مين للبهية يكون عريس؟

مين للبهية يكون عريس؟
لمصر مين ينفع رئيس؟
فيه حد فيكوا يقول لنا
كل الوجوه مش عارف ليه
مرسومة أو متلونة
واحد يقول أنا أهل دين
أنا الشريف وأنا الأمين
ويمكن صحيح طيب . . وزين
والحق دينه وملته
لكن الرياسة خط تاني
مجني عليه .. أو حتى جاني
لا له ف عبايته .. ولا ف طهارته
ولا له في شاله وعِمِّته
*********
والتاني عالم .. ع الجبين
العلم .. نهجه وسكته
عقله أكيد هادي ورزين
والفعل حرفه و كلمته
الحل عنده ف خطوتين
وف معمله .. جامد متين
لكن البهية وأهلها
أكبر كتير من قدرته
*****
والتالت أنا شيفاه ملوش
غير في التجارة وفي الفلوس
يعرف يبيع ويشتري
وف مهنته واخد دروس
المال أهم من البشر ومن النفوس
المال إلهه ودنيته
إن قلت له حال البلد
هيعوز أكيد يفتح قاموس
علشان يبين حكمته
********
والرابع اللي من سنين
كنا ما نعرف هوه مين
أو هوه فين
دلوقتي جاي عامل رزين
وموَطِي صوته ومُستكين
بيقول أنا خادم معين
للشقيانين المطحونين
لو تختاروني .. صدقوني
لا حد هينام يوم حزين
ولا حد تنزل دمعته
لو تسأله طب إنت مين؟
أو بالأمانه كنت فين؟
أوام يقولك حِجته
إن البهية ومهرها
كانوا همومه .. وهِمته
وعشانها راح لف البلاد
وعشانها .. جمَّع قوته
جالها وشايل شنطته
********
مش عارفة ليه الكل بقى له وش تاني
مش عارفة ليه الكل بقى بيبيع أماني
وبقى اللسان شاعر في ثانية
تسمعه بيقول أغاني
الكل حاوي جاي بيعرض في الشوارع لعبته
كداب مصدق كدبته
طماع بيجمَع ثروته
لا حد فكر في البهية
ولا حد قال أنا للصبية
خيال وهادفع مهرها
وهصونها وأصون أهلها
وهاعدي بيها لبر تاني
بقلب صادق مش أناني
ولا حد جالها وقال بحالها
هيه كيانه وفطرته
وعشانها روحه فوق كفوفه
والحق سوطه وسطوته
*********
مش عارفة ليه ..
كأنها لعبة كراسي
سباق وكله لربه ناسي
لا عرفت مين عادل وطيب
ولا مين يا ناس ظالم وآسي
خناقة دايرة جوة راسي
أصل الشيطان عَاجْبُه حماسي
عمال بيضحك ويعاندني
وكأن راسي ف قبضته
بيقول لي كل الناس عبيده
بيقول لي كله بطرف إيده
بإشارة يمشي ف سكته
أبكي وأشك ف ذمته
ما أنا عارفه مكره وخسته
لكن ألاقي الناس قصادي
كله .. بيسبق خطوته
********
الكل جاب كرافته شيك
ولبس سِينييه وكأنه ديك
آعد يكاكي ف شعب راسه
الهَم فيها ملوش شريك
ديك لا الآدان رفعه بصوته
ولا بالأدب فَضَّل سكوته
وخَبَى في الريش حِدِّته
********
أرجوكوا مين ينفع رئيس؟
مين للبهية يكون عريس؟
فارس وقلبه أصيل حسيس
يشيل همومها وأهلها
وتبقى عقله ونِن عِينه
قلبه .. وروحه .. وكِليته
يشيل هموم كل الغلابة
ويكون شريف مليان طيابة
ما يسبش في الشارع ديابة
تاكل وتنهش في الضعيف
من غير ما نلمح طلعته
ولا عدله ولا عين رحمته
*******
قولوا لي مين ينفع رئيس؟
مين للحبيبة يكون عريس؟
مين ليها هيخضب كفوفها
ويصونها ويقابل ضيوفها
ويكون لهم أنصح جليس
مين ليها هيكون الونيس؟
وعليها هيكون الحريص
يحفظها .. يِحسِن عشرته
لا تشوف معاه أحزان ولا
يوم تشتكي من أسوته
*******
فيه حد قلبه فيها دايب؟
فيه حد عنها ما كنش غايب؟
مين للصبية يقيد شموعها؟
وبعشقها يمسح دموعها؟
يشفي جراحها بلمسته
عايزين لها فارس نبيل
عقله هرم .. والقلب نِيل
ساعة الخطر صقر وأصيل
لا يقول بعيد .. ولا مستحيل
يأمر .. عشانها الشمس تشرق
وف ليلها .. كل نجومها تبرق
تشهد بإنها دنيته
مصر الجميلهة .. هيهة دمه
همه .. وروحه .. ومهجته
مين للجميلة يكون عريس؟
للغالية مين ينفع ونيس؟
لمصر .. مين ينفع رئيس؟
تُنطق القاف ألف في بعض الكلمات
محبتي