- عم صيام: الجزار جاى دلوقتى.
- رمضان (ضاحكاً): بصراحة موضوع العجل ده اختراع فى الجون.. خليت سطوح العمارة مزرعة.
- عم صيام (ضاحكاً): يا ابنى أنا مليان اختراعات.. الشاطر اللى يعرف يحلب القرش من جيب الزبون.. وأديك شايف اللحمة بقت بكام.. العجل ده 500 كيلو تمنه 20 ألف جنيه.. يصفى لحمة 300 كيلو.. اللى باعهولى قال لى كده.. اضرب بقى 300 فى 150 جنيه يعنى بنتكلم فى 45 ألف جنيه.
- رمضان: دا غير الحواشى والكوارع.
- عم صيام (منتشياً): كل حتة فى العجل ليها تمن.. انت فاكرنى تلميذ.. أنا أعرف أجيب القرش إزاى.
- رمضان: بس ما أظنش العجل يصفى 300 كيلو لحمة.
- عم صيام: أكتر.. مش كده؟!.
- رمضان: أقل من كده بكتير.
- عم صيام: ما كنتش أعرف إنك جزار إلا دلوقتى.. انت هتفتى يا رمضان؟.. بقول لك اللى باعهولى قال كده.
- رمضان: جايز بردو.
- عم صيام: نقطنا بسكاتك.. الجزار جه أهه.. مراحب يا أسطى سيد.
- سيد: إزيك يا باشا.. أدبح وأربع.. ولا عاوزنى أشفى.
- عم صيام: عاوزك تشفى طبعاً.
- سيد: تحب أقسم اللحمة 3 تتلات؟!.
- عم صيام: انت فاكره ندر يا عمنا؟!.
- رمضان: هو انت مش هتوزع منها حاجة؟!.
- عم صيام: أوزع؟!.. احنا فى رمضان.. مش فى العيد الكبير.
- رمضان (ساخراً): سعادتك عمرك ما ضحيت.
- عم صيام: العيد الجاى أضحى بيك إن شاء الله.. (إلى سيد): إيه الجيش اللى جره وراك ده يا أسطى سيد؟!.
- سيد: المساعدين بتوعى.. انت فاكر دبح العجل بالساهل؟!.
- عم صيام: بقول لك إيه إحنا اتفقنا على 150 جنيه.. مش هدفع مليم زيادة.
- رمضان (إلى سيد): بس ده قليل قوى.
- عم صيام: وانت مالك انت؟!.
- سيد: أنا واخد الموضوع خبرة بردو.. أنا طول عمرى بدبح خرفان.. ودى أول مرة أدبح عجل.
- رمضان (بخوف): أيوه بس انت قلت من شوية: «دبح العجل مش بالساهل».
- عم صيام: وهو اللى يدبح الخروف هيعصى عليه عجل.. اتوكل على الله يا عمنا.. (إلى رمضان): اكتم النفس يا واطى.
- سيد: ياللاه يا رجالة.
- أحد المساعدين (بخوف): خش عليه الأول يا أسطى عشان تكتفه.
- سيد: ميت مرة أقول لك اللى يخاف م البهيمة تاكله.. العجل بيشوفك أكبر من حجمك عشر مرات يا حمار.. يعنى بيحس إنه نملة قدام فيل.. إنما لو شم فيك الخوف يمضغك.
- عم صيام (بإعجاب): صحيح.. فوق كل ذى علم عليم.
- المساعد: بس أنا عمرى ما كتفت عجل يا أسطى.
- سيد: خش وكتف ياد.
- المساعد: حاضر يا أسطى.
- عم صيام (إلى رمضان منتشياً): شايف الشغل يا رمضان!.. (وهو ينظر إلى سيد): يااااااااه.. كل دى سكاكين؟!.. ورينى كده!.
- سيد (بذعر): خبيها ورا ضهرك!.
- عم صيام (وهو يلوح بها فى الهواء): دى حلوة قوى.. شوف يا واد يا رمضان بتلمع فى الشمس إزاى؟!.
- سيد (بذعر): خبيها.. خبيها.
- عم صيام: ليه؟!.
- المساعد (فجأة): الحق يا أسطى العجل فرط م الحبل.
- سيد (بهلع): ده بيجرى ناحية السور.. امسكوه.
- رمضان: يا نهار أسود ده نط.
- عم صيام (وهو يلطم): الله يخرب بيوتكم.. العجل انتحر.