- عم صيام: أنا راجل متعلم الدين ع الصح.. إزاى ما أفتيش؟.. النية واجبة عشان الصيام يتقبل. - الزميل الأول لعم صيام فى العمل: النية فى القلب يا صيام بيه.. مش لازم الواحد يقول بلسانه «نويت الصيام». - عم صيام: غلط.. أكبر غلط.. ما هو الشيطان بيخش لبنى آدم م الحتة دى.. قال إيه كفاية القلب.. قلب إيه يا بهوات.. أنا سمعت الشيخ رضوان بيقول: «الإيمان ما وقر فى القلب وصدقه العمل». - زميل ثانٍ: دا حديث عن النبى صلى الله عليه وسلم.. مين الشيخ رضوان دا يا صيام بيه؟. - عم صيام: الشيخ رضوان دا فاتح أكبر مدرسة لتعليم الدين فى جامع «الصحابة». - الزميل الأول: شيخك يعنى؟!. - عم صيام: مدرس الدين بتاعى.. كل مسلم لازم يكون له واحد يدرس له الدين.. عشان ربنا يرضى عليه وينجح!. - الزميل الثانى (ضاحكاً): وبياخد كام فى الحصة؟!. - عم صيام: وهو محتاج؟.. دا الخير بيجيله من كل حتة.. نفحات من جوه ومن بره. - الزميل الأول: والقرآن؟.. الكتاب المقرر علينا؟!. - عم صيام: محدش يعرف يفهم القرآن ولا السنة لوحده.. لازم حد يفهمه ويعلمه عشان كده مدرس الدين ضرورى.. واللى مش لاقى مدرس.. عنده التليفزيون.. القنوات مليانة دعاة يشرحوا القلب الحزين.. ارمى ودنك معاهم هتتعلم كل حاجة وهتفتى وتبقى زى الفل.. واللى مش عاجبه التليفزيون يدخل ع النت!.. بس حاسب م الكتب الخارجية. - الزميل الثانى (ضاحكاً): إيه الكتب الخارجية دى؟!. - عم صيام: الكتب اللى ماليه السوق والإنترنت.. تلاقى كتاب عامل أسئلة وأجوبة فى الدين.. وواحد عامل فتاوى.. وواحد عمال يحكى لك فى قصص.. الشيخ رضوان حذرنا م الكلام دا.. وقال اللى عاوز ياخد الدين ياخده من حد يثق فيه. - الزميل الأول (ضاحكاً): ربنا يرزقنا مدرس ابن حلال زى الشيخ رضوان. - عم صيام: وتروحوا بعيد ليه؟.. ما أنا معاكم أهه.. أى حاجة عاوزين تسألوا فيها قولوا لى وأنا أفتى لكم.. ينوبنى ثواب فيكم. - الزميل الأول: متآخذنيش يا صيام بيه.. دا مش تخصصك.. بردو الدين له علماؤه. - عم صيام: بقول لك أنا متعلم فى مدرسة الشيخ رضوان.. (مستدركاً): مدرسة إيه؟!.. ده جامعة يا عزت بيه.. جامعة!. - الزميل الثانى: وعلى إيه كل ده.. دار الإفتا عاملة موقع ع الإنترنت.. تبعت السؤال يجاوبوك. - عم صيام: أكبر غلط يا عمنا.. تدخل ع النت عشان تسأل فى الدين.. تلاقى الفيس جرك ع الشات.. والإنستجرام ساحبك على صور المزز. - الزميل الأول (ضاحكاً): دا انت خبير بقى يا صيام بيه!. - عم صيام: أنا بدخل أتفرج ع الحاجات دى عشان أعرف مشاكل التلامذة اللى زيكم.. العيل من دول يبقى قاعد ع الشاشة دماغه مش فيه. - الزميل الأول: م الآخر كده.. النية بالقلب ولا بالقلب واللسان؟!. - عم صيام (وهو يتقمص دور الشيخ): أمى الله يرحمها كانت كل يوم بعد السحور تقول بصوت عالٍ: «نويت الصيام من شهر رمضان.. إن شاء الله من الصايمين». - الزميل الثانى: وأبوك؟!. - عم صيام: الله يرحمه.. كان بيضحك عليها!.