- عم صيام: وإيه يعنى لما نتقشف شوية؟!.
- منى: كفاياك تقشف بقى.. انت مش شايف راسك بقت عاملة إزاى؟!.
- عم صيام (يتحسس رأسه الحليق ثم بتجهم): وإيه يعنى؟.. أنا لقيت نفسى عاوز أحلق زيرو.. قلت والله ما مخلى فى نفسى حاجة.. ما انتى عارفانى نزيه قد إيه.
- منى (ساخرة): نزيه قوى!.
- عم صيام: افهمينى يا منى.. فيه شقة جديدة احتمال أوقعها.. صاحبها مش قادر يكمل أقساطها.. وبيتحايل عليّا أشتريها.. بس أنا سايبه يستوى على نار هادية!
- منى: ما شبعتش شرا شقق؟!.. قل لى صحيح يا صيام.. انت بتزكى عنها؟!.
- عم صيام: أزكى عنها؟.. إزاى يعنى؟.
- منى: زى ما كل الناس بتزكى!.
- عم صيام: أيوه.. أيوه.. طبعاً بزكى.. ما أنا بصرف عليكى وعلى البيت.. ده كفاية اللى بدفعه فى الدروس الخصوصية بتاعة العيال.
- منى: يا نهار أسود.. انت بتصرف علينا زكاة؟!.
- عم صيام (ضاحكاً): انت صدقتى؟!.. (مستدركاً): وبعدين انتى ناسية؟.. أنا بدى لأخويا الصغير 100 جنيه كل شهر.
- منى: اتقى الله.. دا انت بتجيبهم م الجامع؟.. آخر مرة قلت لى بعضمة لسانك إنك جبت له 500 جنيه من صندوق التبرعات.. واديته ميه بس؟!.
- عم صيام: ما أنا اديت للواد رمضان 100 جنيه منهم.. غلبان ويستاهل!.
- منى: غلبان ويستاهل؟.. ولا عشان يسمع كلامك.. وتمشوره زى ما انت عاوز؟.
- عم صيام: تأليف قلوب.. (بانتفاخ): أنا أفهّمك يا منى.. الشيخ رضوان بيقول إن المسلم الصح هو اللى يحاول ياخد 8 من 8.. فى 8 مخارج للزكا.. من بينها تأليف القلوب.. المسلم الشاطر لازم ياخد درجته كاملة.
- منى: بس يدفع من جيبه!.
- عم صيام: ما أنا بدفع من نصيبى فى فلوس الجامع.. أنا «العاملين عليها».
- منى: ادفع زكاة مالك من مالك عشان ربنا يبارك لك فيه.
- عم صيام: ومين قال لك إنى ما بدفعش.. أنا بس اللى ما بحبش أتكلم.. وبعدين الصح فى الزكاة إن الإيد الشمال ما تعرفش اللى بتديه الإيد اليمين.. ده الزكا اللى على أبوها.
- منى: انت حر.. انت اللى ربنا هيحاسبك.. المهم دلوقتى تدفع.. لازم نجيب هدية كويسة لابن أخوك.. مش معقولة يتجوز من غير ما نجيب له هدية.
- عم صيام: ما تفكرنيش بالواد دا.. أنا أقول له تعالى ادى دروس خصوصية فى الجامع.. يقول لى هتدفعولى كام؟.. أقول له دول عيال غلابة.. يقول لى ما هم بيدفعوا لكم؟.. أقول له الفلوس دى بنصرفها فى الخير.. يقول لى «فكك منى» ودور على مدرس تانى.. خلاص.. مفيش حد بيعمل حاجة لله أبداً!.
- منى (ساخرة): انت فاكر كل الناس زيك؟!.. خليك انت أحسن.
- عم صيام: ده شعب واطى.. وانا عارف أتعامل معاه إزاى.. الواد ده مش هجيب له حاجة.. يتجوز بعيد عنى.. وكمان أنا مش هحضر له فرح.
- منى: صيام.. كده ما ينفعش.. طب هقول لك حاجة.. انت تجيب له الهدية جر رجل.. لما تدخل عليه بيها هيفرح قوى.. تقوم مكلمه عن موضوع الدروس اللى فى الجامع تانى يوافق على طول.
- عم صيام (وهو يفكر): جر رجل.. تقصدى تأليف قلوب.. والله فكرة.. نألف قلبه!.