يوميات صايم.. حلقة رقم (4)

صايم يدخل يهرش في كل جسمه منك لله إنتي السبب كان مالي أنا بس ياربي ومال شورة الحريم
هي دي شورة الحريم لو صحت تأخر سنة والله أنا اتأكدت دلوقتي إن صاحبة شورة اعتصام رابعة أكيد صاحبتها واحدة من الإخوات كان مالي أنا بلا رابعة بلا خامسة.. مبسوطة أهو جاني الجرب.

الزوجة ضاحكة على منظره وهو يهرش: وأنا مالي هو أنا اللي قلتلك روح ولا هما اللي طلبوا منك تسمعهم
صايم بنرفزة: مش إنتي اللي قلتي بعدين يزعلوا منك رجعتلك بمرض الجرب ومش بعيد الناس بكره تقولي يا جربان مبسوطة دلوقتي ؟
الزوجة ضاحكة: فيه مبيد كويس هرشك بيه أما إنت من ساعة واحدة عملت كده أمال هما عاملين ايه؟
صايم ضاحكا: كل كلمة بهرشة لما خلوني أهرش زيهم بعد كل كلمة.
الزوجة: عادي عشان مصر يا صايم استحمل دول شوية جرب
صايم متغاظ: أحلف عليكى طلاق إنك تروحي عندهم وساعتها يا حلوة يبقي الطلاق شرعي علشان هيبقى فيكى عله يعني مش هدفع المؤخر إيه رأيك؟
الزوجة صارخة: لا الله يخليك هي مش ناقصة وبعدين أنا بهون عليك.
صايم يحط يده على رأسه: تصدقي مش بعيد عليهم يمكن عايزين يتخلصوا من نسوانهم بعتهوم على رابعة عشان يخلوا النسوان اللي هناك تجرب وكل واحد يطلق مراته ويتجوز واحدة سورية من اللي في رابعة صح ؟
الزوجة تلطم: معقولة يكون ده تفكيرهم لا لا مش للدرجة دي.
صايم:والله بعد اللي شوفته هناك أصدق فيهم أي حاجة
الزوجة: قولي بس عملت إيه معاهم؟
صايم: عملت الخير كله دول جماعة رافضة الكلام إلا مع أمريكا بس هي الوصي ونصبوا أوباما مرشدا عاما عليهم يعني أي كلمة يقولها أوباما على طول تتنفذ والسلعوة السفيرة الأمريكية بقت نائبة المرشد.
الزوجة: يا نهار أسود أمال الراجل اللي اسمه بديع راح فين هو مش موجود في رابعة؟
صايم ضاحكا: الراجل بعد فضحيته بالنقاب مكسوف قوي من الناس حتي رجالته زعلانين قوي على حكاية النقاب لدرجة أن واحد من أعوانه طلب منه أنه يلبس النقاب على طول ويخلعه وقت الفطور ويدعي على حركة تمرد والتحرير عشان الدعاء يستجاب.
الزوجة ضاحكة: يعني المهم عملت إيه في مشوارك المجرب ده
صايم زعلان: جبتي الفايدة روحت سليم جيت مجرب ومش عايز حد يقولي تاني رابعة ولا خامسة انا بكره رايح التحرير واشوف الوضع هناك إيه وبكده أكون عملت اللي عليا.. صح الكلام؟.