- عم صيام: يعنى هتدفعوا كام؟!.
- مندوب الشركة: 100 ألف جنيه.. وزيادة 5% فى السنة.
- عم صيام: جرى إيه يا عمنا.. دا كلام يتقال؟.. دا انتو شركة محمول يعنى بتكسبوا قد كده.. وبعدين أنا هديكم أفكار تخدمكم فى شغلكم آخر خدمة.
- مندوب الشركة: طيب اقترح.
- عم صيام: تدفعوا 150 ألف جنيه فى السنة.. وزيادة سنوية 10%.
- مندوب الشركة: بس دا كتير قوى.
- محمد: ثوانى بس يا صيام بيه.. معقولة هنحط برج محمول فوق مدنة الجامع؟!.
- عم صيام: وإيه المشكلة؟.. ما الأبراج مرشقة فى كل حتة.. فوق البيوت.. وفوق المستشفيات.. والكل بيتراضى.
- محمد: فيه ناس ممكن تقول الكلام دا حرام.. ربنا بيقول: «فى بيوت أذن الله أن ترفع ويذكر فيها اسمه».
- عم صيام: بيوت مش مدنة البيوت.. وهى الجوامع زمان كان ليها مدنة.. المصريين العباقرة همه اللى اخترعوها.. أيام الفراعنة كانت المسلة رمز المعابد.. لما دخلت المسيحية خدنا المسلة ودقينا فوقها صليب وعملناها برج كنيسة.. ولما جانا الإسلام خدنا البرج ودقينا فوقه هلال بقى مدنة.
- محمد (باستغراب): انت جايب الكلام ده منين؟.. المسألة محتاجة فتوى شرعية.
- عم صيام (إلى مندوب الشركة): ركز معايا أنا يا عمنا وسيبك منه.
- مندوب الشركة: عموماً احنا معندناش مانع نوافق على 150 ألف بس تبقى الزيادة السنوية 5%.
- عم صيام: زقها ل7%.. هقول لك الله يبارك شحنكم ويقوى خطوطكم.
- مندوب الشركة (ضاحكاً): مفيش مشكلة.
- محمد: الكلام ده حرام.
- سامى: أنا فاكر إن واحد م المشايخ الكبار قال من كام سنة إن الموضوع ده مفيهوش مشكلة.. ما دامت الفلوس هتتصرف ع الجامع.. بس فيه مشكلة أهم.. المسئولين فى الأوقاف هيقولوا إيه؟!.
- عم صيام: هياخدوا نسبة من المبلغ المدفوع كل سنة ويدعوا لنا.. دا احتمال يعمموا التجربة الفريدة دى على كل الجوامع.. دول يكسبوا دهب.. انتو ناسيين إن إحنا بتوع الألف مئذنة.. الموضوع دا يجيب مليارات.. أنا مش فاهم المسئولين تايهين عنه إزاى؟.
- سامى: رزقنا بقى يا صيام بيه.
- مندوب الشركة: كده يبقى اتفقنا.. تجيبولنا موافقة الأوقاف وننفذ على طول.
- عم صيام: انت بتلعب فى الموبايل ليه يا حاج محمد؟!.
- محمد: لا مفيش حاجة.. بكتب رسالة بس.
- عم صيام: على فكرة أنا عندى شوية أفكار إعلانات تخليكم فى السما.. أول ما تتعمم التجربة وأبراجكم تعلى فوق المآذن تقولوا للناس فى الإعلانات: «لما يكون الاتصال م القلب.. يرضى عليك العبد والرب».. «اتكلم من قلبك.. صوتك هيوصل للسما».. «اتكلم وادعى من قلبك.. دعوتك هتطلع من غير حجاب».. «خط موبايلك.. طريقك إلى الجنة».
- سامى (مذعوراً): يا نهار أسود.. الأخ عماد وعصابته.
- عماد: بتقول إيه يا واد يا مارق انت؟.
- سامى: ها.. بقول الأخ عماد وإخوانه.
- عم صيام (وهو ينظر إلى محمد): أكيد فيه خلية نايمة وسطينا.. (إلى مندوب الشركة): غور من هنا.. برج محمول إيه اللى هنحطه فوق المدنة.. انتو عاوزين تدنسوا بيت الله.. وبعدين المحمول حرام.. مش كده يا شيخ عماد؟!.
- عماد: مش حرام.. انت مش شايفنى شايل حتة!.
- عم صيام: يبقى الموبايل حلال حلال حلال.. بس شرط يكون على نظام الشيخ عماد.. (وهو يهتف ويشير إلى عماد): خط الشيخ طريقك إلى الجنة.