أنا صايم

أنا صايم صايم صايم
والشهر ده شهر الرحمة
ودً وذوق وعزايم
أخلاقنا العاليه وحشمه
الجن إتقيد نايم
عن كل عمايله الرخمة
إلا أنا ملطوط مش سالم
من ناس عايزه لها محاكمه
وأنا صايم صايم صايم
والشهر ده شهر الرحمة
دى مذيعة تليفزيون
بتقدم أكله لذيذه
مُزه وأحلى عيون
أجمل من موناليزا
بتقول وكلامها حنيًن
وصفًات للبطن عزيزة
تتمايل قوى وتبيًن
للقلب بتبعت فيزا
وأنا قاعد كده متلخفن
إنسان جوايا غريزه
سكيًت ع التلفزيون
وقفلت عنيًا بهدمه
أنا صايم صايم صايم
والشهر ده شهر الرحمة
حولت الموجه لكوميدي
واهي حاجه تسلى اليوم
قلت اضحك حبه واعدي
كعبلنى القهر بلوم
لقيت العيب متأصل
والأصل مهوش معلوم
تريقه مسخره وتحدى
لشعور الناس بالكوم
الراجل زى الست
والست يا عيب الشوم
تتمط تشيل وتنط
من غير أخلاق وهدوم
لقتنى بفذ وقايم
وبإيدى حدفت الجزمه
ما أنا صايم صايم صايم
والشهر ده شهر ا لرحمه
غير الموجه بسرعة
لقناة اللسبيس تون
شفت الكار والصنعه
بيغيروا وجه الكون
أطفال ما بقوش أطفال
ضربنهم بويه ولون
رقص رخيص بطال
نار مع سيف مسنون
شقاوة حروب وخيال
ضرب وموت وجنون
الدم اترتش سال
وأنا تايه وسط الزحمة
أسأل يرجع لى سؤال
براءتهم فين بالزمة
وأنا صايم صايم صايم
والشهر ده شهر الرحمة
فتحت على الأخبار
نفسي أعرف أيه الحاصل
لقيت الدنيا مرار
والأخوة ما بنها فواصل
الظلم يولد تار
والكبر إشتد وعازل
وعدونا جوه الدار
لطريقه السهل مواصل
متمكن قوى غدار
وبيعمل فينا عمايل
صهيوني أكيد مكار
وفرسته دى حلوة وناعمة
وأنا صايم صايم صايم
والشهر ده شهر الرحمة