منك لله يا سنية...كرهتينى فى العزومات بتاعة شهر رمضان.. من قبل ما يهل الشهر الكريم وسنية هات يا عزومات للى تعرفه واللى ماتعرفوش.. قرايبنا وقرايب قرايبنا وكل أهل الحتة والشارع . لدرجة انى شكيت فى عزومة من عزوماتها لما لقيت ناس بقابلهم فى الأتوبيس.. ولما اتكلمت معاهم واحنا بنفطر لقيتهم بيقولولى.. أيوة يا أستاذ زنكلونى، احنا بتوع الأتوبيس فعلا، مدام سنية كتر خيرها عزمت الأتوبيس بحاله.. طبعا النار طلعت من نافوخى .. ومسكتها بعد الفطار ولسه بكلمها ردت عليا وقالت.."رمضان بيحب اللمة وبعدين انت مش عاوز تاخد ثواب ياراجل.. روح منك لله". رديت عليها: "رمضان شهر الرحمة.. مش شهر الإسراف يا سنية.. ورمضان معمول مخصوص عشان نصوم فيه ونبطل أكل ونميمة ع الناس...وانتِ ماشاء الله عليكِ...لسانك زى الفرقلة" طبعا..انا اتعلمت..وابتديت أقلل من مصروف البيت عشان تخف شوية من العزومات.. لغاية ماجيت فى يوم لقيت تليفون جايلى من سلكاوى زميلى فى المصلحة وبيقولى : " انت معزوم ع الفطار يا زنكلونى ...ماتنساش تجيب المدام.. ولو نسيت تجيبها يبقى أحسن"، رديت: "مش عارف أقولك إيه يا سلكاوى.. العزومة دى جت فى وقتها.. الولية سنية دى خربت بيتى من كتر العزومات ...أخيرا جه اليوم اللى نتعزم فيه واوفر شوية".. رِجل الأرنب المشكلة ان سنية بعد ما عرفت لقيتها بتصرخ وبتقول:" إخى ى ى..ده صاحبك سلكاوى ده قيحة وبخيل مش بعيد يعزمنا احنا والعيال على رجل أرنب"... رحت رادد عليها: "يا سنية حرام عليكِ...داحنا فى رمضان...بطلى نميمة..بلاش كلام على الناس"..راحت مزعقة وقايلة "بلا نيلة..هو ده راجل أساسا عشان ننم عليه...مش هو ده اللى بينصحك كل شوية نصايح توديك فى داهية؟"...رديت :"هو انتى مفيش فايدة فيكى يا سنية.. رمضان يحب اللمة..مش مهم الأكل...الموجود يقضى الكل" الغريبة ان سنية زمارة القطر سمعت الكلام ده ولا كأنها سمعت حاجة ويوم العزومة الضهر لقيتها ولأول مرة فى حياتها ماسكة الجرنال وعمالة تقرا فيه.. وبعديه على طول مسكت التليفون وفضلت تتكلم ساعتين.. كبرت دماغى وقلت تغور بعيد عنى عشان أستريح.. قبل الفطار بساعة نزلنا احنا والعيال وطلعنا على أول الشارع.. راحت تنده على تاكسى قلت لها ياسنية بلاش ...نوفر شوية..هو اليوم اللى نوفر فيه العزومة..نصرف الفلوس فى حاجة تانية؟ راحت صارخة فيا:"جرى إيه ياخويا.. دى عزومة.. يعنى لازم نروح مستريحين ومبسوطين..طبعا بمنظرها ده ولا تاكسى رضى يقف لنا.. راحت الست هانم قايلة "ولايهمك يا زنكلونى...انا هتصرف" بصيت لقيتها وقفت فى وسط الشارع بالعرض وصرخت بصوتها اللى زى زمارة القطر:"تاكسى ى ى ى ى ى"...أول تاكسى شافها حاول يهرب من جنبها...لكن على مين...وقفت قدامه ومدت ايديها جوة العربية جابت السواق من قفاه...وفجأة لقيت الراجل بيصرخ "حرام عليكى يا ست..انا عندى عيال..حاضر حاضر ...هوصلك لأى حتة عاوزاها"....! عازم ولا معزوم..! المهم...وصلنا لسلكاوى واستقبلنا هو ومراته والعيال..