يا عالم افهموا.. رمضان معمروش قال كده..

أنا مش هرد عليك عشان أنا صايمة...بقوليك إيه متعصبنيش عشان أنا صايم...هقول لماما عليكي....يووووووووووه يا ماما بقي...لما أفطر هبقى أعمل..
بدأ الشهر الكريم أول أيامه، و تدريب النفس على الهدوء لازال في بدايته، و بالتالي الأعصاب غير مستقرة.
يشعر الجسم في البداية و أنه متوتر نتيجة نقص كمية الأكل و الشراب المعتاد عليها،مما يفقده أعصابه على أتفه الأمور، فتجد خناق بين الأخوة، و بين الأم و الأبناء، و بين الأب و الأبناء.
وقد يفقد الشخص صيامه بدون وعي منه، و لكن الأقوى من يقول اللهم إني صائم ويتجنب أي انفعال حتى يتعود جسمه على الصيام.
و قامت بوابة أخبار اليوم بمعرفة بعض المشاكل التي قد تحدث في المنزل وتؤثر على الصيام، وكانت الآراء كالتالي :
قالت "زمردة" مبدئيا يوم أجازة جوزي بيكون البيت مكهرب، لأنه بيكون مافيش سجاير و غصب عنه بيصحى قبل الفطار من صوتنا أنا و الولاد، و يا سلام لو طلبت منه ينزل يجب حاجه " يالهوييييييييييييييييييييييي" بتكون ليلة، وغير كدة أنا مش بستحمل طلبات زيادة، أو إنه يحشر نفسه في اللي بعمله وزودي دا أو نقصي دا، ولو دخل من بره نام انا بتغاظ اوي، طب ما انا صايمه وبشتغل وبشوف ولادي وبعمل فطار وسحور اشمعنى هو بينام وانا لاء؟!..بس عشان اهدى بسبح وانا بعمل الاكل وامشي من قدام جوزي، ولو الموضوع زاد اوي بقوم اتوضى.
و شاركت "عواطف" لا اللي بيعصب بصراحة كتير، طفل بيصرخ، راجل مبطل تدخين فيتعصب، زحمة مواصلات فيرجع البيت مش طايق نفسه، الجو الحر بيعصب، و غير كده في ناس أصلا خلقها ضيق ودول خلقهم بيضيق زيادة مع الصيام، وعصبية الراجل بتعصب الست وتخليها حتى مش عارفة تطبخ، و أسلم حل إنه ينام لحد ممراته تطبخ على الأقل يكون الطبخ بروقان من غير ميهندس ويقول يتعمل ايه وميتعملش إيه.
و يرى "شيكو" أن أكثر ما يثير غضبه أثناء الصيام أن يطلب منه شراء أي شيء وخصوصا أثناء الحر، بالإضافة إلى الإزعاج و صراخ الأطفال.
أما "أسماء" فقالت : من أكتر الحاجات اللي بتعمل مشاكل إن كل واحد عاوز يعمل حاجة مختلفة اللي عاوز يصلي و اللي عاوز يطبخ والي عاوز يشوف مسلسل و اللي عاوز يقرا قرآن، فممكن ده ميعجب ده فيتعصبوا، و غير كده طلبات الكبار الكتير و احنا بنكون همدانين من الصيام فيتعصبوا علينا لما نقولهم لما نفطر أو نريح شوية.
و قال "نور" الاختلافات عالأكل كل واحد بيبقى عاوز ياكل حاجة معينة فلو ملقهاش بيتعصب، و في ناس بتبقى متعصبة لأسباب تانية زي اللي معدل السكر بينزل عنده مثلا فيتعصب لا إراديا، أو اللي بيدخن ومش بيقدر يستغنى الشيشة أو السجاير ممكن يصور قتيل لو حد وقف أدامه.