اللهم إني صايم

طبعا أحنا في شهر كريم ومن أحسن واطهر شهور السنة كلها ... لكننا لا ننكر ان رمضان هذا العام شاق جداا لانه جاي في جو شديد الحرارة ..لأ واليوم طوووويل مش بيخلص
المهم من يومين كان عندنا عزومة .. وطبعا حضراتكم عارفين ان رمضان يحب العزايم والولايم اللي تفضي الجيب وتهد الحيل من الوقفه في المطبخ بس طبعا اللمه في رمضان بيكون لها طعم مختلف
علشان مطولش عليكم نزلت استعد للعزومه واشتري مستلزماتها من خضروات وفاكهه وكنافه ولحمه وسمك ولبن وتمر هندي و كانت زي ما بيقولوا اول القصيدة ........
نزلت الشارع علشان اروح السوق وبجانبي سيده مسنه نازله يعني هي كمان اكيد تشتري حاجتها فوجئنا بعربيه جايه من شارع جانبي كانت هتخبطنها بس الحمد لله ربنا ستر وجات سليمه من العربيه اما صاحب العربيه فنزل منها و فضل يصرخ في وجه الست يا حرام و هاتك يا شتيمه .. لكن اختكم طبعا مش هاتسكت ما انتم عارفني غلباويه و في الحق مش بعرف حد حاولت اتدخل اهدي الأخ اللي عمال يصرخ و يشتم و افهمه انها ست كبيره و ان عيب اللي بيحصل ده لكن طبعا " مفيش فايده " لغايه ما خلص الأخ وصله الشتيمه و بعدين قاللي يالا يالا انا مش عايز اضيع صيامي عليكي ... كل ده وصيامه لسه ما ضعش
هديت الست ومشيت وخلص الموضوع ودخلت السوق اشتري حاجتي قولت اشتري الخضار في الاول .. و الطماطم شكلها حلو و جميل كده بمد ايدي انقيها لاقيت البياع بيقولي : ايه ياستاذه واحده واحده بتعملي ايه مفيش نقاوه شيلي ايدك
قولتله حاضر " ما هو بصراحه كان شكله يخوف " فقررت التخلي عن شجاعتي المره دي
المهم فضل الباشا البياع يحط في الطماطم المفعصه واللي تقريبا لا تصلح للاستهلاك الادمي قولت مبدهاش
قولتله يا عم الحاج كل الطماطم اللي حاطتها بايظه وبرضه لقيته بيصرخ ويزعق في وشي : واللهي هو ده اللي عندنا عجبك عجبك مش عجبك بالسلامه :
قولتله لأ مش عاجبني قالي طب يالا يالا متخلنيش اضيع صيامي عليكي
قولت في سري اللهم اني صايمه وسيبته ومشيت
اشتريت حاجتي ووقفت تاكسي باعجوبه علشان أروح و طبعا السواق طول السكه عمال يسب ويلعن في الناس و فجأه برضه " ماهو كان يوم المفاجات " كسر عليه سواق عربيه ميكروباس نزلوا الاتنين و اتخنقوا مع بعض وصوتهم واصل للسما وكل واحد فيهم فضل يقول " متخلنيش أضيع صيامي عليك "
لا حول ولا قوه الا بالله الظاهر ان هو ده الشعار اللي بيرفعه الناس في شهر رمضان معتقدين ان الصيام امتناع عن الاكل و الشرب بس ...
وصلت البيت فضلت انادي على البواب يشيل معايا انه يرد او يعبرني ابدا بس برضه اختكم مسكتتش روحت خبطت على الاوضه بتاعته لغايه ما صحى ماهو البيه البواب كان نايم لحد الساعه 3 بعد الضهر
ايه ياعم وجيه حرام عليك بقالي ساعه بنادي عليك وحضرتك نايم لحد دلوقتي
رد عليه وهو مشرأب ومتسالونيش يعني ايه مشرأب لأني مش عارفه
ده رمضان يا استاذه و الناس صايمه في ايه يعني هي الدنيا اتهدت
هو قالي كده وانا مقدرتش امسك نفسي فضلت ازعق .. رمضان ايه انتو خلليتوا فيها رمضان يااخي حرام عليكم كل بلوه تمسحوها في الصيام وبصراحه كان نفسي اغنيله اغنيه صباح بتاعت يا عالم فهموه رمضان معمروش قال كده "
المهم فضلت منفعله وهو يهدي فيه و انا مفيش لغايه ما لاقيت نفس بقول " يالا يالا متخلنيش .......
و سكت وقولت في سري ايه اللي انا بقوله ده هي عدوى ولا ايه " اللهم اني صايمه " وصالحت الراجل وطبعا الأكيد ان صيامي راح في اليوم ده و الله اعلم بباقي الايام ماهو كل يوم من ده " واللهم اني صاااايمه "