يوميات صايم.. حلقة رقم (6).. الست رابعة تطرد الإخوان من الميدان

قعد صايم سرحان وحاطط إيده على خده ودموعه نازلة.
زميله: مالك يا صايم ألف بعد الشر عليك الدموع دي كلها ليه حد مات ولا هتدخل السجن قريب ما ترد يا صايم ؟
صايم: اللي مزعلني ومش مخليني عارف أنام على رأي الست نجاة أنه بينام وأنا مش قادر أنام، زميله: يا عم أبوس على دماغك اتكلم بقى ؟
صايم شغال عياط: وبذمتك انت مش زعلان على نزول الأنبياء والمرسلين في ميدان رابعة وإحنا قاعدين في البيت ومحرومين من الخير ده كله؟
زميله: يا راجل انت صدقت دي كلها إشاعات وكلام ناس لامؤاخذة ضايعة منهم سيبك من الكلام ده.
صايم يمسح دموعه: انت متأكد أن سيدنا موسى ولا العذراء ولا عيسى لم ينزلوا في ميدان رابعة ميدان الأطهار الأتقياء؟
زميله ضاحكا: انت طيب قوي يا صايم ده كله "وهم" طيب أنا نفسي حد يجاوب على سؤالي الست رابعة لحد النهارده ما نزلتش الميدان بتاعها ليه ؟
صايم يضحك: لا دي عدت منك يا معلم إزاي صاحبة البيت تنزل قبل الضيوف ولكن متوقع نزول الست رابعة على آخر الشهر يعني ممكن تعيد معاهم.
زميله: يا عمي عيب انت راجل فاهم ومتعلم يعني عيب تصدق الكلام ده دول يا معلم بيتاجروا بالغلابة يعني من الآخر كده زي مقطايع السيدة.
صايم يرفع يده لفوق: شي الله يا ست.. حي.. مش عارف ليه أنا مصدق نزول الأنبياء في ميدان رابعة.
زميله: طيب روح هناك واقعد وشوف بنفسك بس أكيد هتشوف حاجات كتيرة إلا الأنبياء والمرسلين ولا الصحابة والحجة إحنا في شهر رمضان وكل الأنبياء عندهم اعتكاف أو يمكن يروحوا ميدان النهضة.
صايم: يعني أنا أروح النهضة ولا رابعة والأنبياء هيكونوا فين ريحني ؟
زميله ضاحكا: طيب أنا سامع أن الإخوان هيفضوا الاعتصام بأمر الست رابعة.
صايم: هى الست رابعة شاركت في الاعتصام ؟
زميله: هما مش قاعدين في الميدان بتاعها ولا إيه ولا الميدان ده شرعي كمان ؟.
صايم متعجبا: والله ممكن يعني كده راح علينا نكاح الجهاد مش مشكلة خيرها في غيرها بس ده مش اسمه طرد يعني كده الست رابعة هتطرد الإخوان من الميدان صح يا معلم ؟.
زميله: الست رابعة عارفة كل حاجة وكل اللي بيحصل في الميدان بتاعها والحركات دي مش هتخيل عليها يعني كلها حركات مفقوسة والطرد هو الطريقة الوحيدة لمنع الجريمة قبل وقوعها صح ؟.
صايم يرفع يده لفوق: عاشت الست رابعة. رابعة هو هو. رابعة هو هو.
زميله: هما فاكرين أن الست رابعة هتسكت عليهم أكتر من كده لا خالص الميدان العفيف الشريف الطاهر يبقى مرتع لنكاح الجهاد نكاح مش عارف إيه لا يا راجل عيب حتى شكلنا بره بقى عرة قوي.
صايم: طب هما كده هيروحوا فين" النهضة " ولا عند إخوانهم في حماس !