اللى خانوا الدم فى الميدان

طيور الضلام جنحت يا با
فاكره إن تقدر تسد عين الشمس
وتقطع إيدين الغلابه!!!!
*********************
رفعوا مصاحف أميه و قالوا "دولة ودين"
عارفين حبايب الرسول فى الأصل مصريين
الطيبه فى طبعنا وسماحة الإسلام.
رفعوا مصاحف أميه لكن بقى على مين؟
بصوا قوى ف الوشوش ماتصدقوش الكلام
حتلاقوا خلف الرطوش بشاعة الوش اللئيم
تجار جوارى وعبيد وكتامين أحلام
ومعلمين الشيطان يفتى فى عشق الوطن
و يجود القرآن_
يرطن بألف حديث
عن مين ومين ابن مين...
إن الدقون على الجتت هى دليل الإيمان
أستففر الله العظيم
زفة مظاهر عندهم .. لكن اللوع واحد
و الكدب غار من كدبهم
وقلبهم جاحد.!!
حيقطعونا حتت ويقولوا مرتدين
وحيدفنونا من غير صلا ولا شاهد!
حيقولوا ده ناصرى ودول بنى ليبرال
ودول عيال فيسبوك مالهومش مله و دين,
واحد حزين حيقول..
- طيب قولولى ازاى
مش كنا ف المعركه وكل البشر إخوان؟
واكلين معانا العيش شاربين معانا الشاى
ومسددين الحساب ..يوم الحساب ف الميدان!!
-حنقوله بطل طيابه ده لكل وقت أدان
والشعب كان سلمه للحكم والسلطان
دلوقتى قالوا انتخاب.. شفتوا فراغة العين!!
يعنى الصبيه قبل الجواز تولد!!
قولنا احنا " كتب الكتاب قبل الدخول يا ولاد .. العرف زى الدين
دستوووووووووور يا أمة محمد .. واضح و متحدد
الشرط نور النبى.. يهدى السبيل للقبط... وللمسلمين
مش ربنا أرسلو للعالمين رحمه
عايزنها ليه بالغلط بتخموا فى الزحمه؟؟
وكمان لسانكم فلت قلتم علينا اللى فيكم
طلعتوا فينا القطط .. بتداروا بلاويكم
أنا مش هكون زيكم بالكفر أرميكم
قادر كريم ربنا..
يا يا خدكو من وشنا يا إما يهديكم.
يا يا خدكو من وشنا يا إما يهديكم.