- عم صيام: عاوز تقنعنى يا حاج محمد إن الحى خلاص ما بقاش فيه أيتام؟.. دول أكتر م الهم ع القلب!.
- محمد: الطلب عليهم كبير.. إحنا فى شهر رمضان.. وكل جمعية خيرية بتجمع أكبر عدد منهم عشان تلم عليهم!.
- عم صيام: لو عرفنا نتصرف فى كام راس.. هنجمع عليهم شوية فلوس محترمة.
- سامى: وهو لازم اليتيم يبقى يتيم حقيقى؟!.
- عم صيام: الله ينور عليك يا سمسم.. هو دا الكلام.. هو اليتيم مختوم على قفاه بختم يقول أنا يتيم.. إحنا نجمع كام عيل م المنطقة هنا ونسرح بيهم.
- سامى: فى دقيقة هجيبلك 20 عيل نقاوة.
- عم صيام (ضاحكاً): باشر يا معلم!.
- محمد (باحتجاج): حرام.. إحنا كده بنكدب ع الناس.
- عم صيام (بغضب): بنكدب إيه؟.. اوعى تقول كده يا حاج محمد!.. احنا بنزيّن للناس فعل الخير مش أكتر.. محدش عاد بيطلع القرش من نفسه.. المواطن من دول لازم تعصره عصر عشان يطلع اللى معاه.
- محمد: الخير إننا ما نكدبش ع الناس.
- عم صيام: تانى؟!.. أفهمك.. مولانا الشيخ رضوان قال الكدب فى 3 حالات: للصلح بين الناس.. وكدب الراجل على مراته.. والكدب ع العدو!.
- محمد: دا حديث عن الرسول عليه الصلاة والسلام!.
- عم صيام: إيه رأيك فى حال المسلمين النهارده؟!.
- محمد: حالهم صعب والعياذ بالله.. «نسوا الله فأنساهم أنفسهم».
- عم صيام: يعنى المسلم عدو!.
- محمد (باندهاش): عدو إزاى يعنى؟!.
- عم صيام: عدو نفسه.. يبقى حلال الكدب عليه.. بس بقى سامى داخل بالعيال أهه!.
- سامى: قرّب يا ابنى انت وهو!.
- عم صيام: إزيكم يا ولادى!.
- أحد الأولاد: أهلاً يا بونا.. اُطرش اللى عندك على طول وانجز.
- عم صيام: واضح إنك كبيرهم.. تعجبنى.. ليك فى الخير؟!.
- الولد: ليه فى المصلحة؟!.
- عم صيام: ربنا بيقول: المسلم للمسلم!.
- محمد: دا حديث مش آية.
- عم صيام (وهو ينظر إليه بغضب): احنا عاوزين نجيب حق العيال الغلابة ده م المسلمين.. نجمع لهم تبرعات توكلهم وتكسيهم وتظبطهم.
- الولد: عاوز تشحت عليهم يعنى؟!.
- عم صيام (باسماً): عاوز أجمع لهم تبرعات.
- الولد: ساعة العيل ب20 جنيه!.
- عم صيام (متعجباً): 20 جنيه؟.. دا أنا ساعتى فى الحكومة ما تجيبش 10 جنيه؟.
- الولد: يالاه ياد منك له.. واضح إنك بتسلى صيامك!.
- عم صيام (متودداً): بالراحة بس!.. انت اسمك إيه؟!.
- الولد: مش فاكر!.
- عم صيام (ضاحكاً): اسمك مش فاكر؟!.. بص يا حبيبى.. هندفع ع الراس 10 جنيه فى اليوم.
- الولد: 10 فى المشوار.
- عم صيام (بغضب): وأنا راكب توك توك؟.. (ثم متودداً): كتير قوى يا «مش فاكر» يا ابنى!.
- الولد (وهو يشير إلى الأولاد بالخروج): اطلع من خيالى!.
- عم صيام: خلاص موافق!.
- الولد: أنا بقى هاخد نسبة م اللى هتجمعوه آخر كل يوم.. وعاوز أى مصلحة دلوقتى ربط كلام؟!.
- عم صيام: نسبة ومصلحة؟!.
- الولد (وهو يخرج مطواة من جيبه يلوح بها فى الهواء): لزوم الحماية؟!.
- عم صيام (بذعر): يا نهار أسود.. مطوة فى الجامع.. إديله يا سامى.
- الولد: حمامتين؟!.
- عم صيام: دول 200 جنيه.
- الولد: أنا عاوز 3 حمامات.
- عم صيام: ممعناش غير دول.. خدهم وبعد العشا تكون السلاكة اتملت.. ونديك التالتة.