ديالوج

التقى رمضان الشهر الفضيل مع الصائم فى حوار جرى غالبا قبل الإفطار بوقت قليل ورائحة الطعام تفوح من كل بيت.
رمضان: كل سنة وانت صايم
الصائم: وفيها إيه أنا فعلا.. بامتنع عن الأكل والشرب والشهوة من اذان الفجر.. لغاية اذان المغرب.. مش هو ده الصايم ولا أنا غلطان؟
رمضان: لا أنت نسيت تقول إنك بتصوم كمان عن الشغل بحجة أن ريقك ناشف وخرمان سجاير وشاى وقهوة ومزاجك مش هو
الصائم: اغلبنا كده.. وإذا اتنرفزت باشتم شتايم خفيفة!
رمضان: يا ابنى مفيش شتيمة «دسمة وشيتمة «دايت» الغلط غلط
الصائم: طيب ما هى المسلسلات كلها شتيمة الواحد ينكسف منها فى الشارع فما بالك يا عم رمضان .. بأعمال فنية بتدخل كل بيت.
رمضان: يعنى سيادتك زعلان من ألفاظ فى مسلسل.. ومش زعلان انكم عملتونى شهر مسلسلات مش عبادات
الصائم: يا شهرنا الفضيل أنا شخصيا لما بتشرفنا.. باتفرغ للعبادة
رمضان: ومين بيقعد فى الخيم..؟ ومين اللى بيحشر الأكل.. والشرب كأنه طوال السنة جعان، يا حول الله
الصائم: ما هم عشان كده بيقولوا إن حضرتك كريم
رمضان: فيه فرق بين الكلام والسفه والتبذير
الصائم: شكلك زعلان مننا يا عم رمضان؟!!
رمضان: لأنكم للأسف الشديد بتحاولوا تعملونى شهر احتفالات وولائم وفوازير.. ومش كده وبس عملتوا سحور راقص.. وإفطار غنائي.. واتسحر سينما وافطر مقالب.. حرام عليكم.. ده شهر رحمة ومغفرة وعتق من النار.. أوكازيون عظيم من ربنا سبحانه وتعالى لعباده.. وكأنكم فى غنى عن الثواب والعياذ بالله
الصائم: يا ساتر يارب حقك علينا يا عم رمضان بس أنا والله.. باصلى التراويح.. والقيام.. والحمد لله باختم القرآن الكريم طوال الشهر
رمضان: طيب ممكن اسألك سؤال؟
الصائم: طبعا يا عمر رمضان؟
رمضان: أنت حاسس أن اخلاقك ومعاملاتك بتتحسن فى رمضان
الصائم: طبعا طبعا
رمضان: بأمارة إيه!
الصائم: من كام يوم واحد شتمنى الضهر فى الشارع
رمضان: ورديت عليه؟
الصائم: لا طبعا.. قلت له اللهم إنى صائم
رمضان: وبعد كده حصل إيه؟
الصائم: شتمته بعد الفطار!!