- عم صيام: أوكازيون يا ولاد.. فيه أحسن من كده؟.. «العُمرة إلى العُمرة والجمعة إلى الجمعة ورمضان إلى رمضان مكفرات لما بينهن إذا اجتنبت الكبائر».. شوف الجمال يا حاج محمد!.
- محمد: صدق رسول الله صلى الله عليه وسلم.
- عم صيام: أنا مش فاهم بيسموا عُمرة رمضان عُمرة ليه؟!.
- سامى: أُمال يسموها إيه؟!.
- عم صيام: المفروض يسموها عَمرة بفتح العين.. زى عَمرة العربية كده.. تبقى العربية بتقطع وبتقف.. وتفوت زيت شوية.. وميّه شوية.. لحد ما يستلمها الميكانيكى اللى هو يرجعها شابة وعفية بشمع الفابريقة.
- محمد: صحيح العُمرة رحلة روحانية عبقرية خصوصاً لو كانت فى رمضان.
- عم صيام: بطلوا الكلام القديم دا.. فهّموا الناس إنها عَمرة.. عشان يدفعوا.. مصاريف العُمرة بقت غالية جداً.. وأنا ملاحظ إن الرِجل ع الحجز مش زى كل سنة.. يبقى لازم ندخل ع الناس دخلة جديدة.. اشتغلوا صح يا إخوانّا.
- سامى: يعنى نقول لهم إيه؟!.
- عم صيام: أنا أقول لك.. تمسك ودن المسلم من دول بكلام عن الذنوب والمعاصى اللى عمّال يأتيها طول السنة.. وإنه أكيد رايح فى داهية.. مع شوية كلام عن الثعبان الأقرع اللى ضوافره من نحاس.. وإزاى هيجيله فى القبر يخرجه بضوافره من التراب ويهبده 70 متر تحت الأرض.
- محمد: بس فيه ناس بتشكك فى الأحاديث دى؟!.
- عم صيام: دول شياطين الإنس يا عمنا.. اشتغلوا انتو صح.. كل مسلم وله نقطة ضعف معينة.. خش ع الواحد من دول.. بص فى عينيه كويس.. اسأله انت شغال إيه؟.. لو قال لك موظف.. كلمه ع الرشوة لأنه أكيد مرتشى.. لو صنايعى كلمه ع المخدرات.. لأنه أكيد بيتعاطى.. لو واحدة ست.. كلمها عن النميمة.. عشان أكيد نمامة.. كلمها عن طاعة الزوج.. لأنها أكيد مطلعة عين جوزها.
- محمد: وافرض كان واحد بدقن وبيصلى وبيسمع كلام ربنا؟!.
- عم صيام: بسيطة كلمه عن التجارة بالدين.. لأنه أكيد بيتاجر بيه!.
- سامى: على كده مفيش ولا مسلم كويس.
- عم صيام: أكيد.. أُمال إحنا كده ليه؟!.. اسمعوا منى هتلاقوا الكل جاى يجرى ع العُمرة.. الناس كل عيشتها حرام فى حرام.. وكلها محتاجة تغسل.. انتو ما بتشوفوش الجمعيات اللى بتيجى فى التليفزيون بتلم فلوس أد إيه.. كله بيطلع فى الغسيل.
- سامى: خلاص نشتغل عليهم بالأسطوانة دى.. لعل وعسى.
- عم صيام: ركزوا على موضوع العَمرة.. وكل حاجة هتمشى كويس.. اعملوا يافطة كبيرة فى نص الشارع عليها شعار الحملة اللى هنّظمها.. واكتبوا عليها «المسلم البايظ.. تصلحه العَمرة».. وما تنسوش تحطوا فتحة ع «العَمرة».. (يسمع صوت فرامل سيارة.. ثم ارتطام عنيف).. فيقول صيام: يا ساتر يارب.. روح يا سامى شوف إيه دا.
- سامى: يا نهار مش فايت.. الحق يا صيام بيه.
- عم صيام: فى إيه؟.
- محمد: استر يا رب.
- سامى: عربيتك اتبشملت.
- عم صيام (وهو ينظر إلى السيارة): يا نهار أسود.. فين العربية اللى خبطتها؟.
- أحد الواقفين: دا واد شاب كان بيأمرك.. خبط عربيتك وهى واقفة وجرى.
- عم صيام: ابن الواطية.. وانتو معرفتوش تمسكوه.. ولا تاخدوا رقم العربية.
- أحد الواقفين: ما لحقناش.. دا زاغ فى لمح البصر.
- عم صيام: شعب واطى صحيح.. أنا عملت إيه يا رب فى دنيتى.. عَمرة عربية.. وكمان فى رمضان؟!.