- عم صيام: مبسوطة يا شيماء هانم؟.. آدينا بنتسحر بره.. تقدرى تقولى لى إيه الفرق ما بين اللى بناكله هنا واللى بناكله فى البيت؟.. بردو الفول والطعمية والبطاطس والسلطات والزبادى وشوية العيش.
- شيماء: الفرق فى القعدة وسط الناس يا حاج.. الفرق إننا خرجنا.
- عم صيام: والله الأكل مالهوش أى طعم.
- منى (ضاحكة): عشان هتدفع كتير.
- عم صيام: دا كلام تقوليه يا منى.. هى المسألة فى الفلوس.. ما انتو عارفين أنا راجل متلاف.. آخر حاجة بفكر فيها الفلوس.
- طارق: إيه متلاف دى؟!.
- عم صيام: يعنى بصرف اللى فى جيبى.
- طارق (ضاحكاً): انت؟!.
- عم صيام: أومال خيالى يا واد.. كُل يا خويا كُل.. (إلى منى): والله السحور اللى بتعمليه أطعم بكتير.. بس هقول إيه؟!.
- منى: ما تقولش.. كُل!.
- عم صيام: شبعت الحمد لله.. أشرب بقى.. (إلى الجرسون): جرسون.. يا جرسون.. الحساب يا ابنى.
- الجرسون: 400 جنيه.
- عم صيام (بهلع): كام؟!.. يعنى الراس تقف ب100؟!.
- الجرسون: مش فاهم يا فندم.
- عم صيام: أفهمك بعدين.. اتفضل يا خويا.
- الجرسون: ميرسى يا فندم.
- عم صيام: حد يقول كده.. شوية فول وعيش وزبادى ب100 جنيه؟!.. آخر زمن.
- منى: ما كل الناس بتدفع وهى مبسوطة أهه.. خليك زيهم.. ادفع وانت مبسوط.
- عم صيام: شعب واطى.. معاهم فلوس قد كده.. المشكلة إنهم بيدعوا الفقر.. تلاقى المواطن من دول عمال يشتكى ليل ونهار م الغلا.. وإن المرتبات قليلة.. وتلاقيهم ملمومين زى النمل ع المطاعم والكافيهات.
- منى: فيه ناس كتير غلابة فعلاً.. ما تبصش للى حواليك.
- عم صيام: انت اللى مش عارفة حاجة.. الغلبان اللى بتتكلمى عليه دا بياخد م الدولة قد كده.. وأهل الخير بيدوا له.. لعلمك البلد دى مفيهاش حد فقير.. ما فقير فيكى يا بلد غير الموظف اللى زى حالاتى.
- منى (ساخرة): قول كلام غير ده!.
- عم صيام: ليكى حق.. أنا اللى عودتكم على كده.. كل اللى عاوزينه بتاخدوه.. من أول الأكل والشرب لحد كروت الشحن.. فكرتينى.. تعرفى الواد سامى اللى بينضف الجامع عنده خطين موبايل.. وبيشحن دا ودا.. مرة يتصل بيا م الخط الأولانى ومرة م الخط التانى.. الواد رمضان معاه موبايل بشريحتين.. وهو كمان بيخلبطنى بأرقامه.. وتقول لى شعب فقير.. دا شعب واطى.
- منى: بس فيه ناس مش لاقية حق الإسبرين.. انت بتبص للناس فى القاهرة.. روح الريف هتحس إنك فى بلد تانية.. أى واحد عايش فى القاهرة بيعرف يتصرف ويحل مشاكله.. إنما براها دنيا تانية.
- عم صيام: متهيأ لك.. كل حاجة فى الأرياف رخيصة.. الناس هى اللى مش عاوزة تشتغل.. عاوزين ياكلوا من غير ما يشتغلوا.. خدوا على كده.. عاوز ياكل ويرحرح.. يتكلم ويرحرح.. يمدد ويرحرح.. ينام ويرحرح.. وفى الآخر يدعى الفقر.. عالم واطية.
- منى (ساخرة): حقك.. اتكلم براحتك.
- عم صيام: انت عاوزانى أدفع وما أتكلمش.. اللى بيدفع فاتورة الحساب من حقه يتكلم.
- منى: طبعاً.. المهم أصحيك بكره الساعة كام؟!.
- عم صيام: لا.. أنا ناوى أبلطج لى كام يوم.. حقى.. وهى الحكومة بتدينا حاجة.. سيبينى الكام يوم الجايين أنام براحتى.. صحينى بس قبل الفطار أروح أطل ع المكنة أشوف الحوافز والمكافآت نزلت ولا لأ.
- منى: أوك.
- عم صيام: آآآه.. هنام وأرحرح.