يوميات صايم.. حلقة رقم (2)

دخل صايم وهو ينفخ يقول: الواحد مش عارف يلاقيها منين ولا منين سبحان الله مش كفايه الصيام هي ناقصة.
زميله متعجبا: مالك يا صايم ما كل الناس صايمه مش قد الصيام افطر يا أخي.
صايم: أعوذ بالله حرام عليك بدل ما تصبرني وتقولي معلهش استحمل تقولي افطر حرام عليك يا أخي.
زميله: يا أخي كلنا صايمين اشمعنى انت يعني؟
صايم باكيا: الله يرحمك يا أمي طول عمرها كانت تخاف علي من الجوع والعطش انا صومت بعد الجواز وكانت الله يرحمها تقول الأيام جايه كتير عشان كده المدام بتاعتي الله يسترها بتخاف على زعلي قوي.
زميله متعجبا: وده كويس يعني وافترض إني أنا استحملتك طب باقي الزملا هتعمل معاهم إيه؟
صايم متغاظ: المثل بيقول ابعد عن الشر وغني له.. والمفروض انتم عارفين كلكم اني عصبي في رمضان يعني من الآخر كده الكل يبعد عني أحسن له.
زميله: بس ده مش منطق لازم في رمضان تكون روحك طيبة وحلوة وعلاقتك بالناس على أفضل ما يكون انت يا أخي في أفضل شهر عند الله يا أخي فكر بقى خليك قد المسئولية.
صايم متأثر بكلام زميله: أنا وحش أنا زفت أنا مش قادر على الصيام ليه كده صيامي بيضيع من غير ما أحس لا لا خلاص من النهارده أنا اتغيرت.
زميله1 سعيد جدا بما سمعه من صايم: أيوه كده يا صايم خليك راجل بمعنى الكلمة الصيام نعمة كبيرة من عند ربنا.
صايم يزعق في زميله: ما خلاص ياعم إيه حنفية واتفتحت خلاص قلنا مره واتنين وعشرة حاضر انت إيه ما صدقت يا إخوانا أنا صايم صايم إيه يعنى ألحنها علشان تفهموها؟!
زميله 2: مالك يا صايم انت في رمضان عصبي كده على طول يا أخي؟ وسع بالك شويه.
صايم يلهث من الخناق: يا أخي ده حاجة صعبة الواحد صايم وتعبان وطالع عينه ومع ذلك بييجي الشغل مش يقوله كتر خيرك لا وده فتح على البحري مش يقدر الظروف أبدا؟ حاجة تغيظ.
زميله 2: معلهش يا صايم أي حد يتكلم معاك قول على طول اللهم إني صايم ها هاها على اسمك.
صايم ضاحكا: شوف انت بتتكلم ازاي وطريقتك حلوة تخلي الواحد يصوم ليل ونهار والله يا سيدي وبعد إذنك أنا هروح دلوقتي عشان انت عارف إني صايم.. ماشي؟!