اتفضلوا معانا!

«اللصيمة؟».. أكلة سيناوية معروفة بقيمتها الغذائية العالية وفوائدها الصحية، الكبار والصغار بيشاركوا فى صنعها كوجبة عشاء فى جو عائلى جميل يعكس مظاهر الحب والترابط بين أفراد الأسرة السيناوية.
المواطن السيناوى محمد غانم العرايشى يقول: «ورثنا هذه الأكلة عن أجدادنا، وتتميز بسرعة تحضيرها وقيمتها الغذائية، والأهم من كدة أنها تسد الجوع لمدة أطول من أى وجبة أخرى.
ويوضح غانم: تحضر كيلو ونصف دقيق يضاف إليه ماء للعجن فى وعاء عميق، فى التوقيت ده هتلاقى ناس بتعجن وتفرد العجينة على طبلية لغاية ما يبقى حجمها زى الرغيف الكبير، وناس تانية بتولع كومة من النار لتسوية العجين بداخلها على حرارة الرمال، وبكدة تبقى انتهت المرحلة الأولي».
ويضيف: «المرحلة التانية بنجيب فيها خمس حبات من البطيخ الصغير (العَجَر) أو الباذنجان، ونضعهم فى حلقة من السلك للشوى على النار، المرحلة الثالثة بنقطّع فيها العجين اللى تحول لرغيف محمص إلى قطع صغيرة فى وعاء كبير، المرحلة الرابعة بنعمل فيها سلطة اللصيمة وهى عبارة عن قطع من الطماطم، والخيار، والفلفل العرايشى الحار، والثوم، والملح».
ويختتم حديثه بقوله: «المرحلة الخامسة نخلط فيها كل المكونات السابقة مع بعضها البعض فى الوعاء الكبير بإضافة كمية كبيرة من زيت الزيتون، ولما يبدأ الأكل كله يشمّر إيده لأنه ممنوع الملاعق أو الشوك فى الأكلة دى بالذات، وبالهنا والشفا».•