- عم صيام: افتح الصندوق يا حاج محمد.. خلينا نعرف راسنا من رجلينا.
- محمد: المفتاح معصلج حبتين!.
- عم صيام: خش انت يا سامى!.
- سامى: يا معين!.
- عم صيام (فرحاً): أيوه كده.. افتح يا سمسم.. خلى بقى العد عليه.. آدى عشرة.. عشرتين.. تلاتة!.
- محمد: مايجمعوش 5 آلاف جنيه!.
- عم صيام: مبلغ قليل أوى.. الكلام ده مايوكلش عيش.. إحنا قدامنا مصاريف كتير.. المسلمين محتاجين ياكلوا ويحلوا.. حقهم.. طول اليوم صايمين.
- محمد: شايف إيه يا حاج صيام؟.
- عم صيام: شوية نشاط.. على حبة ابتكارات.. هنخلى الفلوس تدلدق م الصندوق.. نبسط المسلمين.. ونزود نسبتنا.. والكل يتراضى!.
- سامى: هو ده الكلام.. إحنا «العاملين عليها».
- عم صيام (ضاحكاً): والمؤلفة قلوبهم كمان.. اسمعوا بقى إحنا هنشتغل بطريقة جديدة خالص.. رمضان يا جماعة تلات عشرات.. مش كده؟.
- سامى: مش فاهم!.
- عم صيام: الله يرحمها أمى.. كانت بتقول رمضان 3 عشرات.. عشرة مرق.. وعشرة خرق.. وعشرة حلق.. المرق معروف.. الأكل والشرب.. والخرق يعنى الهدوم.. والحلق يعنى كحك العيد.. إحنا نشتغل عَ المسلمين عشرة عشرة.
- محمد: العشرة المرق فرطوا.
- عم صيام: نشتغل ع الخرق والحلق!.. اسمع يا سامى.. عاوزك تمسك الميكروفون طول اليوم وتنادى: «تبرعوا لأيتام وفقراء المسلمين.. ساهم فى كسوة ألف طفل ع العيد».. وانت يا حاج محمد تشغّل لعبة الصعبانيات.
- محمد: إزاى يعنى؟.
- عم صيام: حكّى فى ودان العباد.. خد عندك الحدوتة دى.. «تلات بنات يتامى.. مات أبوهم ومافاتش ليهم معاش.. وسابهم لأمهم العيانة.. أمهم محتاجة تعمل غسيل كلوى مرتين فى الأسبوع.. الغسلة الواحدة ب400 جنيه.. أولاد الحلال بيجمعوا لها تمن الغسلتين.. بس البنات الصغيرة يا حسرة قلبى.. نفسهم فى فساتين جديدة عَ العيد.. واللى يكسى مسلم فى الدنيا يكسيه ربنا بالسندس والحرير فى الآخرة».. شوية الصعبانيات دى ممكن تكسبنا كتير أوى.
- سامى: ونعمل نفس الشغلانة فى كحك العيد؟.
- عم صيام: قصدك العشرة الحلق.. لأ دول هنشتغل فيهم بطريقة مختلفة.. كل عضو فى مجلس إدارة جمعية الصحابة يبعت رسالة عَ الواتس لكل اللى معاه ع التليفون.. أو عَ الفيس.. «كحكة بسكر لكل مسلم»، «فرحوا الغلابة بشوية بسكويت».. «شير فى الخير».. «كحك العيد حق لكل مسلم».. و.......
- رجل (يظهر فجأة ويقاطع عم صيام قائلاً): انت بتخرّف فى إيه يا جدع انت؟!.
- محمد: يا نهار أسود.. إزيك يا أخ عماد.. كيف حال الإخوة؟!.
- عماد: الراجل ده بيقول إيه؟!.
- عم صيام: مالك يا أخينا.. أنا عاوز أحنن المسلمين على بعض!.
- عماد (بتنمر): بالبدع؟!.. كحك العيد بدعة.. وكل بدعة ضلالة.. وكل ضلالة فى النار.
- عم صيام (بخوف): أيوه.. بس الشيخ رضوان بيقول كلام غير ده.
- عماد (بحسم): انتو هتألفوا فى الدين.. إياك أسمع حد فيكم يتكلم عَ البدعة ده.
- عم صيام: أوامر يا أخ عماد.
- عم صيام: كده العشرة الحلق غرقوا فى المرق!.. مش مهم.. البركة فى الخرق!.