أنا صايم ومش طايق نفسى

" أنا صايم .. وما حدش يكلمنى " ...
" ماتخلينيش افطر عليك " ...
" ياابن ال ....... أستغفر الله العظيم .. اللهم إنى صائم "...
وغيرها من الأقوال والكلمات الخارجة عن السيطرة اللى بنسمعها فى الشهر الفضيل ( شهر رمضان ( كلنا بنستنى الشهر ده بفارغ الصبر بما فيه من الإكثار من ذكر الله وقراءه القرآن وبما يأتى به من الخير والبركات ...
بس إحنا للأسف بنحوله أحيانا ً لشهر الخناقات والحوادث والشتائم كمان ... وكل ده بحجة " إن إحنا صايمين .. ومش طايقين نفسنا " ...
أكتر أيام الشهر ده بالذات بصحى على صوت خناقه فى الشارع سواء بين أصحاب المحلات وزباينهم أو بين أى اتنين فى الشارع ... وبيبقى سبب المشكلة تافه ولا يذكر وكأنه طقس من طقوس رمضان ... وكل ده طبعا ً بحجة " أنا صايم .. ومش طايق نفسى " ...
ونيجي عند سواقين الميكروباص ... ده السواق منهم وهو صايم تلاقيه بيتخانق مع ( دبان وشه ) ... وأقل كلمى ممكن يقولها أى راكب غلبان بعفوية ومن غير قصد ممكن تخلى السواق يقلب الميكروباص بللى فيه .. لدرجة إنى كل مرة بحمد ربنا لخروجى من العربية سالمة وعلى قيد الحياة ... وكل ده برضوا بحجة " أنا صايم .. ومش طايق نفسى " ...
وللأسف بيحصل كل ده فى الشهر الكريم ... ده غير الحوادث اللى بتحصل بسبب الإستعجال ... اللى عايز يلحق الفطار واللى مش عارفه وراه إيه ..؟! , وقت الصيام ده بتبقى الناس عامله زى القنابل الموقوتة اللى ممكن تنفجر فى وجه اللى يفكر يقربلها ... يعنى من الأخر كده كل واحد يلزم بيته أسلمله ...
متى سندرك أن رمضان هو شهر الصوم والصبر ... شهر الرحمة والمودة بين الناس وشهر الكلمة الجميلة والمعاملة الحسنه وليس الألفاظ والأفعال التى لا تتقبلها حواسنا فتؤذينا ... اللهم اهدنى واهدى جميع المسلمين ... اللهم آمين ...