رمضان زعلان!

سمير الجمل

التقي رمضان الشهر الفضيل مع الصائم في حوار جري غالباً قبل الإفطار بوقت قليل ورائحة الطعام تفوح من كل بيت.
رمضان: كل سنة وانت صايم.. يا صايم
الصائم: وفيها إيه أنا فعلاً.. بامتنع عن الأكل والشرب والشهوة من أذان الفجر.. لغاية أذان المغرب.. مش هو ده الصيام ولا أنا غلطان؟
رمضان: لا انت نسيت تقول إنك بتصوم كمان عن الشغل بحجة أن ريقك ناشف وخرمان سجاير وشاي وقهوة ومزاجك مش هو.
الصائم أغلبنا كده.. وإذا اتنرفزت باشتم شتايم خفيفة!.
رمضان: يا ابني مفيش "شتيمة" "دسمة" وشتيمة "دايت" الغلط غلط.
الصائم: طيب ما هي المسلسلات كلها شتيمة الواحد ينكسف منها في الشارع فما بالك يا عم رمضان.. بأعمال "فنية" بتدخل كل بيت.
رمضان: يعني سيادتك زعلان من ألفاظ في مسلسل ومش زعلان انكم عملتوني شهر مسلسلات مش عبادات.
الصائم: يا شهرنا الفضيل أنا شخصياً لما بتشرفنا.. باتفرغ للعبادة.
رمضان: مين بيقعد في الخيم؟.. ومين اللي بيحشد الأكل.. والشرب كأنه طول السنة جعان يا حول الله.
الصائم: ما هم عشان كده بيقولوا إن حضرتك كريم وحالو ياحالو.
رمضان: فيه فرق بين الكرم والسفه والتبذير.
الصائم: شكلك زعلان مننا يا عم رمضان؟!
رمضان: لأنكم للأسف الشديد بتحاولوا تعملوني شهر احتفالات وولائم وفوازير.. ومش كده وبس عملتوا سحور راقص وإفطار غنائي.. واتسحر سينما وافطر مقالب.. حرام عليكم.. ده شهر رحمة ومغفرة وعتق من النار.. أوكازيون عظيم من ربنا سبحانه لعباده.. وكأنكم في غني عن الثواب والعياذ بالله.
الصائم: يا ساتر يا رب حقك علينا يا عم رمضان.. بس أنا والله.. باصلي التراويح.. والقيام والحمد لله باختم القرآن الكريم طول الشهر.
رمضان: طيب ممكن أسألك سؤال؟
الصائم: طبعاً يا عم رمضان؟
رمضان: انت حاسس إن أخلاقك ومعاملاتك بتتحسن في رمضان؟
الصائم: طبعاً طبعاً.
رمضان: بأمارة إيه!
الصائم: من كان يوم واحد شتمني الضهر في الشارع.
رمضان: ورديت عليه؟
الصائم: لا طبعاً.. قلت له اللهم إني صائم.
رمضان: وبعد كده حصل إيه!
الصائم: شتمته بعد الفطار!!
رمضان: أعوذ بالله.. يعني رمضان بالنسبة لكم نهار بس.. وبالليل كل واحد مع مفسه.
الصائم: مش للدرجة دي.. أنا عارف إن رمضان 24 ساعة في اليوم.
رمضان: لا مش كده وبس.
الصائم: إيه كمان.
رمضان: انت بتدخل رمضان.. زي العربية اللي داخلة محطة الخدمة عشان تضبط زوايا وعفشة.. وتطمن علي المياه والزيت.
الصائم: حلو جداً.
رمضان: لا مش حلو.. لأنها أول ما خرجت من محطة الخدمة حلفت ما تمشي ولا خطوة واتضح انها عطلانة وبطلانة.
الصائم: علي كده المفروض رمضان يبقي معانا طول السنة
رمضان: لأن رب رمضان هو رب شعبان ورجب.. وصاحب الأخلاق والفضيلة بيعيش بيهم العمر كله.
الصائم: ربنا يقدرنا!!
رمضان: علي إيه؟
الصائم: نصوم رمضان كويس جداً وبعدها يحلها ألف حلال وعن إذنك بقي.. أنزل تحت الأرض مع "رامز"!