فى نهار رمضان.. أنت نتاوى ولا ربانى؟!

"نص اليوم نوم والنص التانى في الجامع والنت بعد الفطار"، "يعني لو مفيش نت هقضي الصيام إزاي؟"، "أنا ما بعملش حاجة غلط على الفيس عشان أبطله في رمضان"، "وأنا صايمة الفيس أول الممنوعات"..
هكذا يقضي كثير منا يومه في نهار رمضان، بين الصلاة وقراءة القرأن والبحث عن شيء مسل يضيع جزء من وقت الصيام.
التقت (الوفد) مجموعة من الشباب ووجهت لهم السؤال: "في نهار رمضان أنت نتاوي ولا رباني؟"، لتعرف منهم كيف يقضون يومهم في رمضان، فأجابوا:
في الصيام الفيس "حرام"
محمد عادل، طالب بكلية آداب قسم إرشاد سياحي يقول: "في رمضان يومي وأنا صايم بيتقسم بين النوم والقرأن، يعني بصحى من النوم متأخر وبعد كده أصلى وأقرأ قرأن في المسجد، أما الإنترنت والفيس بوك بيكون بعد الفطار، لأن بصراحة في بنات بتحط صور لها مينفعش الواحد يشوفها وهو صايم".

أما إسراء محمد، طالبه بكلية آداب شعبة انثربولوجيا فتقول: "مفيش نت في رمضان خالص، هصوم صيام الجوارح، هصلى لله عتق من النار فى كل يوم وفى كل ليلة، قررت إني ما أضيعش رمضان مني السنة دي زي كل سنة، هحاول ألتزم على قد ما أقدر وربنا يقدرني وأرضيه".
نتاوي طول اليوم
" مش هقاطع النت طبعا، أنا 24 ساعه على الفيس" هكذا بدأت أماني محمد، طالبة بكلية تجارة حديثها قائلة: "أنا مبعملش حاجة غلط أو حرام عشان أبطلها وأنا صايمة، إيه المشكلة إنى أدخل على الفيس وأتكلم مع الناس وأنا صايمة، طالما بنتكلم بإحترام وفي حدود يبقى إيه المانع؟".
وتشاركها في الرأي ياسمين شريف فتقول: "أكيد مش هقاطع الفيس طالما مش بتفرج على حاجات تغضب ربنا يبقى أقاطعه ليه؟، أنا بتكلم مع أصحابي والبوستات اللى برفعها دينية، والنهار طويل أوي هشغل نفسي بإيه؟".
"ساعة لقلبك وساعة لربك"
أما هدير شحاتة فتقول: " طبعا هصلي وأصوم وأحاول مغضبش ربنا وأقرأ جزء كل يوم، ومع كل ده هأفتح الفيس شوية أكلم أصحابي بنات طبعا علشان مغضبش ربنا".
وتتفق إسراء سيد معها في الرأي قائلة: "هجهزالفطار مع ماما، وأقرأ قرأن وأصلي، وأدخل أشيت مع أصحابي وأشوف أخبارهم على الفيس، لكن مش هسمع أغاني خالص".
أما إسلام نبيه، محامي فيقول: "هصوم وأقرأ قرأن وأعمل خير، وفي نفس الوقت هشتغل مش هكسل وهقعد على النت علشان أتابع الأخبار وشغلي".