[email protected] بعيدا عن أجواء السياسة والمشاحنات والمفاوضات والتربيطات والطموحات والاعتصامات.. التقي رمضان الشهر الفضيل.. مع الصائم المصري في جلسة مصارحة ومكاشفة.. رمضان: كل سنة وأنت حلو يا صايم الصايم: تعيش ياعم رمضان.. يا شهر البركة والخير رمضان: أنت صحيح بتحبني؟ الصايم: طبعا وباستنى طلعتك من السنة للسنة! رمضان: ياراجل.. أنت بتحب جو الولايم والعزايم والسهرات.. يعني بتحب الاحتفالات مش الروحانيات! الصايم: أنا الحمد لله بصوم لغاية المغرب وبتابع المسلسلات. رمضان: وشكلك الخرمان يا بتاع الدخان ياراجل أنت صيامك كله نوم من الفجر لغاية العصر.. وجايز لغاية المغرب الصايم: أنا بصلي الأوقات كلها مية مية. رمضان: لكن لسانك شغال.. وعنيك شغالة يبقي فين صيامك الصايم: لا أكل ولا شرب ولا سجاير ولا شيشة! رمضان: لكن بعد مدفع الفطار ما يضرب أنت كمان بتضرب وتشتغل دخان لغاية السحور وسهرات صباحي الصايم: وهو حرام! رمضان: لا.. لكن أنت قدامك السنة كلها مسخرة.. وربنا سبحانه وتعالى فتح لك باب يطهرك ويغفرلك ويقربك منه.. ده كرم ملوش أول ولا آخر الصايم: الحمد لله فضل ونعمة رمضان: أنت عملت إيه! الصايم: اشتريت فوانيس.. وعلقت زينة على البلكونة وأعرف واحد فقير اشترت له كرتونة بميت جنيه فيها سكر وشاي وزيت ومكرونة وسمنة. رمضان: عظيم جدًا.. كل ده للمعدة.. عملت إيه للروح! الصايم: بصلي وأصوم رمضان: تأدية واجب الصايم: خير وبركة هو فيه أحسن من الواجب اللي على الإنسان لما يعمله. رمضان: أنت عندك عربية! الصايم: الحمد لله عندي. رمضان: مش بيجي عليك وقت تعمل لها صيانة وتغيير زيت وبوجيهات وبطارية. الصايم: لا.. وضبط زوايا. رمضان: الله ينور عليك.. تحب تعمل كده مع نفسك وروحك الصايم: وحد يكره أن يبقي ماشي زي الساعة رمضان: يبقي نتفق مع بعض اتفاق جنتل مان الصايم: وماله تحت أمرك ياعم الشهور رمضان: السنة 12 شهر.. عندك 11 منها لمعدتك ومزاجك.. وشهر واحد لروحك.. ايه رأيك الصايم: أنا موافق.. بس ياريت تحوش عني التجار اللي رمضان عندهم موسم البيع والشراء في كل حاجة رمضان: طظ فيهم.. خلي أنت تجارتك مع الله وأنت الكسبان!