- قلنا إمبارح في آخر فقرة إنّ غادة نافع "حجرت" على والدتها الفنانة الكبيرة ماجدة الصباحي، وقلت إنّ ده منشور في "الوطن" النهاردة وحصل، ولكن فوجئت بالفنانة ماجدة تنفي "الحجر" ونشر زميل في "اليوم السابع" نفيها وأنها "هتقاضي" مَن نشر (اللي هو أنا) وهتاخد حقها بالقانون منه (اللي هو أنا)، طب وبعدين.. أقولك أنا:
- لأول مرة هنا في "لا تنسى" هنشر مستندات أو جزء من المستندات اللي عندي بخصوص قضية الحجر ردًا على السيدة ماجدة وابنتها، وللمواقع التي نشرت نفيها وتوعدها ب"المقاضاة" وهكذا، وسيبك من ده كله أنا بحب ماجدة جدًا، وبحب صوتها جدًا، وأقدر تاريخها جدًا، لكن ده ميمنعش النشر، نقطة ومن أول السطر.
- لسه مع أهل الفن، وكأن مصر مفهاش حديث إلا الحديث عن "الواقي الذكري" والواد شادي والممثل الشاب أحمد مالك، طب أحمد اعتذر وأبوه باعه وقال "عقوق للوطن والدين"، وشادي قال ""بهزر وده برنامج كوميدي"، والحقيقة شايف إن الإعلام والصحافة- ولا أعفي نفسي طبعًا- سخّن القصة، و"الداخلية" كبّرت الموضوع شوية، طب ازاي والعيال غلطوا ولا لأ؟
- خلينا نتفق أن العيال غلطوا، وده فعلًا يُصنّف أنّه قلة أدب، وتابعت أمس اتصالات الجمهور بغالبية البرامج، ولفت نظري واحدة قالت للمحامي مالك عدلي في "العاشرة مساء": "يعني ينفع أبعت لك هدية في عيد ميلادك عبارة عن (ألويز) وأقولك كل سنة وأنت طيب"، ورد مالك قالها "مش هقبلها، بس مش هقدّم ضدك بلاغ"، وتطور الأمر إلى الملابس الداخلية والخارجية وهو ما دعا وائل لعمل رقم قياسي جديد وقعد حتى الخامس فجرًا، طب وبعدين في قصة "الواقي"، برضه أقولك:
- خلاص بأه، الموضوع خد أكبر من حجمه، العيال اعتذرت، وغالبية الرأي العام تعاطف مع الداخلية أكتر من تعاطفه مع العيل اللي شاله الرئيس يوم الاحتفال بعيد الشرطة، أي والله، طب وإيه بأه، أقولك على وزارة الداخلية تضرب مثلًا وتستخدم أقصى درجات "التسامح والسماح" وتقول: "تنازلنا"، أيوة الداخلية مقدمتش بلاغ، بس اللي قدّم ضابط تابع للوزارة، ونكفي على الخبر ماجور يعني "العفو عند المقدرة"!.
- بس والله اللي عملوه العيال ده "كوم" واللي عملوا ابن المشروع الإسلامي والمباركي والسيساوي الأستاذ سيد علي "كوم تاني"، تخيل الراجل قال على الهواء مباشرة: "لولا العسكري الراجل كنت هتلاقي الواقي الذكري ده جنب أمك"، طب بالذمة في إعلام كده؟ وفيه هري كده؟، وفيه عك كده؟، كده أوووفر أوي.
- وبمناسبة ال"أووووفر"، النهاردة مسكوا 5 عيال في مقابر القوصية بأسيوط كانوا خاطفين طفل وطالبين فدية مليون جنيه والخمسة منهم 2 خريجين حقوق وآداب والخمسة من عيلة الطفل وحبسوه في المقابر 7 أيام، طب خد "التقيلة" قطعوا عقلة صباعه السبابة ب"مقص وأجنة"، وبعتوها لأسرته عشان الأسرة تبعت الفلوووس، متخيل "الجبروت" والتخلف، الطفل عنده 8 سنوات!.
- وجبنا سيرة الجرايم، خد عندك: ولد في كفر الزيات بالغربية عنده 18 سنة طلع فوق السطوح لقى مرات جده عندها 36 سنة "مراته التانية" حاول يبوسها، منعته، حاول يغتصبها، قاومته نزل ضرب فيها بخشبة ماتت، طب هرب أبدًا والله، اعتدى عليها لمدة ربع ساعة بعد ما ماتت!.
- طب تسيبك من الهم ده وتيجي معرض الكتاب اللي اشتغل النهاردة، وشوف "الافتكاسة" دي، وزارة التموين بالتعاون مع وزارة الثقافة اتفقوا على خصم 90% من قيمة أي كتاب خلال فترة المعرض لحاملي بطاقة التموين، وذلك عند الشراء من الجناح المستقل بالمعرض تحت اسم "مبادرة كتاب ورغيف"، يا "وزيرين" والله ده عيب، عيب أوي، أنتو بتهينوا المعرض وبتهينوا الثقافة وبتهينوا الناس، مفيش كده في الوجود عيب!.
- طب نروح للي مش عيب، النجم الخلوق والكبير واللي فرحنا وامتعنا سنين- أهلي ومنتخب مصر- أيوه هو "أبو تريكة"، الراجل وبهدوء شديد رد على اللي هاجموه بسبب كلمته في الجزائر ووصيته أنّه يتدفن ومعاه قميص مكتوب عليه غزة، وقال: "لا أهتم بردود الفعل نهائيًا" وعليه فكل اللي هاجم "تريكة" المفترض يحس ويسكت.
- وعشان كله ميبقاش ضرب ضرب ضرب، قول: "ماعندكش فكرة هواك قد إيه بيهدى زماني هنا قد إيه؟ ماعندكش فكرة رضاك قد إيه بيغني حياتي غنا قد إيه؟ ماعندكش فكرة أيوة يا أحلى الناس في عنيا أيوة يا أغلى الناس، أيوة أيوة يا أحلى الناس في عنيا، أيوة يا كل الناس أنا إحساسي بحبك أكتر من كل الإحساس فوق الحب بحبك حب عجيب وغريب لو قسموه على كل جراح الدنيا تطيب".