وأول ما قعدنا على ترابيزة السفرة ابتدت الموال بتاع كل مرة.."مرات صاحبك لابسة لبس مسخرة بلوزة فوشيا على جيبة مشجرة... وبعدين سلكاوى ده ماله لايص فى نفسه كده ومش ساند طوله.. وبعدين ايه الأكل ده؟...ادى اللى كنت عاملة حسابه.. شوية ملوخية على طبقين رز؟....فين المحشى واللحمة والذى منه؟" رديت عليها بصوت واطى.."بس يا سنية كلى وانتِ ساكتة ..كسفتينا" ردت عليا "ولا يهمك يا خويا...انا هتصرف عشان تعرف ان سنية الست اللى هية!!" مفيش خمس دقايق وجرس الباب ضرب...قام سلكاوى يفتح ..لقى واحد لابس زمبيل على راسه وبيقول...مش دى شقة الأستاذ سلكاوى؟..اتفضل الطلبات...ديك رومى محشى بالكبد والكلاوى..و3 صوانى رز معمر..وفخدتين لحمة ضانى..و3 فراخ مشوية..وطبقين شوربة لسان عصفور..اما الحلو..3 صوانى كنافة ..و4 بقلاوة..وجردل أم على و6 كيلو قطايف".. راح سلكاوى صارخ بعزم ما فيه وقايل"..انا مش هدفع حاجة...انا ماطلبتش الأكل ده.."...فرد عليه الراجل..لأ..الحساب مش بإسم سلكاوى..اللى طلب الأكل ده واحدة اسمها سنية وطلبت ان الحساب يكون بإسم زنكلونى السرياقوسى"..!! بقلم : عمرو عكاشة والاسم عزومة..! بقيت مش طايقة المحروس ولا طايقه امه بعد المقلب اللي عمله فيا اول يوم رمضان..عزم العيله الكريمة كلها اخواته البنات واجوازهم وعيالهم وبنت عمته وبنت خالته واجوازهم وكمان ولاد خالته ومراتتهم..ده غير امه!! واتعكيت لوحدي وعملت حتة دين سفره ولا بوفيه فرح خمس نجوم! بس انا كان أملي بعد العزومه الكنج دي اني ارتاح الأيام الجايه من وقفة المطبخ بعد ما فاض من الأكل اللي يكفينا كام يوم.. لكن المحروس ابن اللذين مخلنيش اتهنى على الحلم ده بعد ما لف الأكل اللى فاضل واداهم لامه وهي مروحه.. وياريتها حتى سمعتني كلمة حلوه ولا قالت حتى متشكرين.. بس عشان اكون حقانيه بنت خالته وبنت عمته ومراتات ولاد خالته كلهم ناس ذوق..اتصلوا ع الضهرية والعصرية يسألوني اذا كنت عايزه مساعده.. بصراحة انا شكرتهم وعملت كل حاجه بنفسي!! سحور آه..فطار لأ وطبعا ضربت لي بوز من ساعتها.. ولأني بجد ماكنش فيا حيل ادخل المطبخ اصريت تاني يوم رمضان نفطر فول بالزيت..وطبعا ماقولكمش المحروس عمل إيه أول ما شاف طبق الفول..كان هيجيله سكته قلبيه..كان بيعيط وهو عمال يشم روائح الاكل اللي جايه من عند الجيران اشكال والوان..والظاهر كان فاكرها من عندنا..قعد يلطم زي الولايا ويقول على طريقة فؤاد المهندس: "ياخواتي صايم وراجل شقيان ومراتي عايزة تجوعني حتى في رمضان.. دي مصيبة إيه دي؟!!..تعالي لي يا امااا!!" لقيته على بليل بيقولي: "خلاص ياختى فرجت..عشان تتسدي وتفردي ام البوز ده..احنا معزومين الاسبوع ده..عندك بكره عند بنت خالتي وبعده عند بنت عمتي وبعده عند ابن خالتي الكبير.. يبقى يومك منيل واسود من قرن الخروب لو شفت طبق الفول ده تاني ع الفطار..سحور اه..فطار لأ"!! بصراحه بعد البوقين اللي قالهم.. فردت بوزي بجد.. يا سلام..أحلى حاجه في رمضان لما تكون معزوم.. بتبقى الواحده مننا حاسه انها برنسيسه!! وتاني يوم قلت اعمل برضه بأصلي واتصل ببنت خالته واعمل زيها واسألها اذا كانت عايزه حاجه..مجاملة يعني.. فاتفاجأت بتقولي: "انتِ بنت حلاااال..اتكلمتي في وقتك..شوفي انا البوتاجاز اللي عندي اربع عيون ومش مكفي.. والنبي عليكي بالرز..اعملي لنا كده كميه محترمه.. ييجي سبع تمن كوبايات ولا اقولك اعملي لنا حلتين!".. مصدقتش نفسي..هو يعني انا البوتاجاز بتاعي بخمس عيون..ما انا عملت عزومه قد كده وماكلفتش حد يعملي حاجه.. طبعا ماكنش فيه وقت اولع أصلا.. جري على المطبخ وطلعت كل الرز اللي حيلتنا وقسمته على حلتين وطبخته!! أول ما وصلنا لقفت هي مني الرز بسرعه وحطته ع السفره.. الأصناف كانت معقوله بس بصراحه أكلها مايجيش حاجه جنب أكلي.. مش شكرانية في نفسي والله..أكلها عامل زي أكل المطاعم..شكله حلو بس مالوش طعم.. وأم المحروس شغالة شكرانية في الأكل وفي طعامته وتقول: " الله يا فوقيه.. ليه التعب ده كله وانتِ صايمة..لا بجد تعبتي نفسك!!"..وجت على الرز وقالت: "الله يا فوقيه الله.. ده رز ولا كباب".. راحت فوقية ضحكت وقالت: " دي عصمت اللي عاملاه يا نينا "..أول ما سمعت كده قعدت تكح تكح قال يعني الرز اتحشر في زورها وبعد ما شربت شوية ميه راحت قايلة: " باينها زلطه..تبقى تنقيه كويس يا عصمت"!! وطبعا المحروس سمع كده وهات يا ضحك من تحت لتحت! على مين....؟! مر أول يوم عال العال.. جينا على اليوم التاني.. قلت استذكى واتصل ببنت عمته على العصرية قبل ما انزل من البيت واسألها إذا كانت عايزة حاجة وكده مش هتبقى عاملة حسابها عليا، ويبقى اسمي جاملت برضه..اتصلت بيها لقيتها بتقولي: "بنت حلاااال.. اتكلمتي في وقتك..انت كده كده قدامك ييجي ربع ساعة عشان تتحركي..صح؟..عليكي يا حبيبتي بقمر الدين والسلطة..خليها متحبشه ومليانه خيار..والحلو يا عصمت..كنافة وقطايف من الراجل اللي تحتكوا..انا عارفه حاجته حلوة..أحسن اختك لايصه"!! بجد ولعت.. طبعا ماكنتش عاملة حسابي على عصاير خالص.. وبعدين الراجل اللي تحتنا ده بيبقى واقف عليه قبل الفطار طابورين مش طابور واحد.. وكالعادة انا اللي اتعكيت.. ووقفتلي في الطابور ييجي نص ساعة وضغطي جاب الرابع.. والمحروس قاعد في العربية بيسمع قرآن!! تالت يوم.. قلت انا مش هاتصل خالص.. ويقولوا عليا اللي يقولوه..كل واحدة تقع في ورطة تقول عصمت!!..أعمل عزومه اتهد..أتعزم اتهد.. ده إيه النحس ده..وياريت حد حاسس بهدتي!! لقيت المحروس راجع بدري من الشغل مش زي عوايده.. ودخل المطبخ وقعد يفتش في الحلل ولما مالقاش فيهم حاجة بصلي باستغراب وقال: "إيه ياوليه..هو انتِ ما طبختيش حاجة النهارده؟!!!"..رديت عليه باستغراب: "مساء فقدان الذاكرة يا محروس..هو انت مش قلت اننا معزومين النهارده عند ابن خالتك؟!!" راح خابط ايديه على دماغه وهو بيقول: "يا شيخه..هو انا ماقولتلكيش!! ابن خالتي عازمنا على رمضان دش بارتي"! بقلم: رانيا صالح