- عم صيام: صباح الخير يا عمنا.. (إلى الأولاد المحيطين به): بس يا ولاد.. خلونى أعرف أتكلم!.. أخبار الأسعار إيه النهارده؟
- البائع: القوطة 4.. والبطاطس 5.. والخيار 6.. شوف انت عاوز إيه؟!
- عم صيام: إيه الغلا اللى إحنا فيه ده؟.. (وهو يقترب منه ويهمس فى أذنه): انت عارف الولاد دول إيه؟.. دول أيتام.. وعاملين فى جامع «الصحابة» جمعية تأكلهم وتشربهم وتعلمهم وتراعيهم.. يعنى اللى هاخده منك رايح لله.. إيه رأيك؟!
- البائع: لا حول ولا قوة إلا بالله.. أنا هوضب لكم قفص مشكّل.
- عم صيام: وأنا هدفع لك 10 جنيه!
- البائع: لا 10 ولا 20.. اللى فيها لله تسير.
- عم صيام: بارك الله فيك.. ربنا يجعله فى ميزان حسناتك!.. (إلى أحد الأولاد): شيل يا ابنى القفص دا.. وبينا ع الفكهانى.
- أحد الأولاد: عاوز أحلق.
- عم صيام (باستغراب): نعم يا خويا؟!.. تحلق إيه وتهبب إيه؟!
- الولد: أمى قالت لى خلى الراجل اللى مسرّحكم يحلق لك.
- عم صيام: طيب اكتم دلوقتى.. (إلى الفكهانى) صباح الخير.. (وهو ينظر إلى الفاكهة): يا خيرات الجنة.. «فيها فاكهة ونخل ورمان».
- البائع: اؤمر!
- عم صيام: ما يأمرش عليك عدو.. عاوزين شوية فاكهة.
- البائع: عاوز إيه.. وقد إيه؟.
- عم صيام: شكّل لنا 2 كيلو من كل حاجة.. وحطهم فى قفص.. والواد هيشيل.
- البائع: عينيّا!
- الولد: هنحلق إمتى؟!
- عم صيام (بضجر): هوديك للزفت الحلاق.. اصبر على رزقك!
- البائع (بعد تجهيز المطلوب): 160 جنيه.
- عم صيام (وهو يقترب منه): شايف القفص اللى فى إيد الواد ده.. ما دفعناش فيه جنيه؟.. الخضرى أول ما عرف إن العيال دول أيتام اتبرع بالخضار.. (بابتسامة): شوف انت هتتبرع بإيه؟!
- البائع: آآآآه.. طب بقول لك إيه.. لم عيالك دول واسرح بعيد!
- عم صيام: أسرح بعيد؟!.. جرى إيه يا عمنا؟!.. انت بتكلم راجل محترم.. وبعدين مين قال لك إننا مش هندفع؟!.. أنا هديلك 50 جنيه!
- البائع: 50 جنيه فى فاكهة ب160؟
- عم صيام: دى رايحة لله.. ما تساهمش فيها بحاجة؟!
- البائع: ولا جنيه!
- عم صيام (بغضب): خلاص نروح لغيرك.. شعب واطى صحيح.
- الولد: الحلاق أهه.. يللا ندخل.
- عم صيام: اتزفت.. ادخل.
- الأولاد: هيه.. هنحلق!
- عم صيام: صباح الخير يا عمنا.. عاوزين نأروط الكام راس دول.
- الحلاق: أوامر.. (إلى صبيانه): شغّل المكن يا ابنى انت وهوه.
- عم صيام: أيوه.. خليهم ع الأبيض.. بدل ما يحلقوا كل شهر.. يحلقوا كل شهرين تلاتة!.. تصدق بقى.. شكل المحل فتح نفسى ع الحلاقة.. أنا هحلق أنا كمان.
- الحلاق: عينيّا.. بس حاسبنى الأول على روس العيال.
- عم صيام: كام؟!
- الحلاق: الراس ب25.
- عم صيام (ضاحكاً): وهو الجملة زى القطاعى؟.. دول أيتام يا عمنا.. أنا هدفع 5 ع الراس.
- الحلاق: 5 ع الراس؟.. انت عارف المحل دا إيجاره كام.. وبدفع كام فى النور.. وكام فى الميه؟
- عم صيام: بقول لك دول أيتام.
- الحلاق: وأنا مالى أنا.. ما أنا كمان يتيم.
- عم صيام (بإصرار): وأنا كمان يتيم.. ومش هدفع غير 5.. بطلوا الجشع اللى انتو فيه دا.. شعب واطى صحيح.
- الحلاق (بهدوء): كده.. طيب مش كنت عاوز تحلق؟!
- عم صيام (فرحاً): هو دا الكلام.
- الحلاق: علق له الفوطة يا واد.. واديله صليبة.. (وهو يضع الماكينة فى منتصف رأسه): هحلق لك حلاقة عمرك ما هتنساها.
- عم صيام: يا نهار أسود.. ضربتنى مكنة بالطول.. ومكنة بالعرض.. منك لله يا شيخ.