- شيماء: خليك كيوت يا حاج وزوّد المصروف.
- عم صيام (بغضب): بتكلمينى بالطريقة دى إزاى يا بنت؟!.
- شيماء (وهى تتأفف): ما تبقاش نوتى بقى!.
- عم صيام (بعصبية): إنتى بتجيبى الكلام دا منين؟.
- شيماء (ضاحكة): م السوبر ماركت.. ياللاه يا حاج.. هات 30 جنيه!.
- عم صيام: انتى مصروفك كام يا شيماء؟.
- شيماء: 15.
- عم صيام: أنا هخليه 20 جنيه ودمتم!.
- شيماء (بإصرار): مش هينفع!.. عاوزه 30 جنيه.
- عم صيام (بإصرار مقابل): تاخدى زيادة 100% مرة واحدة.. مستحيل.. (وهو يلتفت): يا منى.. يا منى.. تعالى شوفى بنتك!.
- منى: كفاية أوى 20 جنيه.. دول كتير كمان!.
- عم صيام: قولى لها.. قال 30 جنيه قال.. ليه يعنى؟.. تاخدى مصروف 900 جنيه فى الشهر؟!.
- شيماء: إنت عارف الرد بول بكام؟!.
- عم صيام: إيه الرد بول دا؟!.
- شيماء: عصير.. تمنه 20 جنيه.. والشيبسى ب7.. تحب أقول لك باقى الأسعار.
- عم صيام: كل دى حاجات مضرة وقرف.. ماما بتعمل عصير يجنن.. ابقى اعملى لها البتاع اللى بتقول عليه دا يا منى.
- شيماء (وهى تبكى): مليش دعوة عاوزة 30 جنيه.
- منى: اسمعى الكلام يا شيماء.
- شيماء: اسمعوا انتو الكلام.. (وهى تنظر لأبيها): وبعدين ما انت معاك فلوس كتير.
- عم صيام (بانزعاج): إيه الكلام اللى بتقوليه ده يا بنت؟.. عاجبك كده يا منى؟!.
- منى: آخرة دلعك فيها.
- عم صيام: خلاص زمن الدلع انتهى.. مفيش غير 15 جنيه.. عاجبك.. عاجبك.. مش عاجبك انتى حرة.
- شيماء (وهى تتركهم باكية): ايه القرف دا!.
- منى: قرف أما يقرفك!.
- صيام: تربيتك!.. (يرن جرس موبايل صيام فيرد): ألو.. وعليكم السلام ورحمة الله وبركاته.. إزيك يا حاج محمد!.. خير إن شاء الله.
- الحاج محمد: فلوس التبرعات قربت تخلص.. مش باقى غير 300 جنيه.
- صيام: ونسبتنا؟!.
- الحاج محمد: النسبة بتاعتنا راكنها على جنب من أول رمضان.
- عم صيام: إحنا هنفتح صندوق تبرعات أول 10 أيام من رمضان بكره.. مش كده؟
- الحاج محمد: إن شاء الله.
- عم صيام: أنا بفكر نزود نسبتنا شوية.. إحنا بنتعب أوى يا حاج.. موائد رحمن.. وشنط رمضان.. عمالين نشترى ونطبخ ونعبى.. لا لا لا.. النسبة اللى بناخدها دى ما تنفعش.. دا حقنا الشرعى.. ربنا بيقول «والعاملين عليها».. إنت نسيت كلام الشيخ رضوان ولّا إيه؟!.
- الحاج محمد: وهنعمل إيه النهارده؟.. بقول لك مفيش غير 300 جنيه!.
- عم صيام: قضّيها أرديحى.. شوية بدنجان على شوية بطاطس على شوية قوطة.. واعجنها مسقعة.. طعمة ولذيدة وتحرّش المعدة.. والحلو عرقسوس.. رخيص وعلى أد الإيد.. والدنيا تمشى.
- الحاج محمد: اللى تشوفه.. بس عاوزك تفكر فى موضوع زيادة النسبة ده شوية؟.. أنا حاسس إنه حرام.
- عم صيام: انت هتحلل وتحرم على مزاجك.. أنا رئيس مجلس إدارة الجمعية وبقول لك.. وبعدين انت ناسى إنك هتستفيد انت كمان.. خد رأى سامى وشوف هيقول لك إيه؟.
- الحاج محمد: ما إنت عارف سامى.. بيموت فى أى مصلحة!.
- عم صيام (ضاحكاً): يبقى خليك كيوت يا حاج وزوّد.