شكل عشان ترتاح من ناحية وعشان مسير ما مراة الابن تبقى حما، فليس أمامها إلا السعي للفراق أو الطلاق عشان تخلص من مشاكل تحدث كل لحظة وفي أحسن العائلات.
وآهو تعيش مرتاحة بعيد عن زوجها بكل مواصفاته الوحشة وأمه اللي بتنسى تعطي لأختك نصيبها من الأكل، و....الخ وتعيش مع بنتها تنتظر يحن عليها طليقها ويبعت لبنته مصروف ولا يحرمها كمان من المصروف زي ما تحرمت منه ومن بيته. وكمان بالمرة تعيش أختك لبنتها تعد الأيام لغاية بنتها ما تكبر وتتجوز، أو تنتظر عريس ابن حلال يرضى بها وببنتها.
ما تقولينه صديقتي من مشاكل تعتبر تفاهات جنب اللي بنسمعه ونشوفه من مشاكل الأزواج والزوجات. ومشكلة أختك سببها أن الزوجة بتنسى وضعها في بيت زوجها وبتعمل راسها برأس أمه وهذا خطأ تدفع الزوجة ثمنه ويدفع الأولاد ثمنه معها.

انصحي أختك أن حماتها مش عايشة العمر كله وأن عشان بيتها وزوجها وبنتها تحتمل حماتها واللي هتزرعه من خير فيها هتحصده عاجلا حبا من زوجها وآجلا حبا واحتراما من أزواج وزوجات أبنائها وبناتها إن شاء الله